समाचारहरू

स्वास्थ्य तथा जनसङ्ख्या मन्त्रालयका अनुसार यो एक साताको अवधिमा परीक्षण गरिएकामध्ये १३.२५ प्रतिशतमा कोभिड सङ्क्रमण पुष्टि भएको छ । गत साता १८ प्रतिशतमा कोभिड सङ्क्रमण पुष्टि भएको थियो । त्यसअघिको साता २० प्रतिशतमा कोभिड पुष्टि भएको थियो । यो साता प्रतिदिन सरदर १८ जनाको मृत्यु भएको तथ्याङ्कले देखाउँछ । अघिल्लो साता प्रतिदिन २८ जना सङ्क्रमितको मृत्यु भएको थियो । मन्त्रालयले एक सातामा ७२ हजार ६ सय ९२ ओटा स्वाब परीक्षण गरिएको जनाएको छ । यो साता ९ हजार ६ सय ३५ जनामा कोभिड–१९ को सङ्क्रमण देखिएको मन्त्रालयले जनाएको छ । एक सातामा १४ हजार ३ सय ८१ जना सङ्क्रमित निको भए भने १ सय २८ जनाको मृत्यु भएको मन्त्रालयले जनायो ।

प्रदेश १

स्वास्थ्य तथा जनसङ्ख्या मन्त्रालयका अनुसार ०७८ भदौ १५ गतेदेखि भदौ २१ गतेसम्मको अवधिमा झापामा ३ सय ९ जना पुरूष र ३ सय ३१ जना महिला गरी ६ सय ४० जनामा कोभिड–१९ को सङ्क्रमण पुष्टि भएको छ । त्यसैगरी सुनसरीमा २ सय १४ जना पुरूष र १ सय ९२ जना महिला गरी ४ सय ६ जना, मोरङमा ३ सय १६ जना पुरूष र २ सय ९२ जना महिला गरी ६ सय ८ जना, पाँचथरमा तीन जना पुरूष र तीन जना महिला गरी ६ जना, सङ्खुवासभामा ६ जना पुरूष र तीन जना महिला गरी ६ जना, उदयपुरमा १० जना पुरूष र सात जना महिला गरी १७ जना, भोजपुरमा ६ जना पुरूष र सात जना महिला गरी १३ जना, धनकुटामा १६ जना पुरूष र १९ जना महिला गरी ३५ जना, इलाममा २९ जना पुरूष र २७ जना महिला गरी ५६ जना, खोटाङमा नौ जना पुरूष र दुई जना महिला गरी ११ जना, ओखलढुङ्गामा सात जना पुरूष र दुई जना महिला गरी नौ जना, सोलुखुम्बमा दुई जना पुरूष, ताप्लेजुङमा पाँच जना पुरूष र पाँच जना महिला गरी १० जना र तेहृथुममा सात जना पुरूष र एक जना महिला गरी आठ जनामा कोभिड–१९ को सङ्क्रमण पुष्टि भएको छ । प्रदेश १ मा रहेका कोशी कोभिड–१९ अस्पताल,प्रदेश जनस्वास्थ्य प्रयोगशाला, वीपी कोइराला स्वास्थ्य विज्ञान प्रतिष्ठान घोपा प्रयोगशाला, मेची अस्पताल प्रयोगशाला, कोटीहोम प्रयोगशाला, नोवेल अस्पताल प्रयोगशाला, विराट अस्पताल प्रयोगशाला र न्यूरो अस्पताल प्रयोगशालामा गरिएको कोभिड–१९ को परीक्षणमा प्रदेश १ मा एक साताको अवधिमा १ हजार ८ सय ३० जनामा कोभिड–१९ को सङ्क्रमण पुष्टि भएको स्वास्थ्य तथा जनसङ्ख्या मन्त्रालयले जनाएको छ ।

बागमती प्रदेश 

यस प्रदेशमा भदौ २१ गते कोभिड–१९ सङ्क्रमितको सङ्ख्या जम्मा ४ लाख १९ हजार ३ सय ८५ जना पुगेको छ । अघिल्ला हप्ता ४ लाख १२ हजार ८ सय ३३ जना कोभिड–१९ का सङ्क्रमित रहेका थिए ।  यो हप्ता ६ हजार ५ सय ५२ जना बढीले कोभिड–१९ का सङ्क्रमित थप भएका हुन् । यस प्रदेशका कूल सङ्क्रमितमध्ये ४ लाख १ हजार ६ सय ३६ जना उपचारपछि निको भइसकेका छन् भने विभिन्न अस्पतालका आइसोलेशन तथा होम आइसोलेशनमा १३ हजार ४ सय १३ जना उपचाररत रहेका छन् । अघिल्लो हप्ता सक्रिय सङ्क्रमतिको सङ्ख्या ९ हजार ४  सय ४९ जना रहेकोमा यो हप्ता ३ हजार ९सय ६४ जना बढ्न गई १३ हजार ४ सय १३ जना जना पुगेको हो । यस प्रदेशमा भदौ २१ गतेसम्म मृत्यु हुनेको सङ्ख्या भने ४ हजार ३ सय ३६ जना पुगेको छ । यो अघिल्लो हप्ता भन्दा ५२ जनाले बढी हो । यस प्रदेशमा कोभिड–१९ बाट मृत्यु हुनेको दर १.०३ प्रतिशत रहेको छ । यस प्रदेशमा कोभिड–१९ सङ्क्रमण पुष्टि भएका मध्येमा अघिल्लो हप्ता ९५ प्रतिशतको हाराहारीमा निको हुनेको सङ्ख्या रहेकोमा भदौ २१ गते आइपुग्दा यो सङ्ख्या ९५.७७ प्रतिशत रहेको छ । यस प्रदेशमा भदौ २१ गतेसम्म कोभिड–१९ विरुद्ध दुवै मात्राको खोप लगाएकाको सङ्ख्या १८ लाख ४१ हजार ४ सय ४७ जना अर्थात ३२ प्रतिशतले लगाइसकेका छन् । यसैगरी कुनै एक मात्र खोप लगाउनेको सङ्ख्या ६ लाख ६ हजार १ सय ३३ जना अर्थात १० प्रतिशतले प्राप्त गरिसकेका छन् । कुनै पनि खोप नलगाएका १८ वर्षमाथिकाको सङ्ख्या ३३ लाख ८० हजार ७ सय ९० जना अर्थात ५८ प्रतिशत रहेको छ । अघिल्लो हप्ता कुनै पनि खोप नलगाउनेको सङ्ख्या ६५ प्रतिशत रहेको थियो । 

गण्डकी प्रदेश

प्रदेश सरकार स्वास्थ्य तथा जनसङ्ख्या मन्त्रालय, स्वास्थ्य निर्देशनालय गण्डकी प्रदेशको भदौ २१ गतेको तथ्याङ्क अनुसार प्रदेशमा कुल ८२ हजार ६ सय ८१ जना कोभिड–१९ बाट सङ्क्रमित भएका छन् । हाल कास्की, बागलुङ, स्याङजा, गोरखा र नवलपरासी पूर्वमा ५ सय जनाभन्दा बढी सक्रिय सङ्क्रमित रहेका छन् भने तनहुँ, लमजुङ र पर्वतमा २ सय जनाभन्दा बढी सक्रिय सङ्क्रमित रहेका छन् । गण्डकी प्रदेशमा रहेका सक्रिय सङ्क्रमितमध्ये ६ हजार ४ सय ७० जना होम आइसोलेशन, २ सय ९२ जना संस्थागत आइसोलेशनमा, ७७ जना आइसियूमा र पाँच जना भेण्टीलेटरमा रहेका छन् । गण्डकी प्रदेशमा कोभिड–१९ सङ्क्रमणले १ हजार ३ सय १५ जनाको मृत्यु भएको छ । प्रदेशका विभिन्न स्थानीय तहमा यो साता खोप कार्यक्रम जारी रहयो । प्रदेश सरकार स्वास्थ्य जनसङ्ख्या मन्त्रालयको तथ्याङ्क अनुसार भदौ २० गतेसम्म गण्डकी प्रदेशमा ४ लाख ३२ हजार ७ सय ५० जनाले कोभिड १९ विरुद्धको पूर्ण खोप लगाएका छन् भने ५ लाख ९२ हजार ७२ जनाले खोपको पहिलो मात्रा लगाएका छन् । गण्डकी प्रदेशका मुख्यमन्त्री कृष्णचन्द्र नेपाली पोखरेलले भदौ १६ गते पोखरा स्वास्थ्य विज्ञान प्रतिष्ठान मातहतको पश्चिमाञ्चल क्षेत्रीय अस्पताल अनुगमन गर्नुभएको थियो । कोभिडको तेस्रो लहर आउने आंकलन स्वास्थ्यविदहरुले गरिरहेका बेला अस्पतालले गरेको तयारीबारे जानकारी लिन मुख्यमन्त्री आकस्मिक रुपमा अनुगमनमा निस्केका थिए । मुख्यमन्त्रीले कोभिड वार्ड, अक्सिजन प्लान्ट, अक्सिजन आपूर्ति केन्द्र, मेडिकल वार्ड, प्रसूति वार्ड र एनआइसीयू वार्ड अनुगमन गर्नुभएको थियो । तेस्रो लहरको प्रभाव बालबालिकामा हुने अनुमान गरिएकामा अस्पताललाई त्यही अनुसारको तयारी गर्न मुख्यमन्त्री पोखरेलले अस्पताल प्रशासनलाई अनुगमन गरी निर्देशन दिनुभएको थियो ।

सुदूरपश्चिम प्रदेश

सुदूरपश्चिम प्रदेश समाजिक विकास मन्त्रालय स्वास्थ्य निर्देशनालय राजपुर, डोटीका अनुसार सुदूरपश्चिम प्रदेशमा २०७८ भदौ १५ गतेदेखि २०७८ भदौ २१ गतेसम्म २ सय ७ जनामा सङ्क्रमण पुष्टि भएको छ । भदौ २१ गते मात्रै सुदूरपश्चिमका बैतडी एक, बझाङ एक, डडेल्धुरा तीन, कैलाली १९, कञ्चनपुरमा एक जना र अन्य जिल्लामा एक जना गरी २६ जनामा सङ्क्रमण पुष्टि भएको छ । हालसम्म ५ सय ८५ जनाको मृत्यु भएको भएपनि अघिल्लो २४ घण्टामा सुदूरपश्चिम प्रदेशका कुनै पनि जिल्लामा कोभिड सङ्क्रमणका कारण मृत्यु नभएको सुदूरपश्चिम प्रदेश समाजिक विकास मन्त्रालय स्वास्थ्य निर्देशनालय राजपुर, डोटीले जनाएको छ । भदौ २१ गतेसम्म ४८ जना महिलासहित १ सय २३ जना होम आइसोलेशनमा रहेका छन् भने आइसियुमा सात जना, कोभिड वार्डमा एक जना र भेन्टीलेटरमा ६ जनाको उपचार भइरहेको मन्त्रालयले जनाएको छ । हालसम्म ३ लाख १८ हजार  ९ सय ४ जनाको कोभिड परीक्षण भएकोमा ४६ हजार ४ सय ६१ जनामा सङ्क्रमण पुष्टि भइसकेको छ । स्वास्थ्य तथा जनसङ्ख्या मन्त्रालयका अनुसार सुदूरपश्चिम प्रदेशमा कोभिशिल्ड पहिलो खोप पाउनेको सङ्ख्या २ लाख २५ हजार ४ सय १६ जना रहेकोमा कोभिशिल्ड दोस्रो खोप १६ हजार ५ सय १९ जनाले मात्रै पाएका छन् । यसैगरी भेरोसेल पहिलो खोप पाउनेको सङ्ख्या २ लाख ४३ हजार ७६ जना रहेकोमा भेरोसेल दोस्रो खोप १ लाख ५८ हजार ८ सय ८८ जनाले मात्रै पाएका छन् । जोन्सन एण्ड जोन्सन कम्पनीको खोप १ लाख ३३ हजार ७ सय जनालाई लगाइएको छ ।

अनलाइन डेस्क