समाचारहरू

भदौ १६ गते १ हजार ६९ जनामा कोरोना सङ्क्रमण पुष्टि भएसँगै सङ्क्रमितको सङ्ख्या ४० हजार  नाघेको छ । भदौ १६ गतेसम्म ७ लाख ५ हजार ५ सय ६० जनाको परीक्षण गर्दा ४० हजार ५ सय २९ जनामा सङ्क्रमण पुष्टि भएको स्वास्थ्य तथा जनसङ्ख्या मन्त्रालयले जनाएको छ । गत २४ घण्टामा १२ हजार ८८ जनाको स्वाब परीक्षण गरिएको पनि मन्त्रालयले जनाएको छ । मन्त्रालयले जारी गरेको स्थिति प्रतिवेदन अनुसार भदौ १६ गतेसम्म कोरोना सङ्क्रमणका कारण २ सय ३९ जनाको मृत्यु भएको छ । सङ्क्रमितमध्ये २२ हजार १ सय ७८ जना अस्पतालबाट डिस्चार्ज भएका छन् । भदौ १६ गते ७ सय ६८ जना डिस्चार्ज भएका छन् भने निको दर ५४.७ प्रतिशत रहेको मन्त्रालयले जनाएको छ । १८ हजार १ सय १२ जनाको उपचार भइरहेको छ ।

प्रदेश १

मोरङ प्रतिनिधि नेत्रप्रसाद अधिकारीका अनुसार जिल्लामा एक साताका लागि निषेधाज्ञाको समय थप गरिएको छ । खुकुलो प्रावधानसहित एक साता निषेधाज्ञा लम्ब्याउने निर्णय भएको जिल्ला प्रशासन कार्यालयले जनाएको छ । यसअघि दुई पटक थप हुँदै भदौ ५ गतेबाट जारी निषेधाज्ञा २२ गते राति १२ बजेसम्मको लागि लम्ब्याउने निर्णय भएको प्रमुख जिल्ला अधिकारी कोषहरि निरौलाले बताउनु भयो । निषेधाज्ञाको अवधिमा जोर गते जोर नम्बरका र बिजोर गते बिजोर नम्बरका निजी सवारी साधन सञ्चालन गर्न पाइने भएको छ । बजार तथा पसल साँझ ४ बजेसम्म खुल्ला हुने भएको छ । यसअघि दिनको १२ बजेसम्म मात्र बजार तथा पसल खुल्ला गरिएको थियो । प्रशासनले शनिबार भने अत्यावश्यक बाहेकका पसल सञ्चालामा रोक लगाएको छ । सरकारी कार्यालयले आलोपालो गरी न्यूनतम् सङ्ख्यामा कर्मचारी राखेर भदौ २१ गतेबाट तालिका अनुसार सेवा सञ्चालन गर्नुपर्ने भएको छ । उद्योगहरूले स्वास्थ्य सुरक्षा मापदण्ड पालना गरेर सञ्चालन गर्न पाउने भएका छन् । जिल्लाभर राति ९ बजेदेखि बिहान ५ बजेसम्म हिँडडुल गर्न प्रतिबन्ध लगाइएको प्रमुख जिल्ला अधिकारी निरौलाले बताउनु भयो । प्रदेश १ का सामाजिक विकास मन्त्री जीवन घिमिरेलाई कोरोना भाइरसको सङ्क्रमण पुष्टि भएको मन्त्रीको सचिवालयले जनाएको छ । भदौ १५ गते राति आएको रिपोर्टमा कोरोना भाइरस सङ्क्रमण पुष्टि भएको सचिवालयले जनाएको छ ।

झापा प्रतिनिधि नरेश खातीका अनुसार बुद्धशान्ति गाउँपालिकाले कोरोना भाइरसको सङ्क्रमण प्रतिदिन बढेपछि जोखिम न्यूनीकरणका लागि भदौ १६ गते मध्यराति देखि भदौ ३१ गतेसम्म लकडाउनको घोषणा गरेको छ । सरकारले तोकेको स्वास्थ्य सुरक्षा सम्बन्धी मापदण्ड अनुसार सजगता अपनाएर बैङ्क तथा वित्तीय संस्था, दैनिक उपभोग्य पसल व्यवसाय बिहान ८ बजेदेखि २ बजेसम्म सञ्चालन गर्न दिने गरी लकडाउन गर्ने निर्णय भएको गाउँपालिका अध्यक्ष रमेशकुमार भुजेलले बताउनु भयो । यस अघि गाँउपालिकाले भदौ ५ गतेदेखि भदौ १६ गतेसम्म लकडाउन लगाएको थियो ।

उदयपुर प्रतिनिधि भरत खड्काका अनुसार कोरोना भाइरस सङ्क्रमितहरूलाई उपचारका लागि जिल्लाको मदन भण्डारी आँखा अस्पताल गाईघाटमा आइसोलेशन सेन्टर सञ्चालन गरिने भएको छ । भदौ १५ गते प्रदेश सरकारले स्थानीय स्तरमा नै बिरामी राखेर उपचार गर्ने गरी सेन्टर सञ्चालन गर्ने निर्णय गरेको हो । सरकारले आइसोलेशनका लागि १५ लाख रुपियाँ उपलब्ध गराउने निर्णय गरेको मुख्यमन्त्रीका प्रेस सल्लाहकार धुव्र सुवेदीले बताउनु भयो । ०७६ चैत ५ गते त्रियुगा नगरपालिका-३ भुल्केमा एकैपटक १२ जनामा कोरोना भाइरसको सङ्क्रमण पुष्टि भएपछि अस्पताल सञ्चालनको जिम्मा पाएको नेपाल नेत्रज्योती सङ्घले चैत १२ गते अस्पताललाई कोभिड अस्पतालमा परिणत गर्न सक्ने निर्णय गरेको थियो । नेत्रज्योती सङ्घको निर्णयसँगै स्वास्थ्य तथा जनसङ्ख्या मन्त्रालय सिंहदरबार काठमाडौँले ०७७ असार २९ गते आँखा अस्पताललाई आइसोलेशन सेन्टरमा परिणत गर्ने र तत्काल ३० बेड उपलब्ध गराउने गरी निर्णय भएको नेत्रज्योती सङ्घका सभापति भागवत राउतले बताउनु भयो ।

प्रदेश २

सिरहा प्रतिनिधि दुर्गा परियारका अनुसार कोरोना सङ्क्रमित मर्चैया नपा-६ की ६५ वर्षीय पुरुषको भदौ १५ गते उपचारको क्रममा मृत्यु भएको जिल्ला स्वास्थ्य कार्यालयका प्रमुख कृष्णदेव यादवले बताउनु भयो । सुगरसम्बन्धी उपचारको लागि भदौ ४ गते विराटनगरस्थित विराट नर्सिङ होममापुगेका उनको कोरोना परीक्षण भदौ १० गते गरिएकोमा सोही दिन रिपोर्ट पोजेटिभ आएको थियो । पोजेटिभ रिपोर्ट आएपछि उनलाई थप उपचारको लागि धरानस्थित वीपी कोइराला स्वास्थ्य विज्ञान प्रतिष्ठानमा लगी आइसोलेशनमा भर्ना गरिएकोमा उपचारकै क्रममा राति ९ बजे मृत्यु भएको प्रमुख यादवले बताउनु भयो । शव व्यवस्थापन गर्न सुरक्षा मापदण्ड पुरा गरी जिल्ला ल्याउने तयारी भइरहेको प्रमुख यादवले बताउनु भयो । हालसम्म जिल्लामा आठ जनाको कोरोना सङ्क्रमणका कारण मृत्यु भएको छ ।

महोत्तरी प्रतिनिधि अजयकुमार साहका अनुसार मनरा सिसवा नगरपालिकाकी चार वर्षीया बालिकाको कोरोना सङ्क्रमणका कारण मृत्यु भएको छ । उच्च ज्वरो र सास फेर्न समस्या भएपछि बालिकालाई तीन साताअघि वीपी कोइराला स्वास्थ्य विज्ञान प्रतिष्ठान धरानमा उपचारका लागि लगिएको थियो । गत साउन २३ गते उपचारकै क्रममा उनको स्वाब सङ्कलन गरी परीक्षण गर्दा कोरोना सङ्क्रमण पुष्टि भएको थियो । बालिकालाई आइसोलेशनमा राखेर उपचार गर्ने क्रममा भदौ १४ गते दिउँसो मृत्यु भएको प्रमुख जिल्ला अधिकारी कृष्णबहादुर कटुवालले जानकारी दिनु भयो । यससँगै महोत्तरीमा मृत्यु हुनेको सङ्ख्या दुई जना महिलासहित १० जना पुगेको छ । त्यसैगरी भदौ १६ गते महोत्तरीका १० जनामा सङ्क्रमण पुष्टि भएसँगै कुल सङ्क्रमित सङ्ख्या १ हजार २ सय ९३ पुगेको कोरोना फोकल पर्सन गिरेन्द्र झाले बताउनु भयो ।

बारा प्रतिनिधि भोलानाथ पौडेलका अनुसार कोरोना सङ्क्रमित कोल्हवी नपा-६ अधनवा टोलका ६० वर्षीय पुरुषको कोभिड अस्पताल गण्डकमा उपचारको क्रममा भदौ १६ गते बिहान मृत्यु भयो ।  श्वासप्रश्वास र मधुमेहका बिरामीमा कोरोना देखिएपछि उपचारकै क्रममा मृत्यु भएको डाक्टर चितरञ्जन साहले बताउनु भयो ।

पर्सा प्रतिनिधि कृष्णचन्द्र लामिछानेका अनुसार बीरगंजमा पहिचान नखुलेका कोरोना सङ्क्रमित ६० वर्षीय पुरुषको नारायणी अस्पतालमा भदौ १५ गते राति उपचारको क्रममा मृत्यु भएको अस्पतालका प्रवक्ता डाक्टर अतुलेश चौरसियाले बताउनु भयो । मृत्युपछि गरिएको जिन एक्र्सपर्ट टेस्टमा ती व्यक्तिमा कोरोना पोजिटिभ देखिएको डाक्टर चौरसियाले बताउनु भयो । बेवारिसे अवस्थामा सडकमा रहेका ती व्यक्तिलाई कोभिड एक्सन टिमका युवाहरूले भदौ १३ गते नारायणी अस्पतालको आकस्मिक कक्षमा भर्ना गरेका थिए । मृतकको पहिचान नखुलेको डाक्टर चौरसियाले बताउनु भयो ।

नारायणी अस्थायी गण्डक कोरोना अस्पतालमा ६ दिनदेखि उपचार गराइरहेका बारा जिल्ला कोल्भी नगरपालिकाका ६० वर्षीय पुरुषको भदौ १६ गते बिहान मृत्यु भयो । उनलाई भदौ १० गते कोभिड अस्पताल गण्डकमा भर्ना गरी उपचार गरिएको र उपचारकै क्रममा उनको मृत्यु भएको डाक्टर चौरसियाले बताउनु भयो । मधुमेह र दमको समस्या रहेका उनलाई सेमी भेण्टिलेटरमा राखेर उपचार गरिएको थियो ।

बीरगंज महानगरपालिका-२० हरपतगंजका ५३ वर्षीय पुरुषको नारायणी अस्थायी कोभिड अस्पताल बीरगंज हेल्थ केयरमा उपचारको क्रममा भदौ १६ गते बिहान मृत्यु भएको नारायणी अस्पतालका प्रवक्ता डाक्टर अतुलेश चौरसियाले जानकारी दिनु भयो । उहाँलाई साउन ३१ गते उपचारको लागि अस्पतालमा भर्ना गरिएको थियो । उनमा टाइप टु मधुमेह र मिर्गौलासम्बन्धी समस्या रहेको डाक्टर चौरसियाले बताउनु भयो ।

बागमती प्रदेश

यस प्रदेशमा भदौ १६ गते काठमाडौँमा ३ सय ९३, ललितपुरमा ५८, चितवनमा ४५, मकवानपुरमा ३६, भक्तपुरमा ३०, दोलखा र धादिङमा ११/११, काभ्रेपलान्चोकमा आठ, नुवाकोट, सिन्धुली र रामेछापमा दुई/दुई, रसुवा र सिन्धुपाल्चोक एक/एक जना गरी ६ सय जनामा कोरोना भाइरस सङ्क्रमणको पुष्टि भएको छ । यससँगै प्रदेशमा सङ्क्रमित हुनेको सङ्ख्या ८ हजार ४ सय ५१ जना पुगेको छ । जसमध्ये १ हजार ३ सय ३६ जना उपचारपछि घर फर्किएका छन् भने ७ हजार ५८ जनाको विभिन्न अस्पताल तथा आइसोलेशन सेन्टरमा उपचार भइरहेको छ । हालसम्म यस प्रदेशमा कोरोना भाइरस सङ्मणको कारण मृत्यु हुनेको सङ्या ५७ जना पुगेको छ ।

काठमाडौँ प्रतिनिधि विमला पौडेलका अनुसार सुन्धारा स्थित केन्द्रीय कारागारका एक जना कैदीको कोरोना भाइरस सङ्क्रमणका कारण मृत्यु भएको छ । कञ्चनपुरबाट उपचारका लागि केन्द्रीय कारागारमा ल्याइएका ४० वर्षीय पुरुषको ललितपुरको धोबीघाटमा रहेको मेगा अस्पतालमा भदौ १५ गते राति मृत्यु भएको केन्द्रीय कारागारका जेलर लक्ष्मीप्रसाद बाँस्कोटाले इन्सेक प्रतिनिधिलाई टोलिफोनमा बताउनु भयो । मृतक कैदी गम्भीर रोगको बिरामी रहेको र उपचारका क्रममा कोरोना पुष्टि भएको उहाँले बताउनुभयो । यस्तै, वीर अस्पतालमा केन्द्रीय कारागारमा रहँदै आएका ६०, ५८ र ६२ वर्षका तीन जना पुरुष कैदीको मृत्यु भएको छ । उनीहरूको कोरोनाबाट मृत्यु भएको वा नभएको पत्ता लगाउन स्वाब सङ्कलन गरी परीक्षणमा पठाइएको जेलर बाँस्कोटाले बताउनु भयो । हालसम्म केन्द्रीय कारागारमा रहेका ५२ जना पुरुष कैदीबन्दीलाई कोरोना सङ्क्रमण पुष्टि भएको छ ।

चितवन प्रतिनिधि दिपेन्द्र अधिकारीका अनुसार चितवन मेडिकल कलेजमा १६ गते मकवानपुरको हेटौँडा उपमहानगरपालिका-१५ का ५८ वर्षीय पुरुषको कोरोना भाइरस सङ्क्रमणका कारण मृत्यु भएको अस्पतालका निर्देशक डा. दयाराम लम्सालले बताउनु भयो । बिरामीलाई कडा खालको निमोनिया र श्वासप्रश्वासको समस्या देखिएपछि भेन्टिलेटरमा राखेर उपचार गरिएको थियो । यसैगरी जिल्लामामा १५ गते कोरोना भाइरस सङ्क्रमित तीन जनाको मृत्यु भएको छ । खैरहनी नगरपालिका-१३ निवासी ५५ वर्षीया महिला, भरतपुर महानगरपालिका-११ का ६५ वर्षीय पुरुष र भरतपुर महानगरपालिका-११ की १८ वर्षीया महिलाकाको मृत्यु भएको डा. लम्सालले बताउनु भयो ।

यसैबीच, भदौ महिना लागेपछि हालसम्मको तथ्याङ्क नै हेर्ने हो भने पनि पछिल्लो १५ दिनमा चितवनमा मात्रै ४ सय ९२ जनामा कोरोना सङक्रमण पुष्टि भएको छ । वैशाख ५ गते दुई जनामा सङ्क्रमण देखिएपछि सुरु भएको चितवनमा साउन ३२ गतेसम्म कोरोना सङ्क्रमितको सङ्ख्या २ सय ९ जना थियो । १६ गते साँझसम्ममा चितवनमा सङ्क्रमतिको सङ्ख्या ७ सय ४६ पुगेको जिल्ला जनस्वास्थ्य कार्यालय चितवनका प्रमुख दीपक तिवारीले बताउनु भयो ।

यसैबीच, कोरोना सङ्क्रमित गर्भवतीका लागि भरतपुर अस्पतालले छुट्टै कक्षको निर्माण थालेको छ । व्यथा लागेका गर्भवतीलाई राख्ने, साधारण बच्चा जन्माउने, शल्यक्रिया र शिशु कक्ष अलग्गै बनाउन सुरु गरेको अस्पतालले जनाएको छ । चितवनसहित १९ जिल्लाका बिरामी आउने यस अस्पतालमा कोभिड-१९ बाट सङ्क्रमित भएकाको राम्रो उपचार र अन्यलाई सुरक्षित बनाउन अलग्गै कक्ष बनाउन थालिएको हो । हाल दैनिक ३० जनाभन्दा बढी गर्भवतीले यस अस्पतालमा प्रसुति गराउँदै आएको अस्पतालका सूचना अधिकारी लिलाधर पौडेलले बताउनु भयो ।

सुदूरपश्चिम प्रदेश

कञ्चनपुर प्रतिनिधि कोमलनिरञ्जन भाटका अनुसार माहाकाली नगरपालिकामा भदौ १५ गते बसेको सर्वपक्षीय बैठकले भदौ १५ गते राति १२ बजेदेखि भदौ २३ गतेसम्म बजार व्यवसाय र सार्वजनिक सेवा प्रवाहमा कडाई गर्ने निर्णय गरेको छ । स्थानीय प्रशासनले जारी गरेको निषेधाज्ञाको उल्लङ्घन गरी स्थानीयहरू बजार, नगरपालिका र सार्वजनिक स्थानमा भीडभाड गर्न थालेपछि निषेधाज्ञामा कडाई गर्न महाकाली नगरपालिकाले लकडाउन सुरु गरेको महाकाली नगरपालिकका प्रशासकीय प्रमुख गणेश मिश्रले बताउनु भयो ।

अनलाइन डेस्क