समाचारहरू

पछिल्लो २४ घण्टामा ४४ जिल्लाका २ सय ९३ जनामा कोरोना भाइरसको सङ्क्रमण पुष्टि भएको स्वास्थ्य तथा जनसङ्ख्या मन्त्रालयले जनाएको छ । मन्त्रालयका प्रवक्ता डाक्टर जागेश्वर गौतमका अनुसार पछिल्लो २४ घण्टामा देशभरका २५ ओटा प्रयोगशालामा ४ हजार ७ सय १० जनाको नमुना परीक्षण भएको छ । योसँगै नेपालमा १५ हजार ७ सय ८४ जनामा कोरोना सङ्क्रमण पुष्टि भएको छ । सङ्क्रमण पुष्टि भएकामध्ये ६ हजार ५ सय ४७ जना डिस्चार्ज भएका छन् । ३४ जनाको मृत्यु भएको पनि मन्त्रालयले जनाएको छ ।

सात प्रदेशमध्ये सबैभन्दा बढी प्रदेश २ मा ४ हजार १ सय ६० जनामा सङ्क्रमण पुष्टि भएको छ । यहाँ सङ्क्रमितमध्ये २ हजार ३४ जना डिस्चार्ज भएका छन् । प्रदेश ५ मा ३ हजार ९ सय ६८ जनामा सङ्क्रमण पुष्टि भएको छ । जसमध्ये १ हजार ७ सय २५ जना डिस्चार्ज भएका छन् ।

सुदूरपश्चिम प्रदेशमा सङ्क्रमितको सङ्ख्या ३ हजार ६ सय ७८ छ भने डिस्चार्ज हुने ६ सय ८० जना छन् । कर्णाली प्रदेशमा १ हजार ५ सय ७९ सङ्क्रमितमध्ये १ हजार १ सय ९१ जना डिस्चार्ज भइसकेका छन् । गण्डकी प्रदेशमा १ हजार १ सय ४२ जना सङ्क्रमित भएका छन् । यहाँ २ सय ३४ जना डिस्चार्ज भएका छन् ।

प्रदेश १ मा ६ सय ९४ जना सङ्क्रमितमध्ये ४ सय ६९ जना डिस्चार्ज भइसकेका छन् । बागमती प्रदेशमा सबैभन्दा कम ५ सय ६३ जनामा सङ्क्रमण पुष्टि भएकोमा २ सय ३४ जना डिस्चार्ज भइसकेका छन् ।

प्रदेश २

प्रदेश २ मा असार २१ गते १ सय १५ जना कोरोना सङ्क्रमित थपिएका छन् । प्रदेशमा सङ्क्रमितको सङ्ख्या ३ हजार ७ सय ८ जना पुगेको छ । प्रदेशमा कोरोना सङ्क्रमित मध्ये २ हजार ७७ जना उपचारपछि निको भएर घर फर्किएको सामाजिक विकास मन्त्रालयले जनाएको छ ।

गण्डकी प्रदेश

गण्डकी प्रदेशमा असार २१ गते थप आठ जनामा कोरोना भाइरसको सङ्क्रमण देखिएको छ । योसँगै गण्डकी प्रदेशमा सङ्क्रमितको सङ्ख्या १ हजार ९६ पुगेको छ भने बागलुङमा एक जनाको मृत्यु भएको गण्डकी प्रदेश स्वास्थ्य निर्देशनालयका निर्देशक डाक्टर विनोदविन्दु शर्माले जानकारी दिनुभएको छ ।

इन्सेक गण्डकी प्रदेश कार्यालय, पोखराले तनहुँको भानु नगरपालिका, बन्दिपुर गाउँपालिका र कास्की जिल्लाको रुपा गाउँपालिकालाई स्वास्थ्य सामग्री उपलब्ध गराएको छ । इन्सेक गण्डकी प्रदेश संयोजक शिवप्रसाद खकुरेललगायतको टोलीले असार २१ गते उक्त स्वास्थ्य सामग्री तीन स्थानीय तहलाई हस्तान्तरण गरेको हो । स्थानीय तहलाई दुई/दुई थान थर्मल गन, एक/एक लिटर सेनिटाइजर र ५/५ सय थान मास्क उपलब्ध गराइएको संयोजक खकुरेलले बताउनु भयो ।

अनलाइन डेस्क