समाचारहरू

असोज ४ गते १ हजार ३ सय २५ जनामा कोरोना सङ्क्रमण पुष्टि भएसँगै कोरोना सङ्क्रमितको सङ्ख्या ६४ हजार १ सय २२ पुगेको छ । गत २४ घण्टामा ९ हजार ५ सय ८४ जनाको स्वाब परीक्षण गरिएको स्वास्थ्य तथा जनसङ्ख्या मन्त्रालयले जनाएको छ । मन्त्रालयले जारी गरेको स्थिति प्रतिवेदन अनुसार असोज ४ गतेसम्म कोरोना सङ्क्रमणका कारण ४ सय ११ जनाको मृत्यु भएको छ । सङ्क्रमितमध्ये ४६ हजार २ सय ३३ जना डिस्चार्ज भएका छन् । असोज ४ गते ९ सय ६६ जना डिस्चार्ज भएका छन् भने निको दर ७२.१ प्रतिशत रहेको मन्त्रालयले जनाएको छ । १७ हजार ४ सय ७८ जनाको उपचार भइरहेको छ ।

प्रदेश २

सप्तरी प्रतिनिधि मनोहरकुमार पोखरेलका अनुसार असोज ४ गते दिउँसो सङ्क्रमण पुष्टि भएकी बिष्णुपुर गाउँपालिका-३ की ६२ वर्षीया महिलाको अपरान्ह मृत्यु भएको छ । रुघा, खोकी र ज्वरोले ग्रसित भएपछि असोज २ गते राजविराजस्थित गजेन्द्रनारायण सिंह अस्पताल भर्ना भएकी महिलाको कोरोना सङ्क्रमणको रिपोर्ट आएको केही घण्टामा नै अपरान्ह मृत्यु भएको अस्पतालका निमित्त मेडिकल सुपरिटेण्डेण्ट डाक्टर रणजीतकुमार झाले बताउनु भयो । उनको मृत्यु भएसँगै सप्तरीमा मृत्यु हुनेको सङ्ख्या दुई महिलासहित १० जना पुगेको छ । अस्पतालको आकस्मिक कक्षमा भर्ना रहेकी उनीसहित २४ जनामा असोज ४ गते कोरोना सङ्क्रमण देखिएको स्वास्थ्य कार्यालय सप्तरीले जनाएको छ ।

असोज ४ गते जिल्ला प्रहरी कार्यालयका २६ वर्षीय दुई प्रहरी, भिम दल गणका ३१ वर्षीय सैनिक, भुमि व्यवस्था, कृषि तथा सहकारी मन्त्रालय, प्रदेश नम्बर २, जनकपुरधामका कर्मचारी राजविराज नपा-५ का ४३ वर्षीय पुरुषसहित २४ जनालाई कोरोना सङ्क्रमण देखिएको स्वास्थ्य कार्यालयले जनाएको छ । स्वास्थ्य कार्यालय सप्तरीका अनुसार राजविराज नपा-१ का १६ र ५० वर्षीया महिला, राजविराज नपा-२ का ५३ वर्षीय पुरुष, राजविराज नपा-६ का २२, २३, ३१ र ३४ वर्षीय पुरुष, २२, ३०, ३१, ४०, ६० र ६५ वर्षीया महिला र राजविराज नपा-८ का ५८ वर्षीय पुरुष कोरोना सङ्क्रमित भएका छन् । यस्तै, रुपनी गाउँपालिका-२ का ३२ वर्षीय पुरुष, विष्णुपुर गाउँपालिका-३ की ६२ वर्षीया महिला, सोही गाउँपालिका-६ का २७ वर्षीय पुरुष, सोही गाउँपालिका-७ का ३०, ३५ र ४७ वर्षीय पुरुषलाई कोरोना सङ्क्रमण देखिएको स्वास्थ्य कार्यालय सप्तरीका निमित्त प्रमुख दुनियालाल यादवले बताउनु भयो ।

सर्लाही प्रतिनिधि बुधन साहका अनुसार कोरोना सङक्रमित हरिपुर नपा-९ का ५४ वर्षीय पुरुषको चितवन स्थित भरतपुर अस्पतालको आइसीयू कक्षमा उपचारको क्रममा असोज ३ गते दिउँसो ४ बजे मृत्यु भएको जनस्वास्थ्य कार्यालय सर्लाहीका जनस्वास्थ्य निरीक्षक सुशील झाले बताउनु भयो । श्वासप्रश्वासमा समस्या देखिएको उनलाई भदौ ११ गते भरतपुर अस्पतालमा भर्ना गरिएको थियो । भरतपुर अस्पतालमै कोरोना परीक्षण गर्दा भदौ १८ गते उनमा कोरोना पोजेटिभ रिपोर्ट आएको सर्लाही जिल्लाका प्रमुख जिल्ला अधिकारी सुरेन्द्र पौडेलले बताउनु भयो । असोज ४ गते विहान नेपाली सेनाले शवको व्यवस्थापन गरेको हरिपुर नगरपाकिाका नगर प्रमुख जमिरुदिन मन्सुरीले बताउनु भयो । यो सँगै हालसम्म जिल्लामा कोरोना सङ्क्रमणबाट मृत्यु हुनेको सङ्ख्या ६ पुगेको छ ।

बारा प्रतिनिधि भोलानाथ पौडेलका अनुसार कारोना सङ्क्रमित कलैया उमनपा-१३ बलिरामपुरका ६५ वर्षीय पुरुषको असोज ४ गते बिहान नेशनल मेडिकल कलेज बीरगंजमा उपचारको क्रममा मृत्यु भएको डाक्टर असरफ हुसेनले बताउनु भयो । मिर्गौला तथा प्यारालाइसिसका बिरामी पुरुष असोज १ गते उपचारको लागि नेशनल मेडिकल कलेजमा भर्ना भएका थिए । नेशनल मेडिकल कलेजले असोज १ गते नारायणी अस्पतालमा पिसिआर परीक्षण गराउँदा कोरोना पोजेटिभ रिपोर्ट पुष्टि भएको डा. हुसेनले बताउनु भयो । मृतका परिवार र नेपाली सेनाको सहकार्यमा असोज ४ गते बेलुका शवको व्यवस्थापन गरिएको जिल्ला प्रहरी कार्यालयका डिएसपी गौतम मिश्रले बताउनु भयो । जिल्लामा असोज ४ गतेसम्म कोरोना सङ्क्रमित २० जनाको मृत्यु भएको छ ।

बागमती प्रदेश

काठमाडौँमा ६ सय २, भक्तपुरमा १ सय ४, ललितपुरमा ६४, मकवानपुरमा २४, धादिङमा २१, चितवनमा १५, काभ्रेपलान्चोकमा पाँच, दोलखामा चार, सिनधुपाल्चोकमा तीन, सिन्धुली र नुवाकोटमा एक/एक जना गरी यस प्रदेशमा असोज ४ गते ८ सय ४६ जनामा कोरोना भाइरस सङ्क्रमणको पुष्टि सामाजिक विकास मन्त्रालयले जनाएको छ । यससँगै प्रदेशमा सङ्क्रमित हुनेको सङ्ख्या २१ हजार ७० जना पुगेको छ । जसमध्ये १० हजार ९ सय ४१ जना उपचारपछि घर फर्किएका छन् भने ९ हजार ९ सय ९४ जनाको विभिन्न अस्पताल तथा आइसोलेशन सेन्टरमा उपचार भइरहेको छ । थप सात जनाको मृत्यु भएसँगै यस प्रदेशमा कोरोना भाइरस सङ्क्रमणको कारण मृत्यु हुनेको सङ्ख्या १ सय ४५ जना पुगेको छ ।

प्रदेश ५

पाल्पा प्रतिनिधि यज्ञमुर्ति तिमल्सिनाका अनुसार कोरोनाका सङ्क्रमणका कारण असोज ३ गते तानसेन नगरपालिका-१४ अर्गलीकी ४२ वर्षीया महिलाको मृत्यु भएको जिल्ला स्वास्थ्य कार्यालयका सूचना अधिकारी ओमप्रकाश पन्थीले बताउनु भयो । निमोनियाबाट पीडित रहेकी ति महिलालाई भदौ ३० गते उपचारको लागि अस्पताल लगिएको थियो । कोरोना भाइरससँग मिल्ने लक्षण देखिएपछि भदौ ३० गते स्वाब सङ्कलन गरेर परीक्षणको लागि लुम्बिनी प्रादेशिक प्रयोगशालामा पठाइएकोमा असोज २ गते कोरोना पुष्टि भएको थियो । यससँगै जिल्लामा कोरोनाबाट मृत्यु हुनेको सङ्ख्या चार पुगेको छ ।

बाँके प्रतिनिधि स्मृति देवकोटाका अनुसार कोरोना सङ्क्रमणबाट नेपालगञ्ज उमनपा-२१ पुरैनी बस्ने ५९ वर्षीय पुरुषको असोज ३ गते राति मृत्यु भएको जिल्ला स्वास्थ्य कार्यालयका फोकल पर्सन नरेशबाबु श्रेष्ठले बताउनु भयो । मृतकमा कोरोना रोगको लक्षण देखा परेकाले भेरी अस्पताल नेपालगञ्जमा भदौ २० गते लिएको स्वाब परीक्षण रिपोर्ट पोजेटिभ आएको थियो । हाइड्रो अक्सिजन, प्लाज्मा थेरापीबाट उपचार गरिएकोमा भदौ २५ गते बाट औषधि सहितको उपचार भइरहँदा असोज ३ गते मृत्यु भएको श्रेष्ठले बताउनु भयो । बाँकेमा हालसम्म कोरोना सङ्क्रमणबाट १० जनाको मृत्यु भइसकेको छ ।

अनलाइन डेस्क