खानेपानीको अभावमा भएको स्थानीयहरूको गुनासो

  ०७९ माघ १३

शितगंगा नगरपालिका–३ र ४ का विभिन्न टोलमा खानेपानीको अभाव भएको स्थानीयले गुनासो गरेका छन् ।

उक्त वडाका टोलहरूमा पानी संकलन र बितरणमा व्यस्थापन गर्न नसक्दा दिनमा एक घण्टा पनि सार्बजनिक धारामा पानी नआए पछि खानेपानीको अभाव भएको हो ।

शितगंगा नगरपालिकाको–३ खर्सका र दह बजार क्षेत्र, वडा नं.४ अमराई उपल्लो बजार, जैनिकोट, गोरथुम, कोप्चिबास, भेडामारा, जसराम र चाक्ला बजारमा २५ वर्ष अगाडी निर्माण भएका पाइप टुटफुट भएका कारण खानेपानी धारासम्म नपुगेको हो ।

बिहान ६ देखि ७ बजेसम्म सार्बजनिक एक धारामा ३५ घरले खानेपानी थाप्नु पर्छ तर दिनमा एक घण्टा पनि पानी आउँदैन । सबैलाई खानेपानी पुग्दैन, झै झगडा हुन्छ, चाक्ला बजार खानेपानी उपभोक्ता  सरस्वती पौडेल घिमिरे बताउनु भयो ।

उपभोक्ता पुष्पा केसीले— खानेपानीका लागि थप ट्याङ्की निर्माण र धारा र पाइप निर्माण गरी मीटर जडान गरेर व्यवस्थापन गर्ने हो भने समस्या समाधान हुने बताउनु भयो ।

शितगंगा नगरपालिका –४ का वडाध्यक्ष दामोदर अधिकारीले खानेपानीको समस्या भए पनि समाजिक सञ्जालमा आए जस्तो खासै समस्या नरहेको बताउनु भयो । अधिकारीले खानेपानीको ठुलो योजनाका लागि प्रदेश र केन्द्रमा पनि प्रयास भएको बताउनु भयो ।

जिल्ला खानेपानी तथा सरसफाई डिभिजन कार्यालय सन्धिखर्कका प्राविधिक राम प्रसाद पोख्ररेलले— गौरीकुण्ड चाक्ला लिफ्ट खानेपानी योजना निर्माणको काम सम्पन्न भएको बताउनु भयो । उनका अनुसार व्यवस्थापन पक्षका काम बाँकी छन्, त्यो स्थानीयको जिम्मेवारी हो ।


कूलबहादुर नेपाली