समाचारहरू

नेपालमा कोरोना सङ्क्रमितको सङ्ख्या १७ हजार ३ सय ४४ पुगेको छ । स्वास्थ्य तथा जनसङ्ख्या मन्त्रालयले साउन १ गते जारी गरेको प्रतिवेदनका अनुसार सङ्क्रमितमध्ये ११ हजार २ सय ४९ जना अस्पतालबाट डिस्चार्ज भएका छन् । ६ हजार ५६ जनाको उपचार भइरहेको छ भने ३९ जनाको मृत्यु भएको छ । गत २४ घण्टामा ४ हजार ९ सय ८१ जनाको पीसीआर विधिबाट परीक्षण गरिएकोमा १ सय ६७ जनामा कोरोना पोजेटिभ देखिएको स्वास्थ्य मन्त्रालयले जनाएको छ ।

प्रदेश १ 

मोरङ प्रतिनिधि नेत्रप्रसाद अधिकारीका अनुसार प्रदेशमा समुदायस्तरमा पनि कोरोना परीक्षण गर्ने तयारी प्रदेश सरकारले गरेको छ । पछिल्लो समय प्रदेशमा कोरोना सङ्क्रमण क्वारेण्टाइनमा मात्र देखिएको छ । समुदायमा सङ्क्रमण छैन । तर, प्रदेश सरकारले नमूनाका रूपमा समुदायस्तरमा परीक्षण गर्ने तयारी गरेको सामाजिक विकास मन्त्री जीवन घिमिरेले बताउनु भयो ।

प्रदेश २

रौतहट प्रतिनिधि कोपिला तिमल्सिनाका अनुसार परोहा नगरपालिका–७ नरकटियाका ३६ वर्षीय सङ्क्रमित युवकको असार ३१ गते उपचारका क्रममा नारायणी अस्पताल बीरगञ्जमा मृत्यु भयो । केही वर्षदेखि भारत बैङ्गलोरमा रहेर काम गरिरहेका युवक गत असार २४ गते घर फर्किएका थिए । इन्द्रबक्स गण पुरेनवाका प्रमुख कर्णेल सामन्तध्वज खाँडको सैनिक टोलीले साउन १ गते शव व्यवस्थापन गरेको हो । यसअघि फतुवाविजयपुरका २४ वर्षीय युवकको कोरोना सङ्क्रमणबाट मृत्यु भएको थियो । यो सँगै जिल्लामा मृत्यु हुनेको सङ्ख्या दुई पुगेको जिल्ला प्रशासन कार्यालय रौतहटका प्रशासकीय अधिकृत किरणनिधि तिवारीले बताउनु भयो ।

अनलाइन डेस्क