समाचारहरू

शारीरिक अपाङ्गता भएका हिलिहाङ गाउँपालिका–६ का १२ वर्षीय बालक सुशन थोक्लिहाङको इन्सेक पाँचथर प्रतिनिधिको पहलमा असार १० गते उद्दार गरिएको छ । शारीरीक अपाङ्गता तथा मनोसामाजिक समस्या भएका बालकलाई आठ वर्षदेखि खोरमा थुनेर राखिएको थियो ।

जेठ पहिलो साता बालकको अवस्थाका बारेमा इन्सेकले स्थलगत अनुगमन गरी अन्य सङ्घ संस्थाको समन्वयमा  बालकको उद्दारको व्यवस्था गरेको हो ।

अपाङ्गता भएका बालकलाई इन्सेकलगायत बालबालिका र अधिकारको क्षेत्रमा क्रियाशील सङ्घसंस्थाको पहलमा खगेन्द्र नवजीवन केन्द्र, भद्रपुर झापामा उपचार तथा संरक्षणका हुने गरी उद्दार गरिएको छ । बालकलाई गत जेठ महिना नै उद्दारको व्यवस्था गरिएपनि कोभिड–१९ को कारण असार १० गतेमात्र उद्दार गरिएको हो ।

कोभिड–१९ को सङ्क्रमणका कारण बालकमा कोभिड सङ्क्रमण भए नभएको जाँचका लागि इन्सेकले जिल्ला अस्पताललाई चिठी लेखि इन्सेकले परीक्षणको व्यवस्था मिलाएको थियो । परीक्षणका क्रममा बालकमा कोभिड–१९ को सङ्क्रमण नभएको पुष्टि भएपछि बालकको उद्दार गरिएको हाे ।

इन्सेकले प्रदेश १, सामाजिक विकास मन्त्रालय, इन्सेक प्रदेश कार्यालय विराटनगर, हिलिहाङ गाउँपालिका र राष्ट्रिय बाल अधिकार परिषद, नेपाल अपाङ्ग सङ्घसहित नेपाल पत्रकार महासङ्घ पाँचथर शाखा र मानव अधिकारकर्मीहरूसँग समन्वय गरी बालकको उद्दार गरेको हो ।

इन्सेक प्रतिनिधिसँगको सहकार्यमा राष्ट्रिय बाल अधिकार परिषदसँगको साझेदारीमा बालकलाई मानव अधिकार मञ्च नेपाल इलाममार्फत नवजीवन केन्द्र भद्रपुर झापा लगिएको हो ।

इन्सेक प्रतिनिधिले बालकको उद्दारका लागि सामाजिक विकास मन्त्रालयसहित अन्य सङ्घसंस्थासँग समन्वय र सहकार्य गरेको मानव अधिकार मञ्च नेपालका भक्त थामीले बताउनु भयो ।

बाबुको पहिचान नभएका नातिको उपचारका लागि पैसा अभाव भएपछि विगत आठ वर्षयता खोरमा थुनेर राखेको हजुरआमा ललिताकुमारी थोक्लिहाङले बताउनु भयो । उहाँले इन्सेक प्रतिनिधिले नातिको अवस्था देखेपछि उद्दार गरेको बताउनु भयो ।

हजुरआमा थोक्लिहाङले इन्सेक प्रतिनिधिले नातिको उद्दारका लागि ४ हजार ५ सय रुपियाँ आर्थिक सहयोग गरेको बताउनु भयो ।

बालककी आमा विवाह गरेर अन्यत्र गएपछि ललिताकुमारीले नातिको रेखदेख गर्दै आउनु भएको थियो ।

मङ्गल वेघा