कोशी नामाकरण विवाद : फागुन १७ लाई कालो दिन घोषणा गर्दै विरोध

  ०८० फागुन १८ गते

कोशी प्रदेशसभाले ०७९ फागुन १७ गते दुई तिहाइ मतले कोशी प्रदेश नामाकरण गरेको दिनलाई पहिचान पक्षधरहरूले कालो दिनको रूपमा लिएका छन् ।

Photo 20240229 Ilam

पहिचान पक्षधरहरूले कोशी प्रदेश नामाकरण भएको दिन फागुन १७ गते कालो दिन भन्दै ०८० फागुन १७ गते इलाममा विरोध जनाएका छन् । पहिचानको पक्षमा आन्दोलनरत प्रदेश न.१ पुन नामाङ्कन संयुक्त सङ्घर्ष समितिले फागुन १७ लाई ‘अँध्यारो दिन’ भनेको छ ।

संयुक्त सङ्घर्ष समितिको आयोजनामा इलाम चोक बजारको लाकुरी चौतारामा विरोधसभा गरिएको पहिचान पक्षधर आन्दोलनका संयोजक डकेन्द्रसिंह थेगिमले बताउनु भयो । सदरमुकामको ठूलो टुँडीखेलबाट रत्नचोक हुँदै इलाम चोकबजारसम्म विरोध र्‍याली गरिएको थेगिमले बताउनु भयो ।

प्रदर्शनक्रममा सदरमुकामको ठूलो टुँडिखेलबाट सुरु भएको र्‍याली मालापथ हुँदै कोणसभामा परिणत भएको थियो । कोणसभालाई संयोजक थेगिम, किराँत राई यायोक्खाका उपमहासचिव कृष्ण राई र नागरिक उन्मुक्ति पार्टीका महासभा सदस्य भवीराज लिम्बूले सम्बोधन गर्नु भएको थियो ।

कोशी प्रदेशका १४ ओटै जिल्लामा फागुन १७ लाई कालोदिनको रूपमा स्मरण गर्दै कोशी नाम खारेजीको मागसहित विरोध प्रदर्शन गरिएको किराँत याक्थुङ चुम्लुङकी बुद्ध सोङमीले बताउनु भयो । प्रदर्शनमा आदिवासी जनजाति महासङ्घमा आबद्ध सबै जातीय संस्थाको सहभागिता रहेको सोङमीको भनाइ छ ।

पहिचान पक्षधरले फागुन १७ गतेलाई कालोदिन रूपमा घोषणा गरेपनि कोशी प्रदेश नामाकरणको विरोधमा आन्दोलनरत पहिचान पक्षधर र कोशी प्रदेश सरकारबिच ०८० माघ २५ र २६ गते भएको दोस्रो चरणको वार्तापछि पाँच बुँदे सहमति भएको छ ।

पहिचान पक्षधरले निषेधको आन्दोलन फिर्ता लिएर शान्तिपूर्ण आन्दोलन गर्ने, आन्दोलनमा घाइते भएकाहरूको निःशुल्क उपचार, आन्दोलनकारीहरूमाथि लगाइएको मुद्दा प्रदेश सरकारले फिर्ता लिने सहमति भएको छ ।

photo-20240209-morang-1
पहिचान पक्षधर र कोशी प्रदेश सरकारबिच ०८० माघ २६ गते भएको सहमति ।

मनोज अधिकारी