गर्भपतन गराएको घटनाका आरोपित गिरफ्तार

  ०७६ माघ २४ गते

१९ वर्षीया एक युवतीको गर्भपतन गराएको आरोपमा प्रहरीले कुम्मायक गाउँपालिका –१ का २९ वर्षीय औषधि व्यवसायी ३० वर्षीय खगेन्द्र घिमिरेसहित तीनलाई माघ २३ गते गिरफ्तार गरेको छ ।

प्रहरीले सोही घटनामा संलग्न भएको आरोपमा फिदिम नगरपालिका–१स्थित समर्पित अस्पतालका डाक्टर ३६ वर्षीय विशाल श्रेष्ठ र सोही अस्पतालका ३० वर्षीय स्वास्थ्य सहायक शिशिर आङबोलाई गिरफ्तार गरेको छ ।

स्वीकृति नै नपाएको अस्पतालले ०७६ पुस २४ गते २१ हप्ताको भ्रुण गर्भपतन गराएको आरोपमा उनीहरूलाई अनुसन्धानका लागि गिरफ्तार गरेको जिल्ला प्रहरी कार्यालयका इन्स्पेक्टर रोमनराज अर्यालले बताउनुभयो ।

अस्पतालका हेल्थ सहायक शिशिर आङ्बोले गर्भपतन नगराएको युवती सरसफाई गर्न अस्पताल आएपछि सरसफाई मात्र गरेको बताउनुभयो । आरोपित आङ्बोले युवतीले बाहिर नै औषधि सेवन गरेकाले रक्तस्राव भएको र सो रोक्नलाई अस्पताल आएपछि आफूहरूले उपचार गरेको बताउनुभयो ।

पीडित युवतीले गर्भपतन गराएको आरोपमा अस्पतालका तीन जना र अन्य चार जना विरूद्ध पुस २२ गते जिल्ला प्रहरी कार्यालयमा उजुरी दिएपछि गिरफ्तार गरेको इन्स्पेक्टर अर्यालले बताउनुभयो ।

कुम्मायक गाउँपालिका –५ का २९ वर्षीय रमेश खड्कासँगको सम्वन्धबाट बसेको गर्भ निजका आफन्त तथा छिमेकीको दबाबमा पतन गराएकाले कानुनी कारबाहीका लागि उजुरी दिएको पीडितले बताउनुभयो ।

कुम्मायक गाउँपालिकाका अध्यक्ष ५० वर्षीय जयबहादुर चेम्जोङले समेत गर्भपतन गराउँन दबाब दिएको पीडितले बताउनुभयो ।

गाँउपालिका अध्यक्षका विषयमा अनुसन्धान थालिएको र दोषी देखिए गिरफ्तार गर्ने प्रहरीले जनाएको छ ।


मङ्गल बेघा