समाचारहरू

मलंगवा नगरपालिका–४ शिवसागर चोकस्थित सर्लाही क्याम्पसमा अखिल नेपाल राष्ट्रिय स्वतन्त्र विद्यार्थी युनियन (अनेरास्ववियु) र नेविसङ्घका कार्यकर्ताबिच भदौ ३० गते चुनावको विषयमा विवाद भई झडप हुँदा नेविसङ्घका कार्यकर्ताको खुकुरी प्रहारबाट तीन जना अनेरास्ववियुका कार्यकर्ता घाइते भएका छन् ।

नेविसङ्घ पक्षका कार्यकर्ताहरूले धारिलो हतियार प्रहार गर्दा अनेरास्ववियुका जिल्ला कोषाध्यक्ष २४ वर्षीय रञ्जित महतो, जिल्ला सदस्य २३ वर्षीय अरविन्दकुमार यादव र पुर्व जिल्ला अध्यक्ष सञ्जिपकुमार यादव घाइते हुनु भएको छ ।

सर्लाही क्याम्पसमा बिहान ८ बजे प्रिन्सीपलको कार्य कक्षमा चुनावको बारेमा छलफल हुँदै गर्दा प्रिन्सिपलको इसारामा नेविसङ्घका कार्यकर्ताहरुले खुकुरी प्रहार गरी घाइते बनाएको अनेरास्ववियुका जिल्ला कोषाध्यक्ष २४ वर्षीय रञ्जितकुमार महतोले जानकारी दिनु भयो ।

घाइते भएको जिल्ला कोषाध्यक्ष रञ्जित कुमार महतोलाई दाहिने हातको पाखुरामा खुकुरी प्रहार गरिएकोमा १४ ओटा टाँका परेको र अर्का घाइते जिल्ला सदस्य अरविन्दकुमार यादवलाई खुकुरी प्रहार गरि छातिको बाँयातर्फमा चोट लागेको र टाउकोमा चोट लागी टाउको भित्र एक इन्च काटिँदा १० ओटा टाँका लागेको र जिल्ला पुर्व अध्यक्ष सञ्जिपकुमार यादवलाई खुकुरी प्रहार गरी टाउकोको पछाडि पट्टी चार ओटा टाका लागेको पीडित अरविन्दकुमार यादवको दाजु ३३ वर्षीय मनोजकुमार यादवले बताउनु भएको छ ।

जिल्ला अस्पताल मलङ्गवामा उपचार गराइ रहेका घाइतेमध्ये अरविन्दकुमार यादव र रञ्जितकुमार महतोलाई थप उपचारका लागि बीरगंजस्थित एलएक्स न्यूरो अस्पताल लगी आइसियूमा राखेर उपचार गरिरहेको मनोजकुमार यादवले जानकारी दिनु भयो ।

सर्लाही क्याम्पसभित्र कक्षा सञ्चालनको समयमा दुई पक्षबिच विवाद भई झडप भएको क्याम्पसका प्रमुख राजेश यादवले जानकारी दिनु भयो ।

घाइतेहरुको उपचार भइरहेको र अनेरास्ववियुका कोषाध्यक्ष रञ्जितकुमार महतोको BR 30 W 3831 नम्बरको मोटरसाइकल नियन्त्रणमा लिएर घटनाको थप अनुसन्धान भइरहेको जिल्ला प्रहरी कार्यालयका डिएसपी विजय यादवले जानकारी दिनु भयो ।

बुधन साह