समाचारहरू

खोटाङ र कैलाली जिल्ला सुरक्षा समितिले स्थानीय तहको दोस्रो चरणको निर्वाचनलाई मध्यनजर गर्दै सुरक्षा सम्वेदनशील मतदान केन्द्र पहिचान गरी सोही अनुसार सुरक्षा व्यवस्था मिलाएको जनाएका छन् ।

इन्सेक खोटाङ जिल्ला प्रतिनिधि सुनिता मगरका अनुसार खोटाङमा स्थानीय तहको निर्वाचनका लागि १ सय ३६ मतदान स्थलमा कुल १ सय ७३ मतदान केन्द्र रहेका छन् । दुई नगरपालिका र आठ गाउँपालिका गरी १० ओटा स्थानीय तह रहेको खोटाङ जिल्लामा १ लाख १५ हजार ६ सय ४४ जना  मतदाता रहेको जिल्ला निर्वाचन अधिकारी दिनेश खत्रीले जानकारी दिए ।

एक गाउँपालिका अति सम्वेदनशील, चार ओटा गाउँपालिका र एउटा नगरपालिका सम्वेदनशील तथा चार ओटा गाउँपालिका सामान्य रहेको विश्लेषण गरी सोही अनुसारको सुरक्षा प्रबन्ध मिलाइएको जिल्ला प्रहरी कार्यालयका डिएसपी नविनकिशोर प्रधानले बताए ।

विगतका घटना क्रम, अपराधिक क्षेत्र र भौगोलिक क्षेत्रलाई आधार मानेर तीन भागमा विभाजन गरी सुरक्षा व्यवस्ता चुस्तदुरुस्त बनाइएको प्रमुख जिल्ला अधिकारी प्रल्हाद पोखरेलले बताए ।

इन्सेक कैलाली जिल्ला प्रतिनिधि रुविना चौधरीका अनुसार कैलाली जिल्लामा स्थानीय तहको निर्वाचनका लागि २ सय ३१ मतदान स्थल र ४ सय ९० मतदान केन्द्र रहेका छन् । सुरक्षाको दृष्टिकोणबाट मतदान स्थललाई तीन भागमा वर्गीकरण गरिएको छ ।

२ सय ३१ ओटा मतदान स्थल मध्ये ८६ मतदान स्थल अति सम्वदेनशील, ८३ ओटा सम्वेदनशील र ६२ ओटा मतदान स्थल सामान्य रहेको र सोही सम्वेदनशीलता अनुसार सुरक्षा अवस्था बलियो बनाउनका लागि आवश्यक मात्रमा सुरक्षाकर्मी परिचालन गरिएको जिल्ला प्रहरी कार्यालय कैलालीका डिएसपी बीरबहादुर बुढामगरले बताए ।

एक उपमहानगरपालिका, ६ ओटा नगरपालिका र ६ ओटा गाउँपालिका गरी १३ ओटा स्थानीय तह रहेको कैलाली जिल्लामा ४ लाख ३ हजार २ सय ८० जना मतदाता रहेको जिल्ला निर्वाचन कार्यालयका सूचना अधिकारी प्रेम भट्टले जानकारी दिए ।

अनलाइन डेस्क