समाचारहरू

गल्छी गाउँपालिका–६ महेशदोभानमा अस्थायी बसोबास गर्ने ३२ वर्षीया निशा क्षेत्री मगरको हत्या गरेको आरोपमा पीडित पक्षले भारत दार्जलिङ घर भएका ४९ वर्षीय प्रकाश मगरविरुद्ध इलाका प्रहरी कार्यालय गजुरीमा साउन २२ गते कर्तव्य ज्यानसम्बन्धी उजुरी दिएको छ ।

अर्घाखाँची जिल्ला मालारानी गाउँपालिका–२ माइती भएकी निशा र प्रकाश गल्छी गाउँपालिका–६ बैरेनी महेशदोभान क्षेत्रमा मजदुरी गरी अस्थायी बसोबास गर्ने गरेको प्रहरीले जनायो ।

निशा गर्भवती भएको र पेटमा भएको बच्चा अर्कैको भएको आरोपमा पटकपटक कुटपिट गर्दै आएका प्रकाश मगरले साउन १८ गते कुटपिट गर्दा मृत्यु भएको थियो ।

पटकपटक कुटपिट गर्ने र यसलाई मार्छु भन्ने गरेका आरोपितले केही समय ढुङ्गानाटारमा मजदुरी गरेर बस्दै आएको र घटना भएको राति महेशदोभानमा आएर पत्नीको हत्या गरेको छिमेकीहरूले आरोप लगाए ।

शवलाई पोष्टमार्टमका लागि शिक्षण अस्पताल काठमाडौँ पठाएको छ । आरोपितलाई प्रहरीले साउन २० गते बेलुका गिरफ्तार गरेको जिल्ला प्रहरी कार्यालय धादिङका डिएसपी मकेन्द्रकुमार मिश्रले जानकारी दिनुभयो ।

सीताराम अधिकारी