समाचारहरू

भदौ ६ गते ६ सय ३४ जनामा कोरोना सङ्क्रमण पुष्टि भएसँगै सङ्क्रमितको सङ्ख्या ३१ हजार नाघेको छ । स्वास्थ्य तथा जनसङ्ख्या मन्त्रालयका अनुसार भदौ ६ गतेसम्म सङ्क्रमितको सङ्ख्या ३१ हजार १ सय १७ पुगेको हो । गत २४ घण्टामा १२ हजार ५ सय १९ जनाको स्वाब परीक्षण गरिएको पनि मन्त्रालयले जनाएको छ । मन्त्रालयले जारी गरेको स्थिति प्रतिवेदन अनुसार भदौ ६ गतेसम्म कोरोना सङ्क्रमणका कारण १ सय ४६ जनाको मृत्यु भएको छ । भदौ ६ गते मात्रै कोरोना सङ्क्रमणका कारण नौ जनाको मृत्यु भएको छ । सङ्क्रमितमध्ये १८ हजार ३ सय ५० जना अस्पतालबाट डिस्चार्ज भएका छन् । भदौ ६ गते १ सय ३६ जना डिस्चार्ज भएका छन् भने निको दर ५८.९ प्रतिशत रहेको मन्त्रालयले जनाएको छ । १२ हजार ६ सय २१ जनाको उपचार भइरहेको छ । सङ्क्रमितमध्ये १९ प्रतिशत महिला र ८१ प्रतिशत पुरुष रहेका छन् ।

प्रदेश २
सप्तरी प्रतिनिधि मनोहरकुमार पोखरेलका अनुसार कोरोना सङ्क्रमणबाट राजविराज नपा–७ का ७७ वर्षीय पुरुषको भदौ ५ गते ग्राण्डी अस्पताल, काठमाडौँमा उपचारका क्रममा मृत्यु भएको स्वास्थ्य तथा जनसङ्ख्या मन्त्रालयले पुष्टि गरेको छ । ‘प्रोस्टेट’ को रोगले पीडित भएका उनलाई निरन्तर ज्वरो आई निमोनियाको समस्या देखिएपछि साउन ३० गते उपचारका लागि राजविराजबाट काठमाडौँ ग्राण्डी अस्पतालमा लगिएको थियो । मन्त्रालयले कोरोनाको सङ्क्रमणबाट मृत्यु भएको पुष्टि गरेपछि सोधखोज गर्दा मात्र भदौ ६ गते स्वास्थ्य कार्यालय सप्तरीले जानकारी पाएको स्वास्थ्य कार्यालय सप्तरीका निमित्त प्रमुख दुनियालाल यादवले बताउनु भयो । योसमेत सप्तरीमा मृत्यु हुनेको सङ्ख्या पाँच पुगेको छ ।

धनुषा प्रतिनिधि दिपेन्द्रप्रसाद सिंहका अनुसार नगराइन नपा–५ स्थित गङ्गुली आइसोलेशनमा सफाई कर्मचारीले सङ्क्रमितहरूलाई थर्मलगन लिएर ज्वरो चेक जाँच गर्ने गरेको भदौ ६ गते बिहान रहस्य खुलेपछि सामाजिक विकास मन्त्री नवलकिशोर साहले आइसोलेशन धनुषा प्रमुख डाक्टर जामुनप्रसाद सिंहलाई २४ घण्टे स्पष्टिकरण माग गरेको बताउनु भयो । घटनाबारे यथार्थ बुझेर दोषीलाई कारवाही गर्न आइसोलेशन प्रमुख सिंहलाई निर्देशन दिएको मन्त्री साहले इन्सेक धनुषा प्रतिनिधिलाई बताउनु भयो ।  विगत १२ दिनदेखि मिथिला बिहारी नगरपालिका एक ज्येष्ठ नागरिकलाई श्वासप्रश्वासमा समस्या भएपछि डाक्टरले सफाई कर्मचारीलाई पीपीइ सेट लगाएर ज्वरो चेकजाँच गर्न पठाएको ती कर्मचारीले बताए । कोरोना सङ्क्रमित जनकपुरका एक पत्रकारले सफाई कर्मचारीले चेकजाँच गर्दै गरेको भिडियो खिच्दै सामान्य व्यक्तिको शरीरको तापक्रम कति हुन्छ भनी सोध्दा आफूलाई थाहा नभएको र ‘स्विपर’ भएको बताएपछि रहस्य खुलेको थियो । आइसोलेशनमा बस्दै आएका ३८ जना सङ्क्रमितलाई अहिलेसम्म डाक्टरले स्वास्थ्य अवस्थाबारे सोधपुछसमेत नगरेको ति पत्रकारले बताए ।
गङ्गुलीस्थित आइसोलेशन संयोजक सञ्जय ठाकुरले आफू अहिले सपहिको आइसोलेशनमा खटिएको बताउनु भयो । हाल डाक्टर दिपु यादवले गङ्गुली आइसोलेशन संयोजक भएको बताइए पनि डाक्टर यादवले फोन नउठाउने गरेको आरोप छ । सामाजिक विकास मन्त्रालयका प्रशाशक विजय झाका अनुसार गङ्गुली आइसोलेशन सेन्टरमा अहिले ३७ जना सङ्क्रमित रहेका छन् । आइसोलेशनमा तीन जना चिकित्सकसहित तीन जना पारामेडिस, तीन जना स्वीपर र एक जना कार्यालय सहयोगी गरी १० जना कर्मचारी खटाइको छ ।
सर्लाही प्रतिनिधि बुधन साहका अनुसार कोरोना भाइरस सङ्क्रमणबाट लालबन्दी नपा–१२ घर भइ लालबन्दी नपा–७ बजारमा मम होटल व्यवसाय गर्दै आएकी ३९ वर्षीया महिलाको भदौ ६ गते बिहान उपचारको क्रममा मृत्यु भएको लालबन्दी स्वास्थ्य शाखाका सह–संयोजक सुरेन्द्र खतिवडाले बताउनु भयो । ज्वरो र रुघाखोकी आएपछि साउन ३१ गते काठमाडौँको ओम हस्पिटलमा भर्ना भएकी महिलाको उपचारको क्रममा मृत्यु भएको लालबन्दी नपा–७ का वडा अध्यक्ष दुर्गाबहादुर आलेले बताउनु भयो । सर्लाहीमा कोरोना भाइरस सङ्क्रमणबाट दुई जना महिला र दुई जना पुरुष गरी चार जनाको मृत्यु भएको सर्लाही जिल्लाका प्रमुख जिल्ला अधिकारी सुरेन्द्र पौडेलले बताउनु भयो ।
रौतहट प्रतिनिधि कोपिला तिमल्सिनाका अनुसार कोरोनो सङ्क्रमितको सङ्ख्या दिनानुदिन बढ्दै गइरहेको र सङ्क्रमणको जोखिमको सम्भावना समेत उच्च रहेकोले भदौ ६ गते बसेको जिल्लास्तरीय कोभिड–१९ सङ्कट व्यवस्थापन केन्द्रको निर्णय अनुसार ०७७ भदौ १ गतेबाट थप गरिएको निषेधाज्ञालाई भदौ १४ गते आइतबार मध्यराति सम्मलाई निरन्तरता दिइएको छ । थप गरिएको निषेधाज्ञाको अवधिमा प्रत्येक दिन बिहान ७ बजेदेखि बिहान ११ बजेसम्म अतिआवश्यक उपभोग्य खाद्यान्न पसलहरू र निर्माण सामग्रीका पसलहरू खोल्न दिइने प्रमुख जिल्ला अधिकारी इन्द्रदेव यादवले बताउनु भयो । स्वास्थ्य सम्बन्धी मापदण्डको उल्लङ्घन गर्ने/गराउने वा कार्यान्वयनमा अबरोध गर्ने/गराउने उपर सङ्क्रामक रोग ऐन, २०२० तथा स्थानिय प्रशासन ऐन, २०२८ बमोजिम कडा कारवाही गरिने प्रमुख जिल्ला अधिकारी यादवले बताउनु भयो ।

बागमती प्रदेश    

काठमाडौँमा १ सय ६०, भक्तपुरमा ५०, मकवानपुरमा ३२, चितवनमा २७, ललितपुरमा ६, दोलखामा चार, काभ्रेपलान्चोकमा तीन, नुवाकोट र धादिङ दुई/दुई र सिन्धुलीमा एक/एक जना गरी यस प्रदेशमा भदौ ६ गते २ सय ८७ जनामा कोरोना भाइरस सङ्क्रमणको पुष्टि भएको छ । यससँगै प्रदेशमा सङ्क्रमित हुनेको सङ्ख्या ४ हजार ३ सय २१ जना पुगेको छ । जसमध्ये ७ सय ३४ जना उपचारपछि घर फर्किएका छन् भने ३ हजार ५ सय ४७ जनाको उपचार विभिन्न अस्पताल तथा आइसोलेशन सेन्टरमा भइरहेको छ । भक्तपुरीकी ७३ वर्षीया महिला र मकवानपुरका ४६ वर्षीय पुरुष गरी थप दुई जनाको उपचारको क्रममा मृत्यु भएसँगै यस प्रदेशमा कोरोना भाइरस सङ्क्रमणको कारण मृत्यु हुनेको सङ्ख्या ३१ जना पुगेको छ ।

यसैबीच, काठमाडौँ महानगरपालिका-३१, बानेश्वरस्थित मिलनचोकका स्वास्थ्यकर्मी बसेको लर्ड बुद्ध गर्ल्स एण्ड ब्वाइज होस्टलका सञ्चालकलाई स्थानीयले भदौ ६ गते बिहान गालीगलौज गर्दै स्वास्थ्यकर्मी नराख्न भन्दै धम्की दिएका छन् । बलभद्र मार्गका टोल विकास समितिका अध्यक्ष सुदर्शन गौतम र सचिव दिनेश खड्काको नेतृत्वमा आएका ५०/६० जनाको समूहले कोरोना भाइरसको महामारीको समयमा अनुमति बिना स्वास्थ्यकर्मीलाई होस्टलमा राखेको भन्दै दुर्व्यवहार गरेको होस्टल सञ्चालक रोहित रानाले बताउनु भयो । सुरक्षित बासस्थानको लागि भनेर यही भदौ ४ गतेबाट सिभिल अस्पतालसँग भएको सम्झौता अनुसार स्वास्थ्यकर्मी राखेको रानाले बताउनु भयो ।  बानेश्वर वृतबाट प्रहरीको टोली आएपछि पनि गाली गर्दै सो समूह हिँडेको थियो । होस्टल सञ्चालनको सबै प्रकृया पुर्‍याई काम गर्दै आएको र आफै स्वास्थ्यकर्मी रहेका राणाले सो घटनाका कारण तनाबमा रहेको इन्सेक बगमती प्रदेशका प्रतिनिधिलाई बताउनु भयो । वडा अध्यक्ष नारायणप्रसाद भण्डारीले भने सो होस्टलमा स्वास्थ्यकर्मी बस्ने बारे जानकारी नरहेको र बिहानको घटना पनि पछि मात्र थाहा भएको बताउनु भयो । बस्तीको बीचमा रहेको होस्टलमा राति स्वास्थ्यकर्मी एम्बुलेन्समा साइरन बजाउँदै आउँदा कोरोना भाइरस सङ्क्रमितलाई राखेको आशङ्कामा स्थानीयवासीले विरोध जनाएको पाइए पनि थप जानकारी र समन्वय नभएको वडा अध्यक्ष भण्डारीले बताउनु भयो ।

दोलखा प्रतिनिधि उद्धव पोखरेलका अनुसार जिल्लामा कोरोना सङ्क्रमितको सङ्ख्या बढेसँगै भदौ ६ गतेसम्म घोषणा गरिएको लकडाउनको अवधि भदौ १० गतेसम्म बढाइएको प्रमुख जिल्ला अधिकारी भीमकान्त शर्माले बताउनु भयो । यसैबीच, जिल्लामा हालसम्म १५ जना कोरोना सङ्क्रमित भेटिएकोमा १३ जना गौरीशङ्कर गाउँपालिकाको रहेका छन् । गौरीशङ्कर गाउँपालिकाबाट भदौ २ गते १ सय ४१ जनाको स्वाब परीक्षणका लागि धुलिखेल अस्पताल पठाइएकोमा दुई जना महिलासहित चार जनाको रिपोर्ट पोजिटिभ आएसँगै सो सङ्ख्या देखिएको स्वास्थ्य कार्यालय दोलखाका प्रमुख बिभुकुमार झाले बताउनु भयो । पहिले नौ जना र हाल चारजनाको पोजिटिभ रिपोर्ट आएसँगै गोरीशंकर गाउँपालिकामा सङ्क्रमितको सङ्ख्या १३ पुगेको हो । पोजिटिभ रिपोर्ट आएका सङ्क्रमित सबै जना गौरीशंकर गाउँपालिका-५ का रहेका छन् ।

सुदूरपश्चिम प्रदेश 

अछाम प्रतिनिधि शिवराज ढुङ्गानाका अनुसार बयलपाटा अस्पतालमा कार्यरत नौ जना स्वास्थ्यकर्मी र १० जना कर्मचारी गरी १९ जनामा कोरोना पुष्टि भएपछि भदौ ५ गते साँझदेखि बयलपाट अस्पताललाई प्रहरीले सील गरेको छ । एकै पटक ठूलो सङ्ख्यामा अस्पतालकै कर्मचारी र स्वास्थ्यकर्मीमा कोरोना सङ्क्रमण देखिएपछि अन्यलाई नफैलियोस् भन्नका लागि आकस्मिक प्रसूति सल्यक्रिया र गम्भीर चोटपटकको शल्यक्रियाबाहेक अन्य सेवा बन्द गरिएको बयलपाट अस्पतालका स्वास्थ्य सेवा निर्देशक डाक्टर विकास गौचनले बताउनु भयो । कोरोना पुष्टि भएका स्वास्थ्यकर्मी र कर्मचारीलाई सोही अस्पतालमा राखेर उपचार सुरू गरिएको पनि डाक्टर गौचनले बताउनु भयो । हालसम्म जिल्लामा कोरोना सङ्क्रमितको सङ्ख्या ७ सय ८५ पुगेकोमा ७ सय ५ जना कोरोना जितेर घर फर्किसकेका छन् ।

अनलाइन डेस्क