समाचारहरू

पछिल्लो २४ घण्टामा १ सय १८ जनामा कोरोना भाइरसको सङ्क्रमण पुष्टि भएको स्वास्थ्य तथा जनसङ्ख्या मन्त्रालयले जनाएको छ । मन्त्रालयका प्रवक्ता डाक्टर जागेश्वर गौतमका अनुसार असार पीसीआर परीक्षणको सङ्ख्या २६ गतेसम्म २ लाख ७५ हजार ९ सय ५१ रहेको छ । जसमा १६ हजार ६ सय ४९ जनामा कोरोना पुष्टि भएको छ । असार २६ गतेसम्म ८ हजार ११ जना निको भइ घर पर्किएका छन् भने ८ हजार ६ सय ३ जना उपचाररत छन् । कोरोनाकै कारण ३५ जनाको मृत्यु भएको छ ।

प्रदेश १ 

प्रदेशमा असार २६ गते थप चार जनामा कोरोना भाइरसको सङ्क्रमण पुष्टि भएको छ । प्रदेशमा कूल सङ्क्रमितको सङ्ख्या ७ सय ८ पुगेको छ । प्रदेश १ मा असार २६ गते डिस्चार्ज हुनेको कूल सङ्ख्या ५ सय ४१ पुगेको छ ।

मोरङ प्रतिनिधि नेत्रप्रसाद अधिकारीका अनुसार इन्सेक विराटनगर कार्यालयले असार २६ गते रङ्गेली नगरपालिकालाई स्वास्थ्य सामग्री हस्तान्तरण गरेको छ । कोरोना जोखिम न्यूनीकरणका लागि इन्सेकले स्वास्थ्य सामग्री प्रदान गरेको हो । इलाम प्रतिनिधि कोकिला ढकालका अनुसार इन्सेकले असार २६ गते माइ जोगमाई गाउँपालिकालाई कोरोना जोखिम न्यूनीकरणका लागि स्वास्थ्य सामग्री प्रदान गरेको छ ।

बागमती प्रदेश

असार २६ गते काठमाडौँमा २८, ललितपुरमा १३, भक्तपुरमा एक र अन्य जिल्लाका १० जना गरी थप ५४ जनामा कोरोना सङ्क्रमित पुष्टि भएको छ । योसँगै प्रदेशमा कोरोना भाइरसबाट सङ्क्रमित हुनेको सङ्ख्या ७ सय ७० जना पुगेको छ । जसमध्ये २ सय ७३ जना उपचारपछि घर फर्किएका छन् भने ४ सय ९१ जनाको विभिन्न अस्पताल तथा आइसोलेशन सेन्टरमा उपचार भइरहेको छ । यस प्रदेशमा हालसम्म कोरोना भाइरस सङ्क्रमणको कारण ६ जनाको मृत्यु भएको प्रदेशको सामाजिक विकास मन्त्रालयका प्रवक्ता डाक्टर पुरुषोतमराज सेढाईले बताउनु भयो ।

गण्डकी प्रदेश 

गण्डकी प्रदेशमा असार २६ गते थप १३ जनामा कोरोना भाइरसको सङ्क्रमण देखिएको छ । योसँगै गण्डकी प्रदेशमा सङ्क्रमितको सङ्ख्या १ हजार १ सय ६२ पुगेको छ भने सङ्क्रमणबाट निको हुनेको सङख्या ६ सय ३३ पुगेको गण्डकी प्रदेश स्वास्थ्य निर्देशनालयका निर्देशक डाक्टर विनोदविन्दु शर्माले जानकारी दिनुभएको छ ।

कर्णाली प्रदेश

मुगु प्रतिनिधि जीवन सेजुवालका अनुसार कोरोना भाइरस रोकथाम तथा नियन्त्रणका लागि सोरु गाउँपालिकाले स्थापना गरेको विपद् कोषबाट ३ लाख रुपियाँ उपलब्ध गराउन प्रमुख प्रशासकीय अधिकृत र लेखा प्रमुखलाई दबाब दिएर कार्यालयको काममा अवरोध पु¥याएको भन्दै गाउँपालिकाका ५८ जना कर्मचारीले संयुक्तरूपमा असार २३ गते जिल्ला प्रशासन कार्यालयमा उजुरी दिएका छन् । गाउँपालिका प्रमुख लोकबहादुर शाहीले इन्सेक प्रतिनिधिसँगको कुराकानीमा आफूमाथि लगाएको सबै आरोप झुटा रहेको भन्दै प्रमाणसहित आउन कर्मचारीलाई चुनौति दिनु भएको छ । प्रमुख जिल्ला अधिकारी कृष्णकुमार निरौलाले उक्त घटनाको अनुसन्धान गर्न सहायक प्रमुख जिल्ला अधिकारीको संयोजकत्वमा छानबिन समिति गठन गरिएको जानकारी दिनु भयो ।

सुदूरपश्चिम प्रदेश

कैलाली प्रतिनिधि मैनामोती चौधरीका अनुसार इन्सेक सुदूरपश्चिम प्रदेश कार्यालय, धनगढीले असार २६ गते गोदावरी नगरपालिका–९ बल्मीस्थित श्री राष्ट्रिय माध्यामिक विद्यालय र गौरीगङ्गा नगरपालिका–६ बनबेहडास्थित अमर माध्यामिक विद्यालयमा रहेको क्वारेण्टाइन अनुगमनका क्रममा सरकारले जारी गरेको क्वारेण्टाइन व्यवस्थापन मापदण्ड अनुसार नराखिएको क्वारेण्टाइनमा बस्दै आएकाहरूले गुनासो गरेका छन् । गोदावरी नगरपालिका–९ बल्मीस्थित श्री राष्ट्रिय माध्यामिक विद्यालयको क्वारेण्टाइनमा बस्दै आएकी ३८ वर्षीया महिलाले क्वारेण्टाइनमा बसेको ६३ दिन भइसक्दा समेत आफ्नो आरडीटी परीक्षण नगरिएको गुनासो गर्नु भयो । उहाँले भन्नु भयो–‘क्वारेण्टाइनमा पानी, खाना, बत्ति केही पनि छैन । महिनावारी भएको बेला नुहाउन र लुगा धुन समस्या रहेको छ । दुई महिना बित्दा पनि न स्वास्थ्य परीक्षण गरेको छ न घर पठाएको छ । जनप्रतिनिधिहरूले पनि चासो दिनु भएको छैन ।’ सोही क्वारेण्टाइनमा बस्दै आएका २७ वर्षीय युवकले आरडीटी पोजेटिभ आएको १८ दिन हुँदा पनि पीसीआर परीक्षण नगरेको आरोप लगाए । गोदावरी नगरपालिका–९ का वडाध्यक्ष लहानु चौधरीले अहिले नगरसभा र आर्थिक वर्षको अन्तिम क्लोजिङ्ग भएका कारण क्वारेण्टाइनमा समय दिन नसकेको स्वीकार गर्नु भयो । उहाँले भन्नु भयो–‘सरकारको मापदण्डअनुसार क्वारेण्टाइन व्यवस्थापन गर्न सकिएको छैन । कोरोना परीक्षणमा पनि ढिलाइ भएको छ ।’ गोदावरी नगरपालिका–९ बल्मीस्थित श्री राष्ट्रिय माध्यामिक विद्यालयको क्वारेण्टाइनमा अहिले चार जना महिला, सात जना बालबालिका र ६ जना पुरुष गरी १९ जना रहेका छन् ।

अनलाइन डेस्क