समाचारहरू

गएको स्थानीय तहमा गरुडा नगरपालिकामा लोकतान्त्रिक समाजपादी पार्टी (लेसपा) का तर्फबाट प्रत्यासी नगर प्रमुखका उम्मेद्वार दिपक यादव नेतृत्वको समूहले नगरपालिकामा ढुङ्गामुढा गरेपछि प्रहरीले रोक्न खोज्दा चैत २९ गते झडप भएको छ ।

गरुडा नगरपालिका कार्यालयले चैत ३० गते गर्न लागेको सार्वजनिक सुनुवाइ रोक्न नमानेपछि यादव नेतृत्वको समूहले त्यसको विरोधमा नगरपालिका कार्यालयमा तालाबन्दी गर्न खोज्दा प्रहरीले रोकेपछि झडप भएको हो ।

पछिल्लो समय विभिन्न समयमा आन्दोलन गर्दै आएका स्थानीय दिपक यादवले चैत २९ गते गाउँलेहरूलाई उचालेर नगरपालिकाको कार्यालय तथा गाडीमा तोडफोड गर्न खोज्दा बल प्रयोग गर्नु परेको प्रहरीले जनाएको छ ।

तोडफोड गर्नबाट दिपक यादवको समूहलाई प्रहरीले रोकेपछि प्रदर्शनकारीहरूले ढुङ्गामुढा गरेर टिपर, मोटरसाइकल, कार्यालयको झ्यालमा क्षति पु¥याउन सुरु गरेको जिल्ला प्रहरी कार्यालयका एसपी विरबहादुर बुढामगरले बताउनु भयो ।

प्रर्दशनकारीको ढुङ्गामुढाबाट इन्स्पेक्टर बिरेन्द्र पासवानसहित चार जना प्रहरी घाइते भएको एसपी मगरले जानकारी दिनु भयो । प्रदर्शन उग्र बन्दै गएपछि भिडलाई नियन्त्रणमा लिन चार राउण्ड टियर ग्याँस प्रहार गरेपनि भिडलाई नियन्त्रणमा लिन नसकेको र ११ राउण्ड गोली हावाइफायर गरेको एसपी मगरको भनाई थियो ।

झडपका क्रममा प्रहरीको गोली लागेर गरुडा नगरपालिका–५ का २२ वर्षीय गजेन्द्र यादव घाइते भएका छन् । घाइते यादवलाई उपचारको लागि नारायणी अस्पताल वीरगंज लगिएको छ । नगरपालिका कार्यालयमा ढुङ्गामुढा तथा विरोध प्रदर्शन गराउने दिपक यादव सहित चार जनालाई प्रहरीले चैत २९ गते गिरफ्तार गरेको प्रहरीले जनाएको छ ।

इन्सेक मधेस प्रदेश