समाचारहरू

स्वास्थ्य तथा जनसङ्ख्या मन्त्रालयका अनुसार यो एक साताको अवधिमा २३ हजार २ सय ७० ओटा स्वाब परीक्षण गर्दा ९ सय २४ जनामा कोभिड–१९ को सङ्क्रमण देखिएको छ । एक सातामा ५ सय ९२ जना सङ्क्रमित निको भए भने आठ जनाको मृत्यु भएको पनि मन्त्रालयले जनायो ।

बागमती प्रदेश

यस प्रदेशमा चैत १६ गते कोभिड–१९ सङ्क्रमितको सङ्ख्या जम्मा १ लाख ५२ हजार ६ सय ९७ जना पुगेको छ । अघिल्लो साता १ लाख ५२ हजार १ सय ७८ जना कोभिड–१९ का सङ्क्रमित रहेकोमा यो साता ५ सय १९ जना सङ्क्रमित थपिएका छन् । यो साता अघिल्लो साताभन्दा १ सय ६ जना बढीले कोभिड–१९ का सङ्क्रमित थप भएका हुन् ।

यस प्रदेशका कूल सङ्क्रमितमध्ये १ लाख ५१ हजार १ सय ४६ जना उपचारपछि निको भइसकेका छन् भने विभिन्न अस्पतालका आइसोलेशन तथा होम आइसोलेशनमा ५ सय ३३ जना उपचाररत छन् । अघिल्लो हप्ता सक्रिय सङ्क्रमतिको सङ्ख्या ३ सय ३२ जना रहेकोमा यो हप्ता २ सय १ जना बढ्न गई ५ सय ३ जना पुगेको हो ।

चैत १६ गतेसम्म मृत्यु हुनेको सङ्ख्या भने १ हजार १८ जना पुगेको छ । यो अघिल्लो हप्ता भन्दा दुई जनाले मात्रै बढी हो । यस प्रदेशमा कोभिड–१९ बाट मृत्यु हुनेको दर ०.६७ प्रतिशत रहेको छ । अघिल्लो साता ३९.६० प्रतिशत महिला र ६०.४० प्रतिशत पुरुष सङ्क्रमित भएकोमा चैत १० गते ३९.६० प्रतिशत महिला र ६०.४० प्रतिशतको अनुपातमा महिला र पुरुषको सङ्क्रमित प्रतिशत रहेको छ ।

बागमती प्रदेशमा अघिल्लो साता देशको कूल सङ्क्रमणको सङ्ख्या ५५.१० प्रतिशत रहेकोमा चैत १६ गते पनि सोही प्रतिशत कायम रहेको छ । यस प्रदेशमा कोभिड–१९ सङ्क्रमण पुष्टि भएका मध्येमा अघिल्लो साता ९९.११ प्रतिशतको हाराहारीमा निको हुनेको सङ्ख्या रहेकोमा चौत १६ गते आइपुग्दा यो सङ्ख्या ९८.९८ प्रतिशतमा झरेको छ । कोभिड १९ विरुद्ध पहिलो र दोस्रो चरणको खोप कार्यक्रममा लक्ष्य ६ लाख २ हजार ६ सय को ४६ जना रहेकोमा ३ लाख ९५ हजार ५६ जनाले खोप लागाएका छन् । जुन लक्ष्यको ६५.५५ प्रतिशत मात्र पुरा भएको सामाजिक विकास मन्त्रालयले जनाएको छ ।

लुम्बिनी प्रदेश

लुम्बिनी प्रदेशमा यो साता महिला २१ जना र पुरुष ४७ जना गरी ६८ जनामा कोभिड सङ्क्रमण पुष्टि भएको छ । यो साता सबैभन्दा बढी बाँके जिल्लामा १६ जनामा सङ्क्रण पुष्टि भएको स्वास्थ्य मन्त्रालयको तथ्याङ्कले देखाएको छ । गत साता सङ्क्रमित हुनेको सङ्ख्या ९० रहेको थियो ।

सुदूरपश्चिम प्रदेश

स्वास्थ्य तथा जनसङ्ख्या मन्त्रालयका अनुसार सुदूरपश्चिम प्रदेशमा चैत १० गतेदेखि चैत १६ गतेसम्म सात जना महिला सहित ३१ जनामा सङ्क्रमण पुष्टि भएको छ । चैत १६ गते मात्रै सुदूरपश्चिमका डडेल्धुरा जिल्लामा एक पुरुष, डोटीमा एक पुरुष, कैलालीमा तीन महिला सहित १० जनामा र कञ्चनपुरमा दुई पुरुष गरी जम्मा १४ जनामा सङ्क्रमण पुष्टि भएको छ । सुदूरपश्चिम प्रदेशमा मृत्यु हुनेको सङ्ख्या ६७ जना पुगेको भएपनि यो साता कोभिडका कारण मृत्यु भएन । हालसम्म सुदूरपश्चिम प्रदेशमा ३ हजार ९ सय ३२ जना महिला र ११ हजार १ सय २४ जना पुरुष गरी १५ हजार ५६ जनामा कोभिड पुष्टि भएको छ । नेपाल सरकारले सञ्चालन गरेको पहिलो र दोस्रो चरणको कोभिड–१९ विरुद्धको खोप अभियानमा सुदूरपश्चिम प्रदेशका १ लाख ४९ हजार ५ सय ७९ जनाले खोप लिएका छन् ।

अनलाइन डेस्क