समाचारहरू

पछिल्लो २४ घण्टामा ४ सय ७८ जनामा कोरोना पुष्टि भएसँगै नेपालमा सङ्क्रमितको सङ्ख्या १४ हजार ५ सय ९१ पुगेको स्वास्थ्य तथा जनसङ्ख्या मन्त्रालयका प्रवक्ता डाक्टर जागेश्वर गौतमले जानकारी दिनु भयो । असार १८ गतेसम्म ५ हजार ३ सय २० जना उपचारपछि निको भएर घर फर्किएका छन् । हालसम्म कोरोनाका कारण ३१ जनाको मृत्यु भएको र ९ हजार १ सय ६८ जनाको उपचार भइरहेको मन्त्रालयले जनाएको छ । कुल सङ्क्रमितमध्ये १३ प्रतिशत महिला रहेको मन्त्रालयद्वारा जारी स्थिति प्रतिवेदनमा उल्लेख छ ।

प्रदेश २

प्रदेश २ मा असार १८ गते ५२ जना कोरोना सङ्क्रमित थपिएका छन् । प्रदेशमा सङ्क्रमितको सङ्ख्या ३ हजार ५ सय ४४ जना पुगेको छ । प्रदेशमा कोरोना सङ्क्रमित मध्ये १ हजार ९ सय २३ जना उपचारपछि निको भएर घर फर्किएको सामाजिक विकास मन्त्रालयले जनाएको छ ।

धनुषा प्रतिनिधि दीपेन्द्रप्रसाद सिंहका अनुसार जिल्ला बाहिरबाट आउनेहरूलाई अनिवार्य रूपमा १४ दिन क्वारेण्टाइनमा राख्ने निर्णय असार १७ गते गरिएको प्रमुख जिल्ला अधिकारी कोषहरी निरौलाले बताउनु भयो । कोरोना सङ्क्रमण नियन्त्रण, रोकथाम र उपचारलाई प्रदेशभर प्रभावकारी बनाउने उद्देश्यले जिल्ला प्रवेश गर्ने व्यक्तिलाई क्वारेण्टाइनमा राख्ने निर्णय गरिएको हो । जनकपुरधाममा बढी जनघनत्व भएकाले प्रवेश गर्ने अन्य जिल्लाबासीले अनिवार्य रूपमा क्वारेण्टाइन बस्नुपर्ने प्रमुख जिल्ला अधिकारी निरौलाले बताउनु भयो ।

बागमती प्रदेश

यस प्रदेशमा असार १८ गते ४८ जनामा कोरोना सङ्क्रमण पुष्टि भएको छ । प्रदेशको काठमाडौँमा २८ जना, ललितपुर, भक्तपुर, चितवन, दोलखा र काभ्रेमा दुई/दुई जना, सिन्धुपाल्चोकमा चार जना, नुवाकोट, रसुवा, सिन्धुली, मकवानपुर, रामेछाप र धादिङ जिल्लामा एक÷एक जनामा कोरोनामा सङ्क्रमण पुष्टि भएको हो । योसँगै प्रदेशमा कोरोना भाइरसबाट सङ्क्रमित हुनेको सङ्या ५ सय ५ जना पुगेको प्रदेशको सामाजिक विकास मन्त्रालयका प्रवक्ता डाक्टर पुरुषोतमराज सेढाईले बताउनु भयो ।

गण्डकी प्रदेश

गण्डकी प्रदेशमा असार १८ गते थप ३३ जनामा कोरोना भाइरसको सङ्क्रमण देखिएको छ । योसँगै गण्डकी प्रदेशमा सङ्क्रमितको सङ्ख्या १ हजार ३९ पुगेको छ भने निको हुनेको सङख्या २ सय ९६ पुगेको गण्डकी प्रदेश स्वास्थ्य निर्देशनालयका निर्देशक डाक्टर विनोदविन्दु शर्माले जानकारी दिनुभएको छ ।

कर्णाली प्रदेश

रूकम (पश्चिम) प्रतिनिधि मनिषा केसीका अनुसार क्वारेण्टाइनमा बसेकाहरूको स्वाब परीक्षणका लागि सुर्खेत, जुम्ला र दाङ पठाउँदा रिपोर्ट आउन धेरै दिन लाग्ने भएपछि चौरजहारी नगरपालिकाले कोरोना भाइरस परीक्षण गर्ने मेसिन किनेको छ । चौरजहारी नपा–२ मा निर्माण गरिएको पीसीआर परीक्षण प्रयोगशालामा पहिलो पटक असार १७ गते चार जनाको स्वाब परीक्षण गरिएको निमित्त प्रमुख प्रशासकीय अधिकृत रामबहादुर केसीले जानकारी दिनु भयो ।

सल्यान प्रतिनिधि मीना बुढाथोकीका अनुसार बनगाड कुपिण्डे नगरपालिका–३ स्थित आधारभूत विद्यालय लहाघाटको क्वारेण्टाइनमा जेठ १९ गतेदेखि बसेका ७३ जनामध्ये ७० जना भागेर घर गएका छन् । उनीहरूले प्रहरीहरूलाई ढुङ्गामुढा गरेर त्यहाँबाट भागेको नगरपालिकाका मेयर गोविन्दकुमार पुनले जानकारी दिनु भयो । उनीहरू क्वारेण्टाइनमा बसेको १७ दिनपछि स्वाब सङ्कलन गरी प्रादेशिक अस्पताल सुर्खेत पठाइएको थियो । एक महिनासम्म क्वारेण्टाइनमा बस्नुपरेको र रिपोर्ट पनि समयमा नआएको भन्दै उनीहरू क्वारेण्टाइनबाट भागेका हुन् । मेयर पुनले सुर्खेत पठाएको स्वाब त्यहाँ मेसिन बिग्रिएपछि नेपालगञ्ज पठाइएको र नेपालगञ्जले पनि आजभोलि भन्दै टारेकाले समस्या भएको बताउनु भयो । सो नगरपालिकामा मात्रै भारतबाट आएका झण्डै २५ सय नागरिकहरूको क्वारेण्टाइनमा व्यवस्थापन गरिएको थियो । तर, अहिले क्वारेण्टाइनमा १ सयको हाराहारीमा मात्रै मानिसहरू रहेका छन् । क्वारेण्टाइनबाट भागेकाहरूको खोजी भइरहेको मेयर पुनले बताउनु भयो ।

अनलाइन डेस्क