समाचारहरू

धौलागिरी बहुमूखी क्याम्पसमा निर्वाचनका लागि दर्ता भएको संयुक्त विद्यार्थी समूहले क्याम्पस प्रमुख रामप्रसाद उपाध्याय, व्यवस्थापन समितिका अध्यक्ष दिनबहादुर थापा र स्ववियु निर्वाचन अधिकृत भक्तिराम न्यौपानेलाई फागुन २९ गते साँझ कार्यकक्षमा थुनेर दुर्व्यवहार गरेको छ ।

तोकिएको मनोनयन तालिकामा प्रकृया नथालेको आरोप लगाउँदै सो समूहले क्याम्पस प्रमुख उपाध्याय, अध्यक्ष थापा र निर्वाचन अधिकृत न्यौपानेलाई थुनेको हो ।

सुजन सापकोटा संयोजक रहेको संयुक्त विद्यार्थी समूहले ताला लगाएको क्याम्पस प्रमुख रामप्रसाद उपाध्यायले इन्सेक प्रतिनिधिलाई टेलिफोनमा बताउनु भयो ।

फागुन २६ गते मनोनयन पत्र वितरण र फागुन २७ गते मनोनयन दर्ता गर्नुपर्नेमा अझैसम्म निर्वाचन समितिले म्याद थपेर काम नगरेको आरोप संयुक्त विद्यार्थी समूहको छ । सोही विषयमा छलफल चलिरहेको बेला विद्यार्थीले क्याम्पस प्रमुखको कार्यकक्षमा ताला लगाएका थिए ।

एक साताअघि अखिल क्रान्तिकारी सहितका केही विद्यार्थी सङ्गठनले सबै मतदाताको एकै प्रकारको परिचयपत्र बनाउनु पर्ने, फर्जी विद्यार्थी भर्ना भएकोमा मतदाता सूचीबाट हटाउनु पर्ने माग गरेर निर्वाचन कार्यालयमा ताला लगाएका थिए ।

‘केही विकल्पको विषयमा छलफल गरिरहेका थियौँ । त्यही बेलामा ताला लगाइयो । दबाब दिन होला ।’–क्याम्पस प्रमुख उपाध्यायले भन्नु भयो–‘निर्वाचनलाई अगाडि बढाउने विषयमा भित्रै छलफल गरिरहेका छौँ । ताला पनि खुलाउने प्रयास भइरहेको छ ।’

थुनामा परेपछि प्रमुख जिल्ला अधिकारी, प्रहरी उपरिक्षक सहितको टोलीले क्याम्पस पुगेर खुलाउने प्रयास गरेकोमा ३० गते निर्वाचन प्रकृया कसरी अगाडि बढाउने भन्ने विषयमा छलफल गर्ने सहमतिमा ताला खुलाइएको छ ।

सृजना पन्त