क्षमताभन्दा बढी बालबन्दी राख्दा बालकहरूमा छालारोगको समस्या

  ०८१ वैशाख ४ गते

डुडुवा गाउँपालिका-६ स्थित जयेन्दु बालसुधार गृहमा क्षमताभन्दा बढी बालबन्दी राख्दा बालकहरूमा छालारोगको समस्या भएको छ । बालसुधार गृहका प्रमुख विमला काउचा मगरका अनुसार बालसुधार गृहमा १ सय ९० जना क्षमता भएको बालसुधार गृहमा हाल २ सय ४८ जना बालकहरू राखिएको छ । क्षमताभन्दा बढी बालबन्दी राखिएको कारण बालकहरूमा छालारोगको समस्या भएको हो ।

बालकहरूलाई सुत्न र खाने समस्या नभएको तर स्वास्थ्यमा समस्या हुने गरेको उहाँले बताउनु भयो । जयेन्दु बालसुधार गृहमा दुई ओटा भवन रहे तापनि एउटा हाल नयाँ भवनमा मात्रै कानुनी विवाद रहेकोले बालकहरूलाई राखिएको र ती भवनमा सानो ठूला गरेर आठ कोठामा रहेका हल टाइप भएका कोठामा २४ देखि ८० जनालाई राखिएको बालसुधार गृहका प्रमुख मगरले बताउनु भयो ।

बालसुधार गृहमा जबर्जस्ती करणी मुद्दामा १ सय ४३ जना, कर्तब्य ज्यानमा ३९ जना, चोरीमा ३६ जना , लागु औषधमा १३ जना, सवारी ज्यानमा आठ जना, कारागार ऐनसम्बन्धी कसुरमा चार जना, यौन दुर्व्यवहारमा तीन जना, बालबिज्याईमा एक जना, दुर्व्यवहारमा एक जना गरी जम्मा २ सय ४८ जना रहेका छन् ।

बालकहरू प्रेम सम्बन्धमा सहमतिमा करणी भएपछि परिवारले उजुरी दिने गरेको, उमेर नपुगी भागी विवाह गर्ने बालकहरूलाई बालिकाको अभिभावकले जाति, वर्ग, धनी, गरिब भनेर छुट्ट्याउने र चित्त नबुझेको अवस्थामा जबर्जस्ती करणी गरेको भन्दै मुद्दा दर्ता गर्ने गरेको बालकहरूको गुनासो छ ।

प्राथमिक स्तरका दुई जना शिक्षक रहेका भए तापनि ५ देखि कक्षा १२ सम्मको विद्यार्थी पढ्दै गरेको अवस्थामा छन् । विद्यालय दर्ता नभएकाले आधारभूत स्वास्थ्य अधिकारबाट समेत वञ्चित हुनु परेको छ । यसपटक ३१ जना विद्यार्थीले एसईई परीक्षा दिएको, २५ जनाले कक्षा १२ को परीक्षा दिने तयारीमा रहेको र कक्षा ८ सम्म बालकहरूलाई भोलिन्टियरली पढाउँदै गरेको प्रमुख मगरले इन्सेकलाई जानकारी दिनुभयो ।


ध्रुबराज शर्मा