समाचारहरू

खाँडादेवी गाउँपालिका-४, सुतारमा खोलाले बगाएको कुलो बनाउन नसक्दा किसानलाई खेत रोप्नमा समस्या परेको छ ।

खोलाले बगाएको कुलो बनाउन नसकेपछि यस वर्ष किसानहरूको खेतमा धान खेती नलाग्ने निश्चित भएको हो । आसपासमा धान रोपाइँ हुँदा सुतारका किसानहरू सुक्खा खेत हेरेर बस्न बाध्य भएको स्थानीय किसान पोषक बहादुर कार्कीले बताउनु भयो । 'खेतमा पानी लाग्ने कुलै छैन, यस वर्ष हाम्रो खेतमा धान नरोपिने भयो', स्थानीय किसान कार्कीले भन्नुभयो ।

सो गाउँका झण्डै १८ घर धुरीको खेतमा पानी लाग्ने कुलो भुटौली खोलाले बगाएको छ । बगाएको कुलो मर्मत गर्न नसक्दा किसानका खेत बाँझै छन् । 'धान रोप्ने खेत बाँझै छ, अरू धान रोप्छन्, हामी सुक्खा खेत हेरेर बस्नु परेको छ', कृषक रत्नबहादुर कार्कीले उल्लेख गर्नुभयो ।

सुतार गाउँवासीको धान लगाउने खेत बाँझो भएपछि परिवार के गरी पाल्ने भन्ने गाउँ बासीलाई चिन्ता छ । 'खेती हुने जग्गा बाँझै छ, के खाने, के गरी परिवार पाल्ने, भोकमरी लाग्ने डर भयो', रत्नबहादुरले गुनासो गर्नुभयो ।

कुलो मर्मतको लागि खाँडादेवी गाउँपालिकाले एक लाख रुपियाँ बजेट उपलब्ध गराएको थियो । सो बजेट ल्याउनुको साथै किसानले धेरै श्रमदान गरे पनि कुलो नबनेको खाँडादेवी गाउँपालिका-४ का वडा सदस्य भीमबहादुर बस्नेतले जानकारी दिनुभयो । 'कुलो धेरै बिग्रिएको थियो, त्यति पैसाले बन्न सकेन', खाँडादेवी गाउँपालिका-४ का वडा सदस्य बस्नेतले भन्नुभयो ।

यस वर्ष सो कुलोको मोहीले धान रोप्ने अवस्था नरहेको उहाँले बताउनु भयो । यस विषयमा गाउँपालिको पनि ध्यानाकर्षण गराएको र अर्को वर्षसम्म कुलो बनाउन आफूले प्रयत्न गर्ने उहाँले बताउनु भयो । 'यस विषयमा गाउँपालिका अध्यक्षको पनि ध्यानाकर्षण गराएको छु, गाउँपालिका बाहेक अन्य निकायलाई समेत किसानको यो समस्या समाधानको लागि म अनुरोध गर्छु, अर्को वर्षसम्म जसरी पनि कुलो बनाउने प्रयत्नमा लाग्छु', वडा सदस्य बस्नेतले भन्नुभयो ।

नवराज घिमिरे