समाचारहरू

स्वास्थ्य तथा जनसङ्ख्या मन्त्रालयका अनुसार यो एक साताको अवधिमा परीक्षण गरिएकामध्ये ४६ प्रतिशतमा सङ्क्रमण पुष्टि भएको छ । सङ्क्रमित मध्ये नौ प्रतिशत १९ वर्ष मुनीका व्यक्तिलाई कोभिड सङ्क्रमण देखिएको छ । यो साता प्रतिदिन ७१ जना सङ्क्रमितको मृत्यु भएको तथ्याङ्कले देखाउँछ । मन्त्रालयले एक सातामा १ लाख ३० हजार ९ सय ६६ ओटा स्वाब परीक्षण गर्दा ६० हजार ५ सय ९३ जनामा कोभिड–१९ को सङ्क्रमण देखिएको जनाएको छ । एक सातामा २० हजार ७ सय ७९ जना सङ्क्रमित निको भए भने ४ सय ९७ जनाको मृत्यु भएको पनि मन्त्रालयले जनायो । नेपालमा कोभिड–१९ को दोस्रो लहर सुरू भएसँगै सङ्क्रमितको दर पनि ह्वात्तै बढेको छ । देशका ७० जिल्लामा पूर्ण तथा आंशिक निषेध आदेश जारी गरी कोभिड नियन्त्रणको पहल गरिएको गृह मन्त्रालयले जनाएको छ ।

एक साताको अवधिमा कोभिड परीक्षण, सङ्क्रमित, निको भएका र मृत्यु
विवरण	२७ गते	२६ गते	२५ गते	२४ गते	२३ गते	२२ गते	२१ गते	जम्मा
परीक्षण	१७६२३	१८७८७	१७३१५	१९९८७	२०३६७	२०७५६	१६१३१	१३०९६६
सङ्क्रमित	९२७१	८८५०	८२८७	९०२३	८९७०	८६०५	७५८७	६०५९३
१९ वर्ष मुनीकालाई सङ्क्रमण	७४९	८५४	७५६	८०४	८१७	७३७	६२६	५३४३
निको भएका	४००७	४०२२	३३७०	२९०५	२७०७	१९९३	१७७५	२०७७९
मृत्यु	१३९	८८	५३	५०	५४	५८	५५	४९७

 गण्डकी प्रदेश

गण्डकी प्रदेशमा वैशाख २१ गतेबाट वैशाख २७ गतेसम्म थप ४ हजार १ सय १९ जनामा कोभिड–१९ सङ्क्रमण देखिएको छ । जसमध्ये २ हजार ३ सय १९ जना पुरुष र १ हजार ८ सय जना महिला रहेका छन् । यो सगै प्रदेशमा कुल सङ्क्रमितको सङ्ख्या २६ हजार ३ सय ४८ रहेको छ । नेपाल सरकार स्वास्थ्य तथा जनसङ्ख्या मन्त्रालयको वैशाख २७ गतेको तथ्याङक अनुसार गण्डकी प्रदेशमा रहेका सक्रिय सङ्क्रमित मध्ये ६ हजार ७ जना होम आइसोलेशनमा रहेका छन् भने ९३ जना संस्थागत आइसोलेशन, ७३ जना आइ.सि.यू र ११ जना भेन्टिलेटरमा रहेका छन् । कोभिड १९ सङ्क्रमण बढेसगै कास्की, स्याङजा, गोरखा, नवलपुर र बागलुङ जिल्लामा निषेधाज्ञा जारी गरिएको छ भने पर्वत, तनहुँ, म्याग्दी जिल्लाका केही स्थानीयतहहरु बन्द गरिएका छन् । हाल कास्की, गोरखा, नवलपुर मा ५०० भन्दा बढी सक्रिय सङ्क्रमित रहेका छन् भने तनहुँ, म्याग्दी, स्याङजा र पर्वतमा २०० भन्दा बढी सक्रिय सङ्क्रमित रहेका छन् । सामाजिक विकास मन्त्रालय, स्वास्थ्य निर्देशनालय गण्डकी प्रदेशको वैशाख २७ गतेको तथ्याङ्क अनुसार गत २४ घण्टामा कोभिड १९ सङ्क्रमणले १३ जनाको मृत्यु भएको छ । योसँगै प्रदेशमा कोभिड १९ सङ्क्रमणले २ सय ७३ जनाको मृत्यु भएको छ ।

लुम्बिनी प्रदेश

कोभिड सङ्क्रमण बढ्दै गएपछि प्रदेशका १२ वटै जिल्लामा निषेध आदेश जारी भएको छ । लुम्बिनी प्रदेशमा यस साता महिला ४ हजार ८ सय ६७ जना र पुरुष ६ हजार ५ सय २७ जना गरी ११ हजार ३ सय ९३ जनामा कोभिड सङ्क्रमण पुष्टि भएको छ । यस साता सबै भन्दा बढी रुपन्देही जिल्लामा  ४ हजार ८ सय  १ जना र सबैभन्दा कम रुकुम पुर्व जिल्लामा ९ जना सङ्क्रमित रहेका भए । यसैगरी, अर्घाखाँचीमा २ सय ५१ जना, बर्दियामा ४ सय १० जना, दाङमा १ हजार ८ सय २२ जना , गुल्मीमा १ सय ५१ जना , कपिलवस्तुमा ३ सय ४५ जना, पाल्पामा ६ सय २२ जना, प्यूठानमा ५८ जना, रोल्पामा ६९ जना, बाँकेमा २ हजार ३ सय २६ जना र नवलपरासी पश्चिममा ५ सय २९ जनामा सङ्क्रमण पुष्टि भयो । प्रदेशमा सक्रिय सङ्क्रमितको सङ्ख्या ९ सय रहेको छ । लुम्बिनी प्रदेशमा १७ हजार ८ सय ८९ जना होम आइसोलेशन, २ हजार ५  जना संस्थागत आइसोलेशन, ८६ जना आइसियु र १६ जना भेन्टिलेटरमा रहेका छन् । प्रदेशमा सक्रिय सङ्क्रमित बाँके, दाङ, कपिलवस्तु, पाल्पा, नवलपरासी पश्चिम र रुपन्देहीमा रहेका छन् । मृत्यु हुनेमा सबै भन्दा बढी ५ सय ६ जना  १६ देखि ५९ वर्ष उमेर समूहका रहेका छन् । प्रदेश स्वास्थ्य निर्देशनालय, बुटवलका अनुसार पछिल्लो २४ घण्टामा प्रदेशमा २९ जनाको मृत्यु भएको छ भने हालसम्म उपचारका लागि बाहिरी जिल्लाबाट आउने समेत गरी ८ सय ५६ जनाको मृत्यु भएको छ । प्रदेशमा हालसम्म ५४ हजार ५ सय ३३ जना सङ्क्रमित मध्ये ३५ हजार ७ सय ८० जना निको भएका छन् ।

सुदूरपश्चिम प्रदेश

स्वास्थ्य तथा जनसङ्ख्या मन्त्रालयका अनुसार सुदूरपश्चिम प्रदेशमा २०७८ वैशाख २१ गतेदेखि २०७८ वैशाख २७ गतेसम्म १ हजार ६२ जना महिला सहित ३ हजार २ सय २१ जनामा सङ्क्रमण पुष्टि भएको छ । वैशाख २७ गते मात्रै सुदूरपश्चिमका अछाम जिल्लामा ९१ महिला सहित ३ सय ३२ जना, बैतडीमा १ सय २७ महिला सहित ४ सय १४ जना , बझाङमा तीन महिला सहित १३ जना, बाजुरामा एक महिला सहित पाँच जना, डडेल्धुरामा ७० महिला सहित  २ सय ४८ जना, दार्चुलामा १२ महिला सहित ४३ जना डोटीमा ४३ महिला सहित १ सय ७५ जना, कैलालीमा ४ सय ९१  महिला सहित १ हजार ३ सय ५१ जना , कञ्चनपुरमा २ सय २४ महिला सहित ६ सय ४० जना गरी ३ हजार २ सय २१ जनामा  सङ्क्रमण पुष्टि भएको छ । अघिल्लो २४ घण्टमा १७ जनाको मृत्यु भएसँगै सुदूरपश्चिम प्रदेशमा मृत्यु हुनेको सङ्ख्या २ सय २५ जना पुगेको सुदूरपश्चिम प्रदेश समाजिक विकास मन्त्रालय स्वास्थ्य निर्देशनालय राजपुर, डोटीले जनाएकोे छ । आइसियुमा २४ जना र भेन्टीलेटरमा आठ जनाको उपचार भइरहेको र ४३ जना निको भएको निर्देशनालयले जनाएको छ । यस प्रदेशमा १ सय ८७ जना महिला सहित ८ सय ३७ जना आइसोलेसनमा बसेका छन ।  नेपाल सरकारले सञ्चालन गरेको पहिलो र दोस्रो चरणको कोभिड १९ विरुद्धको खोप अभियानमा सुदूरपश्चिम प्रदेशमा चैत १५ गतेसम्म २ लाख २ हजार ८ सय ८ जनाले खोप लिएको सुदूरपश्चिम प्रदेश सामाजिक विकास मन्त्रालयले जनाएको छ ।

अनलाइन डेस्क