समाचारहरू

भदौ ७ गते ८ सय १८ जनामा कोरोना सङ्क्रमण पुष्टि भएसँगै सङ्क्रमितको सङ्ख्या ३१ हजार ९ सय ३५ पुगेको छ । गत २४ घण्टामा ८ हजार २६ जनाको स्वाब परीक्षण गरिएको पनि मन्त्रालयले जनाएको छ । मन्त्रालयले जारी गरेको स्थिति प्रतिवेदन अनुसार भदौ ७ गतेसम्म कोरोना सङ्क्रमणका कारण १ सय ४९ जनाको मृत्यु भएको छ । सङ्क्रमितमध्ये १८ हजार ६ सय ३१ जना अस्पतालबाट डिस्चार्ज भएका छन् । भदौ ७ गते २ सय ८१ जना डिस्चार्ज भएका छन् भने निको दर ५८.३ प्रतिशत रहेको मन्त्रालयले जनाएको छ । १३ हजार १ सय ५५ जनाको उपचार भइरहेको छ । भदौ ७ गतेसम्म ६ लाख ४ सय ४४ जनाको पीसीआर परीक्षण गरिएको पनि मन्त्रालयले जनाएको छ ।

प्रदेश २ 

सप्तरी प्रतिनिधि मनोहरकुमार पोखरेलका अनुसार गजेन्द्रनारायण सिंह अस्पतालमा कार्यरत राजविराज नपा-५ का ४८ वर्षीय स्वास्थ्यकर्मी र गोइठी स्वास्थ्य चौकीमा कार्यरत तिरहुत गाउँपालिका-४ का २९ वर्षीय स्वास्थ्यकर्मीमा भदौ ७ गते कोरोना सङ्क्रमण देखिएपछि अस्पतालमा आंशिक र स्वास्थ्य चौकीमा पूर्ण प्रभाव परेको सम्बन्धित निकायले जनाएका छन् । अस्पतालका मेडिकल सुपरिटेण्डेण्ट डाक्टर रणजितकुमार झाले आइसोलेशनमा रहेका दुई जना सङ्क्रमित पुरुषको अवस्था गम्भीर भएको बताउनु भयो ।

सर्लाही प्रतिनिधि बुधन साहका अनुसार कोरोना भाइरस रोकथाम तथा नियन्त्रणका लागि जिल्ला सुरक्षा समिति, कोरोना सङ्कट व्यवस्थापन केन्द्र र जिल्ला विपद व्यवस्थापन समितिको भदौ ७ गतेको बैठकले भदौ ७ गते मध्य रातिदेखि भदौ १४ गते मध्यरातसम्मका लागि लागु हुने गरी निषेधाज्ञा थप गरिएको प्रमुख जिल्ला अधिकारी सुरेन्द्र पौडेलले बताउनु भयो । जिल्लाभर लागु हुने गरी निषेधाज्ञा जारी गरिएको जिल्ला प्रशासन कार्यालय सर्लाहीले एक सूचना प्रकाशन गरी जनाएको छ ।

बागमती प्रदेश  

काठमाडौँमा १ सय २६, भक्तपुरमा २८, काभ्रेपलान्चोकमा २७, मकवानपुरमा १७, ललितपुरमा १२, दोलखामा ६, रामेछापमा दुई, रसुवा, धादिङ र सिन्धुलीमा एक/एक जना गरी यस प्रदेशमा भदौ ७ गते २ सय २१ जनामा कोरोना भाइरस सङ्क्रमणको पुष्टि भएको छ ।

दोलखा प्रतिनिधि उद्धव पोखरेलका अनुसार जिल्ला सुरक्षा समिति दोलखाको भदौ ७ बसेको बैठकले भदौ १० गते राति १२ बजेसम्मका लागि निषेधाज्ञा जारी गरेको छ । यसअघि जारी भएको निषेधाज्ञा भदौ ७ गतेबाट समाप्त हुने भए पनि गौरीशङ्कर, कालिञ्चोक गाउँपालिका र भीमेश्वर नगरपालिका क्षेत्रमा कोभिड-१९ सङ्क्रमितको सङ्ख्या बढ्दै गएको र अन्य स्थानीय तहमा फैलन नदिन निषेधाज्ञा जारी गरिएको जनाइएको छ ।

सिन्धुपाल्चोक प्रतिनिधि नातिबावु धितालका अनुसार छिमेकी जिल्लाहरूमा कोभिड-१९ को सङ्क्रमण बढ्दै गइरहेको र जिल्लामा पनि सङ्क्रमण फैलन सक्ने सम्भावना भएको भन्दै भदौ ७ गतेसम्म घोषणा गरिएको लकडाउनको अवधि भदौ १४ गतेसम्म बढाइएको प्रमुख जिल्ला अधिकारी उमेशकुमार ढकालले बताउनु भयो । जिल्ला कोभिड-१९ सङ्कट व्यवस्थापन समितिको भदौ ७ गते बसेको बैठकले एक सातासम्मका लागि जिल्लामा लकडाउन थप गर्ने निर्णय गरेको जिल्ला प्रहरी कार्यालयका एसपी प्रज्वल महर्जनले बताउनुभयो । प्रमुख जिल्ला अधिकारी ढकालले स्थानीय प्रशासन ऐन, २०२८ को दफा ६ (३) बमोजिम गतिविधिहरू गर्न निषेध गर्ने गरी निर्णय गरिएको र सो निर्णयलाई सबै सुरक्षा निकायहरूले प्रभावकारी कार्यान्वयन गर्न गराउन निर्देशन समेत दिएको बताउनु भयो ।

चितवन प्रतिनिधि दिपेन्द्र अधिकारीका अनुसार कोरोना भाइरसको जोखिमका हिसाबले चितवन रेड जोनमा परेको छ । स्वास्थ्य तथा जनसङ्ख्या मन्त्रालयले २ सय जना भन्दा बढी सक्रिय कोरोना सङ्क्रमित भएको जिल्लालाई रेड जोनमा राख्ने गरेको छ । भदौ ७ गतेसम्म चितवनमा सक्रिय कोरोना सङ्क्रमितको सङ्ख्या २ सय १७ जना रहेको छ । जिल्लामा हालसम्म ३ सय ४२ जनामा कोरोना पुष्टि भएकोमा १ सय २२ जना सङ्क्रमित निको भएर घर गइसकेका छन् भने तीन जनाको मृत्यु भएको छ । यसैबीच, होम क्वारेण्टाइनमा बसेकाहरूले स्वाब दिइएको एक हप्ता हुँदा पनि रिपोर्ट पाउन नसकेको गुनासो गरेका छन् । भरतपुर महानगरपालिका-९ का दिलिप केसीले होम क्वारेण्टाइनमा बसेको १५ दिन भएको र भदौ १ गते स्वाव परीक्षणका लागि दिएको भए पनि अझै रिपोर्ट नपाएको बताउनु भयो । स्वाब धेरै सङ्कलन भएकाले रिपोर्ट आउन ढिला हुने गरेको भरतपुर अस्पतालका सूचना अधिकारी लिलाधर पौडेलले बताउनुभयो । अस्पतालमै सङ्कलन गरिएका स्वाबलाई प्राथमिकता दिँदा बाहिरबाट सङ्कलति स्वाब परीक्षणमा ढिला हुने गरेको अस्पतालले जनाउँदै आएको छ । हेटौँडाबाट आएकी एक महिलाको भदौ १ गते कोरोना परीक्षणका लागि स्वाब सङ्कलन भयो । भरतपुर अस्तपालको आइसीयू कक्षमा उनलाई भर्ना गरिएको थियो । तीन दिन बित्दा पनि रिपोर्ट आएन । 'रिपोर्ट किन आएन भनेर सोधपुछ गर्दा पत्ता लाग्यो स्वाब कतै मिसिङ भएछ । फेरि पनि परीक्षणका लागि भन्दै भदौ ४ गते पुनः स्वाब दिइयो ।'-बिरामीका आफन्तले भने । आइसीयू कक्षमा रहेकी ती बिरामीमा दोस्रो परीक्षणको रिपोर्ट ६ गते आउँदा कोरोना पुष्टि भएपछि उपचारमा संलग्न स्वास्थ्यकर्मी आक्रोशित बनेका छन् भने यसले स्वास्थ्यकर्मीमा सङ्क्रमण हुने जोखिम पनि बढाएको छ ।

गण्डकी प्रदेश

तनहुँ प्रतिनिधि प्रकाशचन्द्र भट्टराईका अनुसार गण्डकी प्रदेशको मुख्य प्रवेशद्वार तनहुँको आँबुखैरेनी गाउँपालिकामा पुनः एक हप्ता लकडाउन थप गरिएको छ । भदौ ७ गते बसेको गाउँ कार्यपालिकाको बैठकले भदौ १४ गतेसम्मका लागि लकडाउन लम्ब्याएको हो । गाउँपालिकाले यस अगाडि भदौ १ गतेदेखि ७ गतेसम्म लकडाउन गर्ने निर्णय गरेको थियो । समुदायस्तरमा कोरोना फैलन सक्ने जोखिम कायमै रहेकाले एक हप्ता लकडाउन लम्ब्याउने निर्णय गरिएको गाउँपालिकाका अध्यक्ष गिरबहादुर थापाले जानकारी दिनुभयो ।

कास्की प्रतिनिधि सुशन घिमिरेका अनुसार जिल्ला प्रशासन कार्यालय कास्कीले निषेधाज्ञा पाँच दिन थप गरेको छ । प्रमुख जिल्ला अधिकारी ज्ञानप्रसाद ढकालका अनुसार भदौ ७ गते बसेको जिल्ला सङ्कट व्यवस्थापन केन्द्र (डिसिसिएमसी) को बैठकले भदौ १२ गतेसम्म निषेधाज्ञा थप्ने निर्णय गरेको हो । उहाँका अनुसार अत्यावश्यक सेवा प्रवाह गर्ने सरकारी कार्यालय र बैङ्क सीमित कर्मचारी उपस्थित गराएर खोल्न पाइने छ । कास्कीमा कोरोना सङ्क्रमण स्थानीय स्तरमा फैलिँदै गएपछि भदौ २ गतेदेखि  निषेधाज्ञा जारी गरिएको छ । बिहान ५ बजेदेखि ८ बजेसम्म र बेलुका ५ बजेदेखि ७ बजेसम्म भने खाद्यान्न तथा तरकारी पसलहरू खोल्न दिइने उहाँले बताउनुभयो ।

गोरखा प्रतिनिधि हरिराम उप्रेतीका अनुसार गोरखामा निषेधाज्ञाको अवधि एक साता थप गरिएको छ । भदौ ७ गते बसेको कोभिड-१९ सङ्कट व्यवस्थापन केन्द्रको बैठकले जारी निषेधाज्ञालाई भदौ १४ गते सम्म जारी राख्ने निर्णय गरेको हो । छिमेकी जिल्लामा कोरोना सङक्रमितको सङ्ख्या बढिरहेकाले गोरखालाई सुरक्षित राख्न थप एक साता निषेधाज्ञा गर्ने निर्णय गरिएको प्रमुख जिल्ला अधिकारी तिर्थराज भट्टराईले बताउनुभयो । निषेधाज्ञाको अवधिमा कोरोना परीक्षणको दरलाई वृद्धि गर्ने पनि बैठकले निर्णय गरेको छ । व्यापारी, बैङ्क तथा वित्तिय संस्थाका कर्मचारी, एम्बुलेन्स चालक, यातायात मजदुरको कोरोना परीक्षणको व्यवस्था मिलाउन स्थानीय तहलाई भनिएको छ । निषेधाज्ञाको अवधिमा अत्यावश्यक बाहेका सवारी, खाद्यान्न, पेट्रोलियम र औषधि बाहेकका पसल व्यवसाय पनि बन्द हुनेछन् । कोभिड-१९ को सङ्क्रमण रोकथामका लागि भएका कामको अनुगमन गर्न सहायक प्रमुख जिल्ला अधिकारीको संयोजकत्वमा अनुगमन टोली पनि गठन गरिएको छ ।

अनलाइन डेस्क