समाचारहरू

भूमिकास्थान नगरपालिका– ७ कमलपोखरी, ओर्खेपाटा, पानडाँडा, घोराखोरी, मनवाङ र सलिनधाराका स्थानीयवासीहरू खानेपानीको अभावले गर्दा समस्यामा परेका छन् ।

उक्त क्षेत्रमा एक धाराबाट २३ घरपरिवारले पानी उपभोग गर्छन् । प्रति परिवारले दुई भाँडा पानी भर्दा पानी सुक्ने भएकाले पधेराबाट पानी लिन जान एक घण्टाको दुरीमा जानु पर्ने बाध्यता रहेको छ ।

खानेपानीका लागि प्रत्येक घरले वर्षमा तीन सय रूपियाँका दरले रकम उठाए पनि तर सधै पानीको अभाव भएको स्थानीय महिलाहरू गुनासो गर्नु हुन्छ ।

स्थानीय महिला टुकीकला घर्तीले धारामा प्रसस्त पानी नआएपछि दिउँसोको घाम, रातको समय नभनेर पंधेराको पानी लिन जानु पर्ने बाध्यता रहेको बताउनु भयो ।

नुवाकोट सिमल्दी– पानडाँडा घोराखोरी खानेपानी व्यवस्थापन उपभोक्ता समितिका अध्यक्ष लेकबहादुर रायमाझीले खानेपानीलाई भनेर छुट्याएको बजेट शीर्षक बदलेर नगरले खेल मैदान निर्माण गर्न लगाएको बताउनु भयो ।

भुमिकास्थान नगरपालिकाका प्रमुख झबि थापाले पानडाँडा खानेपानी व्यवस्थापनको बजेट त्यहाँको उपभोक्ता समितिले काम नगरेपछि खेल मैदानमा लगाएको बताउनु भयो । खानेपानीको अवस्था अध्ययन अनुगमन गरेर छिट्टै समाधान गर्न पहल गर्ने थापाले बताउनु भयो ।

 

कूलबहादुर नेपाली