समाचारहरू

जिल्ला कारागार शाखा, बैतडीमा क्षमता भन्दा बढी कैदीबन्दी हुँदा समस्या भएको छ । वर्षयामको समयमा छानो चुहिने कारण क्षमताभन्दा बढी राखिएका कैदीबन्दीले थप कष्ट व्यहोर्नुपरेको हो ।

२५ जना क्षमता रहेको जिल्ला कारागार, बैतडीमा अहिले तीन जना थुनुवा र ४१ कैदी गरी जम्मा ४४ जना रहेका छन् । दुई ओटा कोठा रहेको कारागारमा १५ पुरूष र १० महिला गरी २५ जनाको क्षमता भएको भएपनि क्षमता भन्दा करिव दोब्बर कैदी भएपछि सुत्नको लागि समस्या हुने गरेको कारागार प्रमुख अनिलकुमार तिवारीले जानकारी दिए । अहिले कारागारमा कैदी र बन्दीहरूमा पुरूषहरू मात्रै रहेकोसमेत तिवारीले बताए ।

क्षमताभन्दा बढी कैदीन्दी हुदाँ कोठामा कोचिएर सुत्नुपर्ने अवस्था रहेको बन्दी जिवन विताइरहेका जिवन साउदले बताए । 'कारागार जीर्ण अवस्थामा छ । पुरानो भवन चर्किएर जताततै चिरैचिरा देखिन्छन् । समान्य भूकम्पको धक्का लागे पनि भत्किने डर छ ।'-कैदी देवबहादुर पुनले दुखेसो पोखे ।

कारागारभित्र पुस्तकालय र खेलकुदलगायत अन्य सिपमूलक क्रियाकलाप नहुँदा दिन बिताउन समस्या हुने गरेको कैदी भवानीदत्त पाण्डेयले बताए ।

नरी बडु