क्षयरोगबाट ६ महिनामा सात जनाको मृत्यु, १ सय ५७ जना बिरामी

  ०८० फागुन ३० गते

क्षयरोगको कारणबाट तनहुँ जिल्लामा ०८० साउन महिनादेखि पुष महिनासम्म ६ महिनाको अवधिमा सात जनाको मृत्यु भएको छ ।

मृत्यु हुनेहरूमा व्यास नगरपालिकामा तीन जना, भानु नगरपालिकामा एक जना, बन्दीपुर गाउँपालिकामा एक जना, देवघाट गाउँपालिकामा एक जना र भिमाद नगरपालिकामा एक जना रहेको स्वास्थ्य कार्यालय तनहुँले जनाएको छ ।

क्षयरोगको संक्रमित मध्ये पनि व्यास नगरपालिकामा सबैभन्दा धेरै ५६ जना रहेका छन् । त्यसपछि क्रमशः भानु नगरपालिकामा २० जना, शुक्लागण्डकी नगरपालिकामा २० जना, भिमाद नगरपालिकामा १३ जना, देवघाट गाउँपालिकामा १३ जना, आँबुखैरेनी गाउँपालिकामा १२ जना, घिरिङ गाउँपालिकामा सात जना, बन्दीपुर गाउँपालिकामा सात जना, म्याग्दे गाउँपालिकामा ६ जना र रिसिङ गाउँपालिकामा तीन जना गरी जम्मा तनहुँ जिल्लामा १ सय ५७ जना बिरामी रहेको स्वास्थ्य कार्यालयका क्षयरोग सम्बन्धि फोकल पर्सन सुदिप कडेंलले जानकारी दिनुभयो ।

क्षयरोगको नियन्त्रणको लागि जिल्लाका सबै सरकारी स्वास्थ्य संस्थामा निशुल्क औषधीको कार्यक्रम सञ्चालन भइरहेको कडेंलले बताउनु भयो । नियमित खोकी लाग्नु, रुघाखोकी हुनु, खकारमा रगत देखा पर्नु, साँझपख ज्वरो आउनु, राति सुतेको बेलामा पसिना आउनु, तौल घट्दै जानु, खाना नरुच्नु क्षयरोगीमा देखिने लक्षण भएको कंडेलले बताउनु भयो ।

क्षयरोग एक व्यक्तिबाट अर्को व्यक्तिमा श्वासप्रश्वासको माध्यमबाट सर्ने गर्छ । दुई हप्ताभन्दा बढी लगातार खोकी लागिरहेमा भने खकार जाँच गरेर क्षयरोग हो कि होइन भन्ने थाहा पाउन सकिन्छ । क्षयरोग लागेको व्यक्तिले नियमित औषधी सेवन गरेमा यसबाट बच्न सकिने कडेंलले बताउनु भयो ।

क्षयरोगको निदान औषधीबाटै हुने यसमा बिरामीले लामो समयसम्म औषधी खानुपर्ने हुन्छ र यसको औषधी देशभरका स्वास्थ्य केन्द्रमा निःशुल्क पाइने कडेंलले बताउनु भयो ।


प्रकाशचन्द्र भट्टराई