समाचारहरू

खार्पुनाथ गाउँपालिका–३ को राया गाउँमा ठेउला रोगका लक्षणसँग मिल्ने रोग देखा परेको छ । यहाँका करिब २५ जना बालबालिकाको शरीरमा फोका उठ्ने र पाक्ने जस्ता लक्षण देखिएको हो ।

ठेउला रोगसँग मिल्दोजुल्दो रोगका बिरामी देखा परेपनि स्थानीय स्वास्थ्यचौकीमा रोग नियन्त्रणको कुनै व्यवस्था नभएको स्थानीय सुर्य बुढाले गुनासो गर्नु भएको छ ।

स्थानीय बुढाका अनुसार तीन वर्षदेखि १६ वर्षसम्मका करिब २५ जना बालबालिकालाई उक्त लक्षण देखापरेको हो ।

दैनिक पाँच जना बालबालिकालाई उक्त लक्षण देखा परेको भएपनि राया स्वास्थ्यचौकीमा उपचारको कुनै व्यवस्था नभएको बुढाको आरोप छ ।

बुढाका अनुसार हुम्ला मावि रायामा पठनपाठन गर्ने विद्यार्थीहरुलाई उक्त रोगले छोएको विद्यालयका प्रधानाध्यापक विपी रावलले बताउनु भयो ।

गाउँमा सो रोग फैलिएको भएपनि उपचारका लागि स्वास्थ्य संस्थामा उक्त रोगको औषधि नभएको हुम्ला मविका प्रधानाध्यापक रावलले गुनासो गर्नु भयो ।

जुनसुकै उमेरका व्यक्तिहरुलाई पनि सङ्क्रमण हुन सक्ने एक खालको सरुवा रोग भएको राया स्वास्थ्य चौकीका स्वास्थ्य इन्चार्ज विरसिंह रावलले जानकारी दिनु भयो । राया गाउँमा यतिखेर उक्त रोगका बिरामी देखा परेको रावलले बताउनु भयो ।

उहाँले भन्नु भयो-'उक्त रोग बढ्न नदिनका लागि पहिले त सम्बन्धित बिरामी नै सजग रहनु पर्छ । सँगै सुत्ने, खाने जस्ता कार्य गर्नु हुँदैन ।'

हाल स्वाथ्यचौकीमा आएका बिरामीहरूलाई उक्त रोगबाट केही कम गराउनका लागि आफुले इन्टिबायोटिक औषधि दिएर पठाउने गरेका छौँ । तर, सो रोगलाई पुरै नियन्त्रणमा लिने औषधि भने स्वास्थ्य संस्थामा नभएको प्रतिकृया दिनु भएको छ ।

 

नन्द सिंह