समाचारहरू

कोरोना सङ्क्रमितको सङ्ख्या साउन १२ गते १ सय ३९ जनामा पुष्टि भएसँगै १८ हजार ७ सय ५२ पुगेको छ । स्वास्थ्य तथा जनसङ्ख्या मन्त्रालयले साउन १२ गते जारी गरेको प्रतिवेदनका अनुसार सङ्क्रमितमध्ये १३ हजार ७ सय ५४ जना अस्पतालबाट डिस्चार्ज भएका छन् । साउन १२ गते ६ सय २६ जना डिस्चार्ज भएका छन् । ४ हजार ९ सय ५० जनाको उपचार भइरहेको छ । सङ्क्रमितमध्ये निको दर ७३.३ प्रतिशत रहेको मन्त्रालयले जारी गरेको स्थिति प्रतिवेदनमा उल्लेख छ । साउन १२ गते थप दुई जनाको मृत्यु भएसँगै कोरोना सङ्क्रमणबाट मृत्यु हुनेको सङ्ख्या ४८ पुगेको छ । मन्त्रालयका अनुसार गत २४ घण्टामा ४ हजार ८ सय १८ जनाको स्वाब परीक्षण गरिएको थियो ।

प्रदेश १  

प्रदेश १ मा साउन १२ गते ५ सय १८ जनाको पीसीआर परीक्षण गरिएको छ । प्रदेश १ मा साउन १२ गतेसम्म ४० हजार १८ जनाको पीसीआर परीक्षण भएको सामाजिक विकास मन्त्रालयका प्रवक्ता डाक्टर सुरेश मेहताले बताउनुभयो ।

मोरङ प्रतिनिधि नेत्रप्रसाद अधिकारीका अनुसार कोशी अस्पताल विराटनगरमा कार्यरत एक जना डाक्टर र एक जना नर्समा कोरोना भाइरसको सङ्क्रमण पुष्टि भएपछि अस्पतालको ‘पोस्टनेटल वार्ड’ सील गरिएको छ । साउन ११ गते मध्यरातिदेखि पोस्टनेटल वार्ड सील गरी सङ्क्रमति नर्सको सम्पर्कमा रहेकाहरूको स्वाब सङ्कलन सुरू गरिएको कोशी अस्पतालका मेडिकल सुपरिटेण्डेन्ट  डाक्टर चुमनलाल दासले बताउनुभयो । विराट नर्सिङ होम (विराटनगर अस्पताल) मा कार्यरत चार जना स्वास्थ्यकर्मीमा कोरोना भाइरसको सङ्क्रमण पुष्टि भएको छ । विराटनगरमा साउन १२ गते पुष्टि भएका सात जना सङ्क्रमित मध्ये चार जना विराट नर्सिङ होममा कार्यरत नर्स हुन् । यसअघि सो नर्सिङ होमका सञ्चालकमा कोरोना भाइरसको सङ्क्रमण पुष्टि भएको थियो । उनको उपचार काठमाडौँमा भइरहेको छ ।

प्रदेश २ 

सप्तरी प्रतिनिधि मनोहरकुमार पोखरेलका अनुसार कोरोना सङ्क्रमणको जोखिम बढेपछि राजगढ गाउँपालिकाले साउन १३ गतेदेखि अनिश्चितकालका लागि सार्वजनिक सेवाहरू बन्द गर्ने निर्णय गरेको छ । गाउँपालिकाका अध्यक्ष परमानन्द यादवले साउन १२ गते एक सूचना प्रकाशित गरी अर्को सूचना नआउञ्जेल गाउँपालिकाबाट प्रदान गरिने अत्यावश्यक सेवा बाहेक सबै सेवा बन्द रहने जानकारी गराउनु भयो । विश्वव्यापी रूपमा फैलिरहेको कोरोना सङ्क्रमण समुदायमा फैलिने सम्भावनालाई मध्यनजर गर्दै जोखिम न्यूनिकरणका लागि गाउँपालिका र वडा कार्यालयहरू समेतबाट प्रवाह हुने सार्वजनिक सेवा बन्द गरिएको सूचनामा उल्लेख छ ।

गजेन्द्रनारायण सिंह अस्पताल राजविराजका निमित्त मेडिकल सुपरिटेन्डेण्ट डाक्टर रणजितकुमार झा र स्वास्थ्य कार्यालय सप्तरीका निमित्त प्रमुख दुनियालाल यादवले न्यून जनशक्ति र आवश्यक सामग्रीको अभावमा कोभिड–१९ रोकथाम र नियन्त्रणमा समस्या भएको बताउनु भएको छ । लकडाउन र निषेधाज्ञाका बीच साउन १२ गते राजविराज नगरपालिका कार्यालयमा आयोजित छलफल कार्यक्रममा आउनु भएका प्रदेश २ का मुख्यमन्त्री लालबाबु राउतलाई उहाँहरूले जनशक्ति र भिटिएमसहित स्वास्थ्य सामाग्रीको अभाव तथा तिब्रताका साथ समुदायमा फैलिरहेको कोरोनाको सङ्क्रमणले पार्ने प्रभावबारे जानकारी गराउनु भयो ।

धनुषा प्रतिनिधि दिपेन्द्र सिंहका अनुसार कमला नगरपालिकाको टेरहामा घर भएका किराना, हार्डवेयर र खाद्य सामग्रीको पसल सञ्चालन गर्दै आएका ३८ वर्षीय पुरुषको कोरोना सङ्क्रमणबाट साउन ११ गते राति मृत्यु भएको धनुषाका आइसोलेशन संयोजक डाक्टर जामुनप्रसाद सिंहले बताउनु भएको छ । डाक्टर सिंहले एक विज्ञप्ति जारी गर्दै साउन १० गते उच्च ज्वरो, खोकी र श्वासप्रश्वासको समस्या भई इमरजेन्सी वार्डबाट आइसीयू वार्डमा भर्ना गरिए पनि स्वास्थ्य अवस्थामा सुधार नभएपछि चिकित्सक र परिवारका सदस्यहरूको सल्लाहले थप उपचारको लागि सुनसरीको धरानस्थित विपी कोइराला स्वास्थ्य विज्ञान प्रतिष्ठानमा रेफर गरिएपछि बाटोमै मृत्यु भएको उल्लेख गर्नुभएको छ ।

बारा प्रतिनिधि भोलानाथ पौडेलका अनुसार फेटा गाँउपालिकाका ६० वर्षीय पुरुषको त्रिभुवन शिक्षण अस्पताल महाराजगञ्ज काठमाडौँमा साउन १२ गते बिहान २ बजेको समयमा नोबेल कोरोना भाइरस (कोभिड–१९) रोगको उपचारका क्रममा मृत्यु भएको फेटा गाँउपालिकाका अध्यक्ष अमिरिलाल प्रसादले जानकारी दिनु भयो । सङ्क्रमित मृतक पुरूष निमोनिया, मष्तिष्कघात र मृगौलाको उपचार गराइरहनु भएको गाँउपालिकाका स्वास्थ्य संयोजक कुरान अलिले बताउनु भएको छ ।

अनलाइन डेस्क