समाचारहरू

पानी सङ्कलन गर्ने ट्याङ्की पर्याप्त नहुँदा जिल्ला कारागार स्याङ्जामा खानेपानीको समस्या भएको छ । ५० जना क्षमताको कारागारमा अहिले सात महिलासहित १ सय २४ कैदीबन्दी रहेका भएपनि पानी सङ्कलन गर्ने भाँडा नहुँदा खानेपानीको समस्या भएको हो ।

ट्याङ्की पर्याप्त नभएपछि सङ्कलन गरिएको पानी पर्याप्त नहुने गरेको निमित्त कारागार प्रमुख बुद्धिप्रसाद शर्माले बताए । उनले भने-'पानी धारामा आउँदा भएका ट्याङकीमा पानी भर्ने गरिन्छ तर त्यसले पुग्दैन ।' शर्माले कारागारमा क्षमता भन्दा बढी कैदीबन्दी भएकाले पानीको पनि खपत बढी हुने भएको तर खानेपानीको ट्याङ्कीका लागि कतैबाट सहयोग नपाएको गुनासो गरे ।

विगत सात वर्षदेखि जीवन बिताउँदै आएका कृष्णखर शर्माले आफूहरूले पानीको समस्या धेरै भोग्नु परेको बताए । शर्माले कारागार भित्र पुस्तकालय भए पनि आवश्यक पुस्तक नभएको भन्दै साँघुरो ठाउँको बसाई र कोठा भित्र दाउराले खाना पकाउँदा जम्मा हुने धुवाँका कारण समस्या हुने गरेको बताए ।

जिल्ला कारागारमा विगत नौ वर्षदेखि बन्दी जीवन बिताएकी टुकमाया गुरुङ पानी प्रयोग गर्ने सम्बन्धमा कहिलेकहीँ कैदी बन्दीबीच मनमुटाव हुने गरेको बताउँछिन् ।

कारागारको समस्याको बारेमा पुतलीबजार नगरपालिकाकी मेयर सिमा क्षेत्रीलाई जानकारी गराउँदा कारागारमा रहेको खानेपानीको समस्या समाधानको लागि आफूले चाँडै आवश्यक पहल गर्ने प्रतिबद्धता व्यक्त गरिन् ।

हिमलाल पराजुली