क्षमताभन्दा बढी सङ्ख्या हुँदा भान्सामा सुत्छन् कैदीबन्दी

  ०७५ वैशाख २१ गते

२५ जना कैदीबन्दी राख्ने क्षमता रहेको 'घ' श्रेणीको जिल्ला कारागार बागलुङमा क्षमताभन्दा चारगुणा बढी कैदीबन्दीहरू रहेका छन् ।

१८ जना पुरूष र सात जना महिला कैदीबन्दीको क्षमता भएको जिल्ला कारागार बागलुङमा अहिले १० जना महिला र ७८ जना पुरूष गरि ८८ जना कैदीबन्दीहरू रहेको कारागारका निमित्त कार्यालय प्रमुख दिपक शर्माले बताए ।

क्षमताभन्दा बढी कैदीबन्दी हुँदा सुत्ने स्थानको अभावमा भान्सामा ओछ्यान लगाउनुपर्ने बाध्यता रहेको निमित्त प्रमुख शर्मा बताउँछन् ।

शर्माका अनुसार पानी परेको समयमा भान्साकै ओछ्यान पनि ओभानो नहुँदा कैदीबन्दी पालो पर्खिएर सुत्नुपर्छ । जिल्ला कारागारलाई अञ्चल कारागारको रूपमा विकास गरिनुपर्ने माग हुँदै आएको भएपनि अञ्चलमै कुनै विकल्प नभएको हुँदा कैदीबन्दीलाई जसोतसो राख्नैपर्ने बाध्यता भएको शर्माले बताए ।

साँघुरो ठाउँमा क्षमताभन्दा बढी कैदीबन्दीहरू बस्नु पर्दा खाने र सुत्ने समस्यामात्र नभएर पछिल्लो समयमा श्वासप्रश्वास् एवम् दाद र चिलाउने रोगजस्तो छालामा समस्या समेत रहेको जिल्ला कारागार बागलुङका हेल्थ असिष्टेण्ट आशिष सापकोटाले बताए ।

'२५ जनाको क्षमता भएको हुनाले औषधि उपचार खर्च पनि २५ जनालाई मात्र आउँछ ।'-सापकोटाले भने-'अधिकांश कैदीबन्दीहरूले बाहिरबाटै औषधि किनेर खाने गरेका छन् ।'

कारागारमा सधैँ पिउने पानीको अभाव हुने गरेको र पानीका कारण पनि स्वास्थ्यमा समस्या देखिने गरेको कैदिबन्दीका नाइके सुर्य नेपालीले बताए ।


सिर्जना पन्त