खुकुरी प्रहार गरी ज्येष्ठ नागरिकको हत्या

  ०७९ चैत १४ गते

गोकुलगंगा गाउँपालिका–४ बेतालीको लिसेखानी बस्ने ८२ वर्षीय शमशेरबहादुर थापा मगरलाई ०७९ चैत १३ गते अज्ञात समूहले खुकुरी प्रहार गरी हत्या गरेका छन् ।

आफ्नै घरमा बसिरहेको अवस्थामा थापामगरमाथि खुकुरी प्रहार भएको हो । खुकुरी प्रहारबाट घाइते भएका थापामगरलाई उपचारका लागि मन्थली ल्याउने क्रममा बाटोमै ज्यान गएको गोकुलगंगा गाउँपालिका–४ वडाध्यक्ष रामचन्द्र बस्नेतले जानकारी दिनुभयो । उहाँका अनुसार खुकुरी प्रहारबाट थापामगरको दाहिने हातको औँला छिनेको तथा टाउकोको पछाडिको भागमा गम्भीर चोट लागेको थियो ।

थापामगरको पत्नी बिरामी भएर उपचारको लागि काठमाडौँ जानुभएको थियो । उहाँसँगै घरमा रहेकी छोरी समेत घर बाहिर गएको बेला थापामगरमाथि आक्रमण भएको थियो ।

घटनापछि पाखाको जङ्गलमा दुई तीन ओटा टर्च बलेको देखिएको स्थानीय विनोद फुयाँलले बताउनु भयो ।

शवको पोष्टमार्टम प्राथमिक स्वास्थ्य केन्द्र मन्थलीमा चैत १४ गते गरिएको छ ।

घटनाको विषयमा थप अनुसन्धान भइरहेको रामेछापका इन्स्पेक्टर रञ्जन गिरीले जानकारी दिनुभयो ।

यसअघि पनि सो वडामा ७६ वर्षीया पदमकुमारी खड्काको घर भित्रै आधा शरीर जलेको अवस्थामा शव फेला परेको थियो । सो घटनाका दोषी समेत फेला परेका छैनन् । गाउँमा लगातार हत्याका घटना भएपछि गाउँमा त्रास फैलिएको स्थानीय विनोद फुयाँले बताउनु भयो ।


नवराज पथिक