समाचारहरू

कोरोना भाइरसको सङ्क्रमणबाट २४ घण्टामा २ सय ५५ जना सङ्क्रमित भएको स्वास्थ्य तथा जनसङ्ख्या मन्त्रालयले जनाएको छ । मन्त्रालयका प्रवक्ता डाक्टर जागेश्वर गौतमका असार २४ गतेसम्म १६ हजार ४ सय २३ जनामा कोरोना पुष्टि भएको छ । उहाँका अनुसार ८ हजार ६ सय ३६ जनाको उपचार भइरहेको छ भने ७ हजार ७ सय ५२ जना डिस्चार्ज भएका छन् । मन्त्रालयले जारी गरेको स्थिति प्रतिवेदन अनुसार निको भएको दर ४७.२ प्रतिशत रहेको छ । कोरोना सङ्क्रमणबाट प्रदेश २ मा चार, बागमती प्रदेशमा ६, गण्डकी प्रदेशमा पाँच, प्रदेश ५ मा १०, कर्णाली प्रदेशमा चार र सुदूरपश्चिम प्रदेशमा ६ जनाको मृत्यु भएको पनि मन्त्रालयले जनाएको छ ।

प्रदेश १

प्रदेश १ मा असार २४ गते थप १७ जनामा कोरोना भाइरसको सङ्क्रमण पुष्टि भएको छ । प्रदेशमा कूल सङ्क्रमितको सङ्ख्या ७ सय २ पुगेको छ । प्रदेशमा असार २४ गते ४९ जना डिस्चार्ज भएका छन् । डिस्चार्ज हुनेको कूल सङ्ख्या ५ सय २८ पुगेको छ ।

प्रदेश २

प्रदेश २ मा असार २४ गते सात जना कोरोना सङ्क्रमित थपिएका छन् । प्रदेशमा सङ्क्रमितको सङ्ख्या ३ हजार ७ सय ६१ जना पुगेको छ । प्रदेशमा कोरोना सङ्क्रमित मध्ये २ हजार २ सय ४० जना उपचारपछि निको भएर घर फर्किएको सामाजिक विकास मन्त्रालयले जनाएको छ ।

धनुषा प्रतिनिधि दीपेन्द्रप्रसाद सिंहका अनुसार प्रादेशिक अस्पताल जनकपुरधाममा उपचार अभावमा मृत्यु भएका हंसपुर नगरपालिका–७ का १५ वर्षीय राजु सदा घटनाको छानविन गर्न गठित संसदीय समितिको समयावधि पाँच दिन थप गरिएको छ । असार २४ गतेदेखि लागु हुने गरी पाँच दिनको समयावधि प्रदेश सभाले थप गरेको हो । असार १४ गते प्रदेश सभाको बैठकले नेकपाका प्रदेश सभा सदस्य रबीन्द्र बैठाको संयोजकत्वमा पाँच सदस्यीय छानविन समिति गठन गरेको थियो । समितिको सदस्यहरूमा प्रदेश सभा सदस्य चमेली देवी दास, सुरिता कुमारी साह, नरेश कुमार यादव र सावित्री देवी साह रहनु भएको छ । संयोजक बैठाले सदाको घर तथा उनलाई राखिएको क्वारेण्टाइनको स्थलगत अवलोकन र सरोकारवालासँग छलफल गर्ने काम सम्पन्न भइसकेको बताउनु भयो । सदाको मृत्यु घटनासम्बन्धी कागजातहरू प्रादेशिक अस्पतालबाट लिएर अध्ययन गरिरहेको उहाँले बताउनु भयो । राजु सदाको मृत्यु घटना छानविन गर्न सामाजिक विकास मन्त्रालयले स्वास्थ्य निर्देशनालयका निर्देशक हरिश्चन्द्र शाहको संयोजकत्वमा असार ११ गते गठन गरेको छानविन समितिले पनि प्रतिवेदन सार्वजानिक गरेको छैन । सामाजिक विकास मन्त्रालयका सचिव डाक्टर रामप्रसाद घिमिरेले अस्पतालमै केन्द्रित रहेर समितिले अध्ययन गरिरहेकोले चाँडै नै प्रतिवेदन तयार हुने बताउनु भयो । सदाको मृत्यु असार ८ गते प्रादेशिक अस्पताल जनकपुरधाममा उपचारका क्रममा भएको थियो ।

बागमती प्रदेश

असार २४ गते काठमाडौँमा १७, ललितपुरमा ६ र अन्य जिल्लाका १३ जना गरी थप ३६ जनामा कोरोना सङ्क्रमण पुष्टि भएको छ । योसँगै प्रदेशमा कोरोना भाइरसबाट सङ्क्रमित हुनेको सङ्ख्या ७ सय ७ जना पुगेको छ जसमध्ये २ सय ६१ जना उपचारपछि घर फर्किएका छन् भने ६ जनाको मृत्यु भएको प्रदेशको सामाजिक विकास मन्त्रालयका प्रवक्ता डाक्टर पुरुषोतमराज सेढाईले बताउनु भयो ।

गण्डकी प्रदेश

गण्डकी प्रदेशमा असार २४ गते थप १६ जनामा कोरोना भाइरसको सङ्क्रमण देखिएको छ । योसँगै गण्डकी प्रदेशमा सङ्क्रमितको सङ्ख्या १ हजार १ सय २९ पुगेको छ भने सङ्क्रमणबाट निको हुनेको सङख्या ३५३ पुगेको गण्डकी प्रदेश स्वास्थ्य निर्देशनालयका निर्देशक डाक्टर विनोदविन्दु शर्माले जानकारी दिनुभएको छ ।

प्रदेश ५

असार २४ गतेसम्म प्रदेश ५ मा कोरोना भाइरसबाट सङ्क्रमित हुनेको सङ्ख्या ४ हजार २४ जना पुगेको छ । जसमध्ये २ हजार २ सय ९६ जना उपचारपछि घर फर्किएका छन् भने १० जनाको मृत्यु भएको स्वास्थ्य तथा जनसङ्ख्या मन्त्रालयको स्थिति प्रतिवेदनमा उल्लेख छ ।

कर्णाली प्रदेश

असार २४ गतेसम्म कर्णाली प्रदेशमा कोरोना भाइरसबाट सङ्क्रमित हुनेको सङ्ख्या १ हजार ६ सय २४ जना पुगेको छ जसमध्ये १ हजार २ सय ३८ जना उपचारपछि घर फर्किएका छन् भने चार जनाको मृत्यु भएको स्वास्थ्य तथा जनसङ्ख्या मन्त्रालयको स्थिति प्रतिवेदनमा उल्लेख छ ।

सुदूरपश्चिम प्रदेश

असार २४ गतेसम्म सुदूरपश्चिम प्रदेशमा कोरोना भाइरसबाट सङ्क्रमित हुनेको सङ्ख्या ३ हजार ८ सय ७१ जना पुगेको छ । जसमध्ये ९ सय ३८ जना उपचारपछि घर फर्किएका छन् भने ६ जनाको मृत्यु भएको स्वास्थ्य तथा जनसङ्ख्या मन्त्रालयको स्थिति प्रतिवेदनमा उल्लेख छ ।

अनलाइन डेस्क