समाचारहरू

असोज ८ गते १ हजार ४ सय ९७ जनामा कोरोना सङ्क्रमण पुष्टि भएसँगै कोरोना सङ्क्रमितको सङ्ख्या ६९ हजार ३ सय १ पुगेको छ । कुल सङ्क्रमितमध्ये १८ हजार ४ सय ६ जना अर्थात २७ प्रतिशत महिला र ५० हजार ८ सय ९५ जना अर्थात ७३ प्रतिशत पुरुष रहेका स्वास्थ्य तथा जनसङ्ख्या मन्त्रालयले जनाएको छ । गत २४ घण्टामा ११ हजार ४ सय ४९ जनाको स्वाब परीक्षण गरिएको स्वास्थ्य तथा जनसङ्ख्या मन्त्रालयले जनाएको छ । मन्त्रालयले जारी गरेको स्थिति प्रतिवेदन अनुसार असोज ८ गतेसम्म कोरोना सङ्क्रमणका कारण ४ सय ५३ जनाको मृृत्यु भएको छ । असोज ८ गते मात्रै १७ जनाको मृत्यु भएको मन्त्रालयले जनाएको छ । सङ्क्रमितमध्ये ५० हजार ४ सय ११ जना निको भएका छन् । असोज ८ गते ४ सय ५७ जना निको भएका छन् भने निको दर ७२.७ प्रतिशत रहेको मन्त्रालयले जनाएको छ । १८ हजार ४ सय ३७ जनाको उपचार भइरहेको छ ।

प्रदेश २
रौतहट प्रतिनिधि कोपिला तिमल्सिनाका अनुसार कटहरिया नगरपालिकास्थित प्राथमिक स्वास्थ्य केन्द्र असोज ८ गतेदेखि १० गतेसम्म बन्द गर्ने निर्णय गरिएको प्रमुख प्रशासकीय अधिकृत रामप्रकाश साहले बताउनु भयो । कटहरिया नगरपालिकाद्वारा असोज ८ गते एक सूचना जारी गरी सो स्वास्थ्य केन्द्रका एक जना स्वास्थ्यकर्मी कोरोना सङ्क्रमित भएपछि प्राथमिक स्वास्थ्य केन्द्रबाट प्रदान गरिने सम्पूर्ण सेवा बन्द गर्ने निर्णय गरिएको साहले जानकारी दिनु भयो ।

सप्तरी प्रतिनिधि मनोहरकुमार पोखरेलका अनुसार कोरोनाबाट सङ्क्रमित राजविराज नपा–७ का ६८ वर्षीय पुरुषको असोज ८ गते बिहान मृत्यु भएको छ । होम आइसोलेशनमा बसेका उनको मृत्युपछि शवलाई असोज ८ गते नै सप्तकोशी नदीमा अन्त्येष्टि गरिएको छ । योसँगै सप्तरीमा कोरोना सङ्क्रमित दुई महिला र १० जना पुरुषको मृत्यु भएको स्वास्थ्य कार्यालय सप्तरीले जनाएको छ । भारदह अस्पतालकी २७ वर्षीय अनमीमा कोरोना सङ्क्रमण देखिए पछि हनुमाननगर कङ्कालिनी नपा–१ स्थित भारदह अस्पताल (सरकारी) असोज ८ गतेदेखि अनिश्चिकालका लागि बन्द भएको छ । भारदह अस्पतालका डाक्टर कुन्दन ठाकुरले असोज ८ गते एक सूचना जारी गरी अर्को सूचना नभए सम्मका लागि अस्पतालमा उपलब्ध सम्पूर्ण सेवाहरू स्थगित गरिएको जानकारी दिनु भयो । अन्य स्वास्थ्यकर्मी र कर्मचारीहरुमा समेत सङक्रमणको जोखिम रहेकोले असोज ८ गते अस्पतालमा कार्यरत दुई चिकित्सकसहित कर्मचारी, स्वास्थ्यकर्मी र औषधि पसलेसमेत ४१ जनाको स्वाब सङ्कलन गरी पीसीआर परीक्षणका लागि पठाइएको स्वास्थ्य संयोजक रामदेव यादवले जानकारी दिनु भयो ।

गण्डकी प्रदेश
तनहुँ प्रतिनिधि प्रकाशचन्द्र भट्टराईका अनुसार आँबुखैरेनी गाउँपालिका–३ का ३९ वर्षीय एक पुरुषको कोभिड सङ्क्रमणको कारण मृत्यु भएको छ । चितवन मेडिकल कलेजमा उपचारको क्रममा असोज ८ गते बिहान उनको मृत्यु भएको हो । सो अस्पतालका निर्देशक डाक्टर दयाराम लम्सालका अनुसार मिर्गौलाको डायलाइसिसको क्रममा उनी भदौ २९ गते चितवन मेडिकल कलेज गएका थिए । उनलाई भदौ ३१ गते कोभिड सङ्क्रमणको पुष्टि भएको थियो यससँगै कोभिडबाट तनहुँका पाँच जनाको मृत्यु भएको छ । मृत्यु हुनेमा चार जना महिला रहेका छन् ।

कर्णाली प्रदेश
सल्यान प्रतिनिधि मिना बुढाथोकीका अनुसार तीन जनामा कोरोना सङ्क्रमण पुष्टि भएपछि खलङ्गास्थित डाँडागाउँ क्षेत्र सील गरिएको छ । असोज ५ गते गरिएको स्वाब सङ्कलनमा डिभिजन वन कार्यालय सल्यानमा कार्यरत दुई जना कर्मचारी र स्थानीय एक जना पुरुषमा कोरोना पुष्टि भएपछि थप सङ्क्रमण हुन नदिन शारदा नपा–२ को डाँडागाउँ सील गरिएको वडा अध्यक्ष केशव श्रेष्ठले बताउनुभयो । असोज ९ गतेदेखि १५ गतेसम्म पुरोनो बसपार्कको प्रतिक्षालय, आयुर्वेद कार्यालय र सशस्त्र प्रहरीको व्यारेक–काजीधारा आसपासको क्षेत्र पुर्ण रूपमा सील गरिएको हो । डिभिजन वन कार्यालयसहित शारदा नगरपालिका, बागचौर नगरपालिका र सिद्ध कुमाख गाउँपालिका, तीन ओटा सब डिभिजन वन कार्यालय समेत सील गरिएको डिभिजन प्रमुख रेमश गिरीले जानकारी दिनुभयो । नेपालगञ्जबाट उपचार गरेर फर्किएका उनीहरुमा कोरोना संक्रमण देखिएको हो । संक्रमित तीनै जनालाई लुहापिङको आइसोलेसन कक्षमा राखिएको कोरोना फोकल पर्सन रिखाराम पुनले जानकारी दिनुभयो ।

सुदूरपश्चिम प्रदेश
डडेल्धुरा प्रतिनिधि भूपेन्द्र विष्टका अनुसार नवदुर्गा गाउँपालिकाका ४८ वर्षीय पुरुषको डडेल्धुरा अस्पतालमा मृत्यु भएको हो । केही दिनअघि भारतबाट आएका उनलाई श्वासप्रश्वासमा समस्या आएपछि अस्पताल ल्याइएको थियो । नवदुर्गा गाउँपालिकाको एम्बुलेन्समार्फत डडेल्धुरा अस्पताल पुर्‍याएका पुरुषलाई भारतमै कोरोना पुष्टि भएको र डडेल्धुरा अस्पतालको प्रयोगशालामा गरिएको परीक्षणमा पनि सङ्क्रमण पुष्टि भएको कोभिड–१९ सम्पर्क व्यक्ति हरिप्रसाद भट्टले जानकारी दिनु भयो ।

अनलाइन डेस्क