समाचारहरू

असोज ६ गते १ हजार ३ सय ५६ जनामा कोरोना सङ्क्रमण पुष्टि भएसँगै कोरोना सङ्क्रमितको सङ्ख्या ६६ हजार ६ सय ३२ पुगेको छ । गत २४ घण्टामा ११ हजार १ सय ५४ जनाको स्वाब परीक्षण गरिएको स्वास्थ्य तथा जनसङ्ख्या मन्त्रालयले जनाएको छ । मन्त्रालयले जारी गरेको स्थिति प्रतिवेदन अनुसार असोज ६ गतेसम्म कोरोना सङ्क्रमणका कारण ४ सय २९ जनाको मृत्यु भएको छ । सङ्क्रमितमध्ये ४८ हजार ६१ जना निको भएका छन् । असोज ६ गते ८ सय २३ जना निको भएका छन् भने निको दर ७२.१ प्रतिशत रहेको मन्त्रालयले जनाएको छ । १८ हजार १ सय ४२ जनाको उपचार भइरहेको छ ।

प्रदेश २

सप्तरी प्रतिनिधि मनोहरकुमार पोखरेलका अनुसार घरमै मृत्यु भएका कोरोना सङ्क्रमित बिष्णुपुर गाउँपालिका-१ प्रसाहीका ४९ वर्षीय पुरुषको असोज ५ गते प्रसाहीमा नपाली सेनाको राजविराजस्थित भिमदल गणले शव व्यवस्थापन गरेको छ । स्वास्थ्य कार्यालय सप्तरीका निमित्त प्रमुख दुनियालाल यादवले वि.पी. कोइराला स्वास्थ्य विज्ञान प्रतिष्ठान धरानमा उनको मत्यु भएको र कोभिड-१९ को सप्तरीको तथ्याङ्क राख्नु हुने सोही कार्यालयका मलेरिया इन्स्पेटर नारायण राउत बरैले गोल्डेन अस्पताल विराटनगरमा मृत्यु भएको जानकारी दिए पनि मृतकका परिवारका सदस्यले असोज ४ गते घरमै मृत्यु भएको स्पष्ट पारेका छन् ।

नौ दिनअघि नरिवलको रुखबाट लड्दा करङ्ग भाँचिएर घाइते भएका उनको गोल्डेन अस्पताल विराटनगरमा उपचारका क्रममा भदौ २९ गते पीसीआर रिपोर्ट पोजिटिभ आएपछि बिरामीलाई घरमै राखिएकोमा मृतकका भतिजा भुपेन्द्रप्रसाद यादवले बताउनु भयो । हालसम्म सप्तरीमा मृत्यु हुने कोरोना सङ्क्रमितको सङ्ख्या ११ पुगेको छ । जसमा नौ जना पुरुष छन् ।

पर्सा प्रतिनिधि कृष्णचन्द्र लामिछानेका अनुसार बीरगंजको नारायणी अस्पतालमा रहेको प्रयोगशालामा रिएजेन्ट किट सकिए पछि असोज ६ गतेदेखि कोरोना भाइरसको सङ्क्रमणको परीक्षण रोकिएको छ ।  रिएजेन्ट किट सकिएर परीक्षण गर्न नसकिने भएपछि बारा र पर्साका जनस्वास्थ्य कार्यालयहरूलाई र बीरगंज महानगरपालिकालाई स्वाब सङ्कलन नगर्न प्रयोगशाला प्रमुख कन्सल्टेन्ट प्याथोलोजिष्ट डाक्टर निरा पाठकले पत्राचार गरी अनुरोध गर्नु भएको छ ।

नारायणी अस्पतालका प्रवक्ता डाक्टर अतुलेशकुमार चौरसियाले रिएजेन्ट सकिएकोले पीसीआर परीक्षण बन्द भएको जानकारी दिनु भयो ।

बागमती प्रदेश  

काठमाडौँमा ५ सय ११, ललितपुरमा ७३, भक्तपुरमा ६८, काभ्रेपलान्चोकमा ३०, चितवनमा २२, रामेछापमा नौ, दोलखा र मकवानपुरमा चार/चार, धादिङमा तीन, सिन्धुली र सिन्धुपाल्चोकमा दुई/दुई र नुवाकोटमा एक जना गरी यस प्रदेशमा असोज ६ गते ७ सय २९ जनामा कोरोना भाइरस सङ्क्रमणको पुष्टि भएको सामाजिक विकास मन्त्रालयले जनाएको छ । यससँगै प्रदेशमा सङ्क्रमित हुनेको सङ्ख्या २२ हजार ५ सय ७७ जना पुगेको छ । जसमध्ये ११ हजार ८ सय ५४ जना उपचारपछि घर फर्किएका छन् भने १० हजार ४ सय ५६ जनाको विभिन्न अस्पताल तथा आइसोलेशन सेन्टरमा उपचार भइरहेको छ । थप दुई जनाको मृत्यु भएसँगै यस प्रदेशमा कोरोना भाइरस सङ्क्रमणको कारण मृत्यु हुनेको सङ्ख्या १ सय ५७ पुगेको छ ।

अनलाइन डेस्क