समाचारहरू

कोरोना भाइरस (कोभिड¬ १९) को सम्भावित महामारीलाई रोक्न सरकारले गम्भीर प्रकृतिको मुद्दा नलागेको कैदीहरूलाई रिहा गर्ने निर्णय गरेअनुसार जिल्ला कारागारबाट तीन जना कैदी रिहा भएका छन् ।

सरकारी कागज किर्ते मुद्दामा फुङलिङ नगरपालिका– २ का ३० वर्षीया दुर्गा लिम्बू चैत २३ गते रिहाई भएसँगै जिल्ला कारागाराबाट रिहा हुनेको सङ्ख्या तीन पुगेको जेलर सुरेन्द्र मुखियाले बताउनुभयो । यस अघि  कारागारबाट बाल यौन दुव्र्यवहार मुद्दामा कैद सजाय भुक्तान गरिरहेका हिलिहाङ गाउँपालिका –१ का १८ वर्षीय लक्षु भनीने लक्ष्मी बस्नेत र सवारी ज्यान मुद्दामा कैद सजाय भुक्तान गरीरहेका फिदिम नगरपालिका–३ का २८ वर्षीय डिकबहादुर मुखिया चैत १४ गते रिहा भएका हुन् ।

यौन दुव्र्यवहार मुद्दामा जिल्ला अदालतको आदेश अनुसार भदौ २८ गते २५ हजार धरौटी बुझाई तारिखमा छुटेका बस्नेत विरुद्ध सोही अदालतले पुष कसुर ठहर गर्दै ६ महिना कैद, १५ हजार क्षतिपूर्ति र १० हजार जरिवाना हुने फैसला गरेपनि उनी कैद भूक्तानका लािग कारागारमा रहेका थिए । यसैगरी, फिदिम नगरपालिक–१ का ७२ वर्षीय डिल्लीप्रसाद अर्याललाई ०७६ पुस २५ गते सवारी साधनले ठक्कर दिएको आरोपमा मुखियालाई प्रहरीले माघ २ गते गिरफ्तार गरेको थियो । पीडितको उपचारका क्रममा माघ १ गते मोरङको विराटनगर स्थित नावेल मेडिकल अस्पतालमा मृत्यू भएको थियो । आरोपित माघ २३ गतेदेखि पूर्पक्षमा रहेक थिए । सोही अदालतले फागुन ३० गते ६ महिना कैद र २ हजार जरिवाना हुने गरी गरेको फैसला अनुसार कसुरदार कारागारमा रहेका थिए ।

ङ श्रेणीको २५ जना राख्न सकिने जिल्ला कारागारमा हाल कारागारको क्षमता भन्दा छ गुणा बढी कैदी बन्दी हुँदा व्यवस्थापनमा समस्या आएको जेलर मुखियाले बताउनुभयो । कोरोना भाइरसवाट बच्न सामाजिक दुरी कायम गर्नु पर्ने भए पनि कारागारको भौतिक संरचनाको क्षेत्रफलले सो व्यवस्था कायम गर्न कठिनाई भएको जेलर मुखियाको भनाइ छ ।

 

 

मङ्गल बेघा