खोपमा विभेद, पहुँचवालालाई प्राथमिकता, सर्वसाधारणलाई सास्ती

 

सरकारले उपलब्ध गराएको कोभिड‐१९ सङ्क्रमण विरुद्धको खोप लगाउने क्रममा विभेद भएको पाइएको छ । जनप्रतिनिधि, राजनीतिक दलका नेता र स्वयंसेवकले विभेद गर्दा पहुँच नपुगेका, अपाङ्गता भएका र जेष्ठ नागरिकले खोप पाउनबाट वञ्चित भएका छन् ।

मध्यपुरथिमि वडा नं. ३ कार्यालयको खोप केन्द्रमा वडाध्यक्ष राम थापा मगरले आफू निकट पार्टीका नेता तथा कार्यकर्ता र उनका सबै परिवारलाई खोप उपलब्ध गराएको तर लाइन बसेकालाई खोप छैन भनेर फर्काएको स्थानीयवासी एवम् जिल्ला समन्वय समिति भक्तपुरकी सदस्य शकुन्लता श्रेष्ठले बताउनुभयो ।

वडा कार्यालयले दिनभर लाइन राखेर २ बजेपछि खोप सकियो भनेर लाइनमा बसेकालाई फर्काएर आफ्ना पार्टीका नेता, कार्यकर्ता र उनका परिवारलाई खोप दिलाए उपलब्ध गराएपछि स्थानीयले खोप केन्द्र नै घेराउ गर्नु परेको बताउनु भयो । वडाध्यक्ष थापा मगरले केही नेता तथा कार्यकता र आफन्तको घरमै गएर खोप लगाउने व्यवस्था समेत गरेको स्थानीय राजाराम थापाको भनाइ छ ।

यता सूर्यविनायक नगरपालिका‐१ सिरुटार स्वास्थ केन्द्रमा स्वास्थ्यकर्मी, जनप्रतिनिधि र नेपाल रेडक्रस सोसाईटीकै प्रतिनिधिले खोपमै विभेद गरेको पाइएको छ । खोप लगाउन गएका ४० वर्ष माथिका स्थानीयलाई दिनभर लाइनमा राखेर अपराह्नपछि नै खोप सकिएको भन्दै पर्काएको स्थानीय सुशीला खत्रीले बताउनुभयो ।

उहाँले भन्नुभयो, ‘हामी बिहान ७ बजेदेखिनै लाइनमा बस्यौ तर १ बजेनै खोप सकियो भनेर फर्काइयो, भोली पल्ट आफन्त र ललितपुर जिल्लाका लुभु, लामाटारका आफन्तलाई बोलाएर खोप लगाएको थाहा पायौ, यस्तो विभेदको अन्त्य हुनुपर्छ ।

वडाध्यक्ष सानुकाजी कायस्थले खोपमा अनियमितता भएको आफूले पनि जानकारी पाएको बताउनुभयो । केही जनप्रतिनिधि, स्वास्थ्यकर्मी र रेडक्रसकर्मीलेसमेत आफन्त र बाहिरका मानिसलाई बोलाएर खोप लगाएको पाइएको बताउँदै वडाले त्यस्ता व्यक्तिलाई आगामी दिनमा खोप केन्द्रमै नराख्ने बताउनुभयो ।

यता चाँगुनारायण नगरपालिका नगरकोट स्वास्थ्य केन्द्र, तेलकोट स्वास्थ्य केन्द्र, बागेश्वरी स्वास्थ्य केन्द्रमा १८ वर्ष उमेर नपुगेकालाई समेत खोप लगाएको पाइएको छ । राजनीतिक दलको पहुँच भएकाले एकै घरका १८ वर्षदेखि ६७ वर्षसम्मका आठ जनाले एकै दिन खोप लगाएको बताउँदै स्थानीय कर्साङ वाइबाले खोपमा मनोमानी भएको बताउनुभयो । पहुँच भएकाले १८ वर्ष नपुग्दै खोप पाउने पहुँच नहुने, अपाङ्गता भएका र जेष्ठ नागरिकले भने उमेर समूहमा हुँदा पनि खोप नपाउने बताउनुभयो ।

चाँगुनारायण नगरपालिकाका उपप्रमुख विना बास्तोलाले खोपमा मनोमानी भएको गुनासो आएपछि नगरपालिका मातहतको स्वास्थ कार्यालयलाई विभेद नगरी खोप लगाउन निर्देशन दिएको बताउनुभयो ।

सूर्यविनायक नगरपालिकाका उपप्रमुख जुना बस्नेतले खोप नियम पूर्वक नभई पहुँचवालाको मनोमानी बढेको गुनासो नगरपालिकामा आएको स्वीकार्नु भयो ।

यता मध्यपुरथिमि नगरपालिकाका प्रमुख मदनसुन्दर श्रेष्ठले खोपमा पहुँचवालाले जथाभावी गरेको दबाब दिएको गुनासो आएकाले स्वयंसेवक परिचालन गरेको बताउनुभयो ।

जिल्ला स्वास्थ्य कार्यालय भक्तपुरका कृष्णप्रसाद मिजारले जिल्लाका चार ओटै नगरपालिकालाई कार्यालयले दामासाहीले खोप उपलब्ध गराएको बताउनुभयो । खोपमा अनियमितता भएको, स्वास्थ्यकर्मीले घरमै खोप लगेर आफन्तलाई लगाउने गरेको, नेताले दबाब दिने गुनासो भने आएको बताउनुभयो ।

सरकारले खोप पर्याप्त व्यवस्था गर्न नसक्दा समस्या आएको उहाँको भनाइ छ । जिल्लाका अधिकांश खोप केन्द्रमा खोपमा मनोमानी भएको पाइएको छ ।


रमेश गिरी