क्षतिपूर्तिको माग गर्दै स्थानीयबासीद्वारा प्रदर्शन, प्रहरीद्वारा दुई सेल अश्रु ग्याँस प्रहार

  ०७४ वैशाख २९ गते

प्रहरी हिरासतमा आफन्तको ज्यान गएको घटनाको छानबिन र पीडित परिवारलाई क्षतिपूर्तिको माग गर्दै स्थानीयबासीले वैशाख २९ गते दिनभर प्रदर्शन गरेका छन् ।

आफन्तले इलाका प्रहरी कार्यालय भिङ्ग्रीमा ढुङ्गा हान्दा इलाका प्रहरी कार्यालयको झ्यालका सिसा फुटेको र प्रदर्शनकारीले हानेको ढुङ्गा लागेर अन्य चार जना प्रदर्शनकारी नै घाइते भएको प्रहरीले जनाएको छ ।

घाइते हुनेमा स्वर्गद्वारी नपा-५ का खविराज गिरी, अमृत राउत, नारायण राउत, देवी राउत रहेका छन् । घाइते मध्ये खविराजलाई थप उपचारका लागि कोहलपुर रिफर गरिएको छ भने अन्य घाइतेको प्राथमिक उपचार केन्द्र भिङ्ग्रीमा उपचार भइरहेको छ ।

प्रदर्शनकारीहरूले इलाका प्रहरी कार्यालय अघि भिङ्ग्रीमा प्रदर्शन गरेका थिए । प्रदर्शनलाई नियन्त्रणमा लिन प्रहरीले दुई सेल अश्रु ग्याँस प्रहार गरेको जनाएको छ । प्रदर्शनका कारण रोल्पा भित्रने र बाहिरिने सवारी भिङ्ग्रीमा रोकिएका छन् ।

मृतकका आफन्त र प्रहरी प्रशासनबिच समस्या समाधानका विषयमा छलफल चलिरहेको प्रमुख जिल्ला अधिकारी यदुनाथ पौडेलले बताए । स्वर्गद्वारी नपा-५ उपल्लो सारीका २९ वर्षीय भुपेन्द्र गिरीले ओड्नेओछ्याउने कपडाको पासो लगाई हिरासतमा ०७४ वैशाख २८ गते राति करिव २ बजे आत्महत्या गरेको प्रहरीले जनाएको छ ।

हिरासत भित्र रहेको शौचालयमा आत्महत्या गरेको जिल्ला प्रहरी कार्यालयका डिएसपी रञ्जित सिंह राठौरले बताए । शौच गर्न गएका उनी केही समय ढिलो गरेपछि अन्य व्यक्ति हेर्न जाँदा झुण्डिएको अवस्थामा फेला परेको उनले बताए ।

शौचालयको भेण्टिलेशनमा रहेको फलामको डण्डीमा कम्मल र तन्नाको डोरी बनाई झुण्डिएको अवस्थामा उनको लाश फेला परेको प्रहरीले जनाएको छ ।

मृतकले पत्नीलाई कुटपिट गरेको आरोपमा ०७४ वैशाख २८ गते प्रहरीले गिरफ्तार गरी हिरासतमा राखेको थियो ।


रविन्द्र पाण्डे