समाचारहरू

जिल्ला कारागार शाखा दोलखामा क्षमता भन्दा दोब्बर कैदी बन्दी राखिए पछि यहाँ रहको कैदी तथा बन्दीहरूलाई स्वास्थ्य समस्या देखिन थालेको छ ।

जिल्ला सदरमुकाम चरिकोटमा रहेको कारागारको क्षमता ५१ जनाको भए पनि हाल कारागारमा कैदी र थुनुवा गरी १ सय ३४ जना राखिएपछि खानेपानीको अभाव छ भने शौचालयको समेत समस्या हुने गरेको छ ।

हाल कारागारमा ८७ जना कैदी र ४६ थुनुवा गरी १ सय ३४ जना कैदीबन्दी रहेको निमित्त जेलर पदरमबहादुर के.सी.ले जानकारी दिनु भयो ।

उहाँले क्षमता भन्दा बढी बन्दी हुनु र पानीको अभावले वर्षायाम सुरु भएसँगै छाला तथा पेटका बिरामी बढेको बताउनु भयो ।

क्षमता भन्दा बढी कैदी तथा बन्दी राख्नुपर्दा वर्षा लागेसँगै बन्दीहरूमा स्वास्थ्य समस्या देखिनुका साथै शौचालय जान, नुहाउन र सुत्न समेत कठिनाई खेप्नु परेको कारागारमा रहेका कैदी अशोक केसीले बताउनु भयो ।

कारागारका स्वास्थ्यकर्मी चन्द्रबहादुर खड्काले पहिले भन्दा बिरामीको सङ्ख्या दैनिक दुई चार जना बढेको र महिनामा १० जनालाई जिल्ला बाहिर उपचार गर्न पठाउनु परेको बताउनु भयो ।

क्षमता भन्दा बढी कैदी बन्दी थुप्रिएर अहिले कारागारमा खान, बस्न, सत्न तथा सरसफाईमा मात्र हैन छाला, स्वासप्रस्वास तथा एलर्जिका बिरामी हुने स्वास्थ्य समस्या देखिएको स्वास्थ्यकर्मी खड्काको भनाई रहेकोछ ।

जिल्ला कारागार शाखा दोलखामा पुरुष कैदी बन्दी मात्र राखिन्छ । महिलालाई भने छिमिकी जिल्ला रामेछाप वा अन्य कारागार पठाउने गरिएको छ । हाल कारागारमा ६० वर्ष नाघेका ३ जना बन्दीहरू रहेका छन् ।

कारागारमा बन्दीहरूको नियमित स्वास्थ्य परिक्षण हुने गरेको छ भने आफन्तसँग भेटघाटको लागि उति प्रबन्ध गरिएको जेलर के.सी.ले जानकारी दिनु भयो ।

उहाँले खेलकुद र अध्ययनका लागि पुस्तकालयको व्यवस्था कारागार प्रशासनले गरेको जानकारी दिनु भयो ।

उद्धव पोखरेल