समाचारहरू

असोज ७ गते १ हजार १ सय ७२ जनामा कोरोना सङ्क्रमण पुष्टि भएसँगै कोरोना सङ्क्रमितको सङ्ख्या ६७ हजार ८ सय ४ पुगेको छ । गत २४ घण्टामा ९ हजार ४ सय ९७ जनाको स्वाब परीक्षण गरिएको स्वास्थ्य तथा जनसङ्ख्या मन्त्रालयले जनाएको छ । मन्त्रालयले जारी गरेको स्थिति प्रतिवेदन अनुसार असोज ७ गतेसम्म कोरोना सङ्क्रमणका कारण ४ सय ३६ जनाको मृत्यु भएको छ । सङ्क्रमितमध्ये ४९ हजार ९ सय ५४ जना निको भएका छन् । असोज ७ गते १ हजार ८ सय ९३ जना निको भएका छन् भने निको दर ७३.७ प्रतिशत रहेको मन्त्रालयले जनाएको छ । १७ हजार ४ सय १४ जनाको उपचार भइरहेको छ । असोज ७ गतेसम्म झण्डै ९ लाख ५० हजार स्वाब परीक्षण गरिसकिएको पनि मन्त्रालयले जनाएको छ ।

प्रदेश २ 

सप्तरी प्रतिनिधि मनोहरकुमार पोखरेलका अनुसार कोरोना सङ्क्रमित हनुमाननगर कङ्कालिनी नगरपालिकाका एक जना जनप्रतिनिधिलाई प्रादेशिक कोभिड-१९ विशेष अस्पताल जनकपुरधाममा भेण्टिलेटर नपाएपछि थप उपचारका लागि असोज ७ गते काठमाडौँ रिफर गरिएको छ । असोज ६ गते कोरोना सङ्क्रमित भएका उनलाई चिनीको मात्रा बढेको र निमोनियाको लक्षण देखिएकोले भेण्टिलेटरमा राख्नुपर्ने आवश्यकता भएकाले काठमाडौँस्थित हृयाम्स अस्पताल पठाउनु परेको हनुमाननगर कङ्कालिनी नगरपालिकाका स्वास्थ्य संयोजक रामदेव यादवले जानकारी दिनु भयो । यादवका अनुसार राजविराजस्थित प्रयोगशालाले स्वाब लिन नमानेपछि असोज ६ गते जनकपुर पठाइएको ४६ ओटा स्वाबमध्ये असोज ७ गते २८ जनाको रिपोर्ट आएको र त्यसमध्ये एक प्रहरी र एक अनमीसहित १० जना सङ्क्रमित भएका छन् । जिल्ला स्वास्थ्य कार्यालय सप्तरीका निमित्त प्रमुख दुनियालाल यादवले राजविराजस्थित गजेन्द्रनारायण सिंह अस्पतालको प्रयोगशालामा असोज ७ गते भएको परीक्षणमा भिम दल गणका चार जना नेपाली सेना र डाकनेश्वरी नगरपालिकाका एक जनामा कोरोना सङ्क्रमण भएको बताउनु भयो ।

सिरहा प्रतिनिधि दुर्गा परियारका अनुसार कोरोना सङ्क्रमित औरही गाउँपालिका-३ का ५० वर्षीय पुरुषको असोज ७ गते बिहान धरानस्थित वीपी कोइराला स्वास्थ्य विज्ञान प्रतिष्ठानको आइशोलेसन कक्षमा उपचारको क्रममा मृत्यु भएको जिल्ला स्वास्थ्य कार्यालयका प्रमुख कृष्णदेव यादवले बताउनु भयो । मृतकको टाउकोमा रगत जमी उपचारको लागि विराटनगरस्थित न्यूरो अस्पतालमा असोज ५ गते लगिएको थियो । सोही दिन कोरोना परीक्षणको लागि स्वाब सङ्कलन गर्दा असोज ६ गते रिपोर्ट पोजेटिभ देखिएपछि थप उपचारको लागि वीपी कोइराला स्वास्थ्य विज्ञान प्रतिष्ठान धरान लगिएको थियो । योसँगै जिल्लामा मृत्यु हुनेको सङ्ख्या १२ पुगेको छ । शवको व्यवस्थापन गोलबजार नपा-१ स्थित गागन खोलामा गरिने जिल्ला प्रहरी कार्यालय सिरहाका डिएसपी शालिग्राम शर्मा पौडेलले बताउनु भयो ।

सर्लाही प्रतिनिधि बुधन साहका अनुसार बरला नगरपालिकामा कोरोना सङ्क्रमित व्यक्तिको सङ्ख्या बढ्न थालेको तथा नगरपालिकामा वडा सदस्य र केही कर्मचारीहरूमा कोरोना सङ्क्रमण देखिएपछि नगरपालिकाले असोज ७ गते सूचना जारी गर्दै सील गरेको छ । असोज ८ गतेदेखि लागु हुने गरी असोज १५ गतेसम्मका लागि बलरा नगर क्षेत्र भित्रका अति आवश्यक स्वास्थ्य सेवाबाहेक अन्य सेवा बन्द गरिएको नगरपालिकाका प्रमुख अभय सिंहले बताउनु भयो ।

बागमती प्रदेश  

काठमाडौँमा ४ सय ९०, भक्तपुरमा ९५ र ललितपुरमा ५० जना गरी काठमाडौँ उपत्यकामा असोज ७ गते ६ सय ३७ जनामा कोरोना सङ्क्रमण पुष्टि भएको छ । यसैबीच काठमाडौँका १६ वर्षीय पुरुष र ६८ वर्षीया महिला तथा ललितपुरका ७४ वर्षीय पुरुषको मृत्यु भएको स्वास्थ्य तथा जनसङ्ख्या मन्त्रालयले आयोजना गरेको प्रेस मिटमा जनाइएको छ ।

धादिङ प्रतिनिधि सीताराम अधिकारीका अनुसार जिल्ला अस्पतालमा कार्यरत एक कर्मचारीमा कोरोना सङ्क्रमण पुष्टि भएपछि आपतकालिन सेवा बाहेकका सेवा बन्द भएको छ । धादिङ अस्पतालमा  आपतकालिन, ज्वारो क्लिनिक र प्रसूति सेवा बाहेक अस्पतालका सम्पूर्ण सेवा बन्द गरिएको हो । अस्पतालमा कार्यरत केही स्वास्थ्यकर्मीहरूको स्वाब सङ्कलन गरी पठाउँदा एक जना स्वास्थ्यकर्मीमा कोरोना पुष्टि भएपछि अन्य सेवा बन्द गरिएको छ । नियमित रुपमा सञ्चालन गरिएको बहिरङ्ग, अन्य विषेशज्ञ लगायतका सेवा कोरोना सङ्क्रमणका कारण रोक्नु परेको अस्पतालका सूचना अधिकारी विक्रम बिकले जानकारी दिनुभयो ।

चितवन प्रतिनिधि दिपेन्द्र अधिकारीका अनुसार भरतपुर अस्पताल र यस मातहत रहेको कोभिड ल्याबका कर्मचारीले अझै कोरोना जोखिम भत्ता पाएका छैनन् । चैतदेखिको गणना भइ भत्ता पाउनु पर्नेमा अहिलेसम्म नपाएको ल्याब टेक्नेसिएन रमेश अधिकारीले गुनासो गर्नु भयो । भरतपुर अस्तपालमा अर्थ मन्त्रालयले कोरोना रोकथाम, नियन्त्रण तथा उपचार कोषको २ करोड ३३ लाख ६७ हजार रुपियाँ जम्मा भएको छ । भदौ ३ गते नै मन्त्रालयले रकम जम्मा गरे पनि हालसम्म स्वास्थ्यकर्मीको हातमा भत्ता परेको छैन । अस्पतालको खातामा पैसा जम्मा भएको एक महिना बितिसक्दा पनि आफूहरूले नपाउनु दुःखको कुरा भएको स्वास्थ्यकर्मी कल्पना थापाले बताउनु भयो । भरतपुर अस्पतालका लेखा प्रमुख भृगुराज खनालले अस्पतालको खातामा रकम आए पनि वितरण नभएको बताए । भरतपुर अस्पतालले चैतदेखि असारसम्म चार महिनाको मात्रै रकम माग गरी केन्द्रमा पठाएको थियो । तर, माग गरेको भन्दा आधा कम अर्थात् २ करोड ३३ लाख ६७ हजार रुपियाँमात्र आएपछि थोरै रकम के कसरी वितरण गर्ने भन्नेमा अस्पताल अलमलमा परेको खनालले बताउनु भयो ।

काठमाडौँ प्रतिनिधि विमला पौडेलका अनुसार स्वास्थ्य तथा जनङ्ख्या मन्त्रालयले सक्रिय सङ्क्रमितको सङ्ख्या २५ हजार नाघेमा फेरि लकडाउन गर्न सिफारिस गरेको छ । नियमित प्रेस ब्रिफिङमा मन्त्रालयका प्रवक्ता डाक्टर जागेश्वर गौतमले मन्त्रालयको इन्सिडेन्ट कमाण्ड सिस्टमको असोज ७ गते बसेको बैठकले २५ हजार जनाभन्दा बढी कोरोना भाइरस सक्रिय सङ्क्रमित भए लकडाउन गर्नुपर्ने निष्कर्षनिकालेको जानकारी दिनुभयो । बैठकले कोरोना सङ्क्रमणको दर बढिरहेकोले जनस्वास्थ्यका मापदण्ड पालना हुन नसक्ने सेवा र व्यवसाय कम्तिमा अझै एक महिना नखोल्न सिफारिस गर्ने निर्णय समेत गरेको छ ।

सुदूरपश्चिम प्रदेश

कैलाली प्रतिनिधि मैनामोती चौधरीका अनुसार भूमि सुधार तथा मालपोत कार्यालय, कैलालीमा कार्यरत एक कर्मचारीमा असोज ६ गते कोरोना सङ्क्रमण पुष्टि भएपछि असोज ७ गतेदेखि असोज ९ गते सम्मका लागि सेवा प्रवाह बन्द गरिएको सो कार्यालयका प्रमुख प्रेमसिंह कुँवरले बताउनु भयो । सेती  प्रादेशिक  अस्पतालमा  असोज ४ गते  गरिएको पीसीआर परीक्षणका क्रममा असोज ६ गते कार्यालयका एक जना कर्मचारीमा कोरोना पुष्टि भएपछि कार्यालयबाट प्रवाह गरिने सम्पूर्ण सेवा बन्द गरिएको कुँवरले बताउनु भयो । धनगढी उपमहानगरपालिका स्वास्थ्य शाखाका जनस्वास्थ्य निरीक्षक लक्ष्मीराज उपाध्यायले हालसम्म धनगढी उपमहानगपालिकाका विभिन्न वडामा १ सय ७६ महिला र ३ सय १३ पुरुष गरी ४ सय ८९ जनामा कारोना सङ्क्रमण पुष्टि भइसकेको बताउनु भयो ।

अनलाइन डेस्क