समाचारहरू

पलता गाउँपालिकाको धौलागोह गाउँलगायतका स्थानमा खानेपानीको चरम अभाव भएको छ । खानेपानीको अभाव भएपछि धौलागोह गाउँका स्थानीयबासी दुई घण्टा पैदल हिँडेर पानी भर्न जाने गरेको स्थानीयबासी सुमन बमले गुनासो गरे ।

खानेपानीको क्षेत्रमा काम गर्ने निकायको लापरबाहीका कारण ग्रामीण क्षेत्रमा खानेपानीको अभाव भएको स्थानीयबासी बमले आरोप लगाए ।

जिल्लामा खानेपानी प्रमुख समस्याका रूपमा रहेको नरहरीनाथ गाउँपालिका-४ का धनबहादुर बिष्टले बताए । 'जिल्लामा एक दर्जन भन्दा धेरै गैरसरकारी संस्था र सरकारी कार्यालय भएपनि नरहरीनाथ गाउँपालिका र पलाता गाउँपालिकामा खानेपानीको ठूलो समस्या रहेको छ ।'-उनले भने-'गाउँमा पिउने पानी छैन । स्वास्थ्य संस्थामा उस्तै हालत छ ।'

नरहरीनाथ गाउँपालिकोको कोटबाडा स्वास्थ्य चौकीमा बिग्रिएको धारा छ । बिरामी र स्वास्थ्यकर्मीलाई पानी चाहियो भने गाउँमा गएर ल्याउनु पर्ने अवस्था रहेको बिष्टले बताए । 'सरसफाइको कुराभन्दा पनि पिउने पानी नै घरबाट बोकेर ल्याउनु पर्ने बाध्यता रहेको छ ।'-उनले भने ।

सान्नी त्रिवेणी गाउँपालिकाको रकुमा रित्ता धारा छन् । पानीको निकै अभाव छ । साविकको रकु गाविस-३ र ४ वडाका ८० घरधुरीका स्थानीयवासीले खानेपानीको अभाव झेल्नु परेको छ । दलित समुदाय भएको यो गाउँमा पानीको हाहाकार भएको स्थानीय शिक्षक लालबहादुर गिरीले बताए 'गाउँमा पिउने पानीको चरम अभाव छ ।'-उनले भने-'विद्यालयमा बालबालिकाले पिउने पानी पाएका छैनन् ।'

पलाता गाउँपालिकाको धौलागोह र खिन गाउँमा पनि पानीको निकै अभाव छ । वनजङ्गल नभएको सुख्खा क्षेत्र भएकाले पानीको अभाव हुने गरेको हो । विगत लामो समयदेखि यहाँका स्थानीयले पानीको अभाव झेल्दै आएको स्थानीय समाजसेवी सुमन बमले बताए । 'पलाता गाउँपालिकामा पानीको सधैँ अभाव हुने गरेको छ ।'-उनले भने-'पानीका लागि रातभर हिँडेर कर्णाली नदीको पानी लिन जानुपर्ने अवस्था छ ।'

जिल्लाको खानेपानीको अवस्थालाई सहज गरी ग्रामीण क्षेत्रमा पहुँच पुर्‍याउन आफू प्रतिबद्ध रहेको खानेपानी सरसफाई तथा सव डिभिजन कार्यालयका प्रमुख कुलप्रसाद पौडेलले बताए । 'पानी अभाव नहुने गरी योजना बन्दै छ । हाल सबै ठाउँमा पानीको अभाव भएको छैन । केही गाउँमा मात्र पानीको समस्या देखिएको हो ।'-उनले भने  ।

गाउँभन्दा पनि सदरमुकाममा पानीको समस्या बढी देखिएको मान्मका स्थानीयबासीले बताए । कालिकोटमा ८० प्रतिशत खानेपानीको पुहँच पुगेको जिल्ला खानेपानी तथा सरसफाई स्वच्छता समन्वय समितिले तथ्याङ्कमा देखाएको छ । जिल्लालाई खुला दिशामुक्त घोषणा गरिए पनि अहिलेसम्म पानीको अभावले सदरमुकामका सार्वजनिक शौचालय प्रयोगमा ल्याउन सकिएको छैन ।

कालीबहादुर मल्ल