खाद्यवस्तुमा मिसावट गरी उपभोक्तालाई ठगेको कसुरमा नौ जनालाई कारबाही

 

घिउमा डाल्डा घिउ र सनफ्लावर तेल मिसावट गरी उपभोक्तालाई ठगी गरेको कसुरमा नौ जनालाई जनही २५ दिन कैद तथा २१/२१ हजार रुपियाँ जरिबाना गरिएको छ ।

तिहारको समयमा घोराहीको एक होटेलमा घिउमा डाल्डा घिउ र सनफ्लावर तेल मिसावट गरी उपभोक्ता ठगी गरेको आरोपमा रौतहट खेसरैराका ३६ वर्षीय गणेश साह, भारत सितामडी जिल्लाका ३० वर्षीय राजु राय, ३५ वर्षीय लालजी साह, ४५ वर्षीय पवन राय, ५० वर्षीय धनीसर सहनी, ४२ वर्षीय ललन साह, ४२ वर्षीय सुरेश साह, ३६ वर्षीय गणेश साह र ४५ वर्षीय भिखारी रायलाई जिल्ला प्रशासन कार्यालयले २५ दिन कैद र जनही २१/२१ हजार रुपियाँ जरिबाना गरेको प्रमुख जिल्ला अधिकारी दीपक काफ्लेले बताए । २५ दिन भन्दा बढी समय हिरासतमा राखिएकाले नौ जनालाई जरिबाना लिएर छोडिएको जिल्ला प्रशासन कार्यालयले जनाएको छ ।

उनीहरूलाई कालोबजारी गरेको ठहर गर्दै प्रमुख जिल्ला अधिकारी काफ्लेले मङ्सिर १ गते जरिबाना गर्ने निर्णय गरेका हुन् । गत कात्तिक ५ गते १ लाख ५८ हजार ७ सय ५ रुपियाँ नेपाली र ६ हजार ४ सय १० रुपियाँ भारतीय रुपियाँसहित नौ जनालाई जिल्ला प्रहरी कार्यालयले गिरफ्तार गरी जिल्ला प्रशासन कार्यालयमा बुझाएको थियो ।

यसैबिच मङ्सिर १ गते नै डाल्डा घिउ मिसावट गरिएको १५ लिटरका १५ थान, एक किलोका तीन सय ४० थान घिउका बट्टा, ५० थान खाली ग्यालिन जलाएर नष्ट गरिएको छ । जिल्ला प्रशासन कार्यालय, जिल्ला सरकारी वकिल कार्यालय, कोष तथा लेखा नियन्त्रण कार्यालय, जिल्ला प्रहरी कार्यालय, घोराही नगरपालिकाका प्रतिनिधि र पत्रकारहरूको रोहवरमा उक्त सामाग्रीहरू नष्ट गरिएको हो ।


जे.एन.सागर