समाचारहरू

मानव अधिकारकर्मीले न्यायको माग राखेर आमरण अनसनमा बसेकी गोरखा फुजेल-७ की ५९ वर्षीया गङ्गामाया अधिकारीको जीवन रक्षाको माग गर्दै सिंहदरवार दक्षिणढोका अगाडि धर्ना दिएका छन् ।

गङ्गामाया बचाउ अभियानको आयोजनामा साउन ३१ गते दिइएको उक्त धर्नाका सहभागिहरूले कृष्णप्रसादको हत्यारालाई गिरफ्तार गरी गङ्गामायाको ज्यान बचाउ, निर्दोष नागरिकका हत्यारालाई कारबाही गर, हत्याराको कुनै पार्टी, दल र जात हुन्न, पहुँचको बलमा कानुनमाथि खेलवाड नगर, कानुन सबैलाई बराबर गर, सर्वोच्च अदालतको फैसला कार्यान्वयन गर लेखिएका प्ले कार्ड बोकेका थिए ।

अनसनरत गङ्गामायाका कान्छा छोरा १६ वर्षीया कृष्णप्रसाद अधिकारीलाई ०६१ जेठ २४ गते तत्कालीन विद्रोही नेकपा माओवादीका कार्यकर्ताले चितवनको बकुल्लहर चोकबाट अपहरण गरी निर्मम तरिकाले हत्या गरेका थिए ।

सोही घटनाको अनुसन्धान गरी दोषीलाई कारबाहीको माग राख्दै गङ्गामाया अधिकारी साउन २७ गतेदेखि छैठौँ पटक वीर अस्पतालमा उपचारार्थ अवस्थामानै आमरण अनसन बसिरहेकी छिन् । अनसनको कारण उनको स्वास्थ्य अवस्था विग्रँदै गएको चिकित्सकहरूले बताएका छन् ।

विवेक ढुङ्गाना