समाचारहरू

स्वास्थ्य तथा जनसङ्ख्या मन्त्रालयका अनुसार यो एक साताको अवधिमा परीक्षण गरिएकामध्ये १९.७१ प्रतिशतमा कोभिड सङ्क्रमण पुष्टि भएको छ । गत साता २५ प्रतिशतमा कोभिड सङ्क्रमण पुष्टि भएको थियो । यो साता प्रतिदिन सरदर २९ जनाको मृत्यु भएको तथ्याङ्कले देखाउँछ । अघिल्लो साता प्रतिदिन ३० जना सङ्क्रमितको मृत्यु भएको थियो । मन्त्रालयले एक सातामा ७१ हजार ७ सय ३० ओटा स्वाब परीक्षण गरिएको जनाएको छ । यो साता १४ हजार १ सय ४३ जनामा कोभिड–१९ को सङ्क्रमण देखिएको मन्त्रालयले जनाएको छ । एक सातामा १४ हजार ९ सय ५७ जना सङ्क्रमित निको भए भने २ सय ६ जनाको मृत्यु भएको मन्त्रालयले जनायो ।

प्रदेश २

भदौ १ गतेदेखि ७ गतेसम्ममा प्रदेश २ अन्तर्गतका आठ जिल्लामध्ये सप्तरीमा एक ३५ वर्षीया महिलाको कोभिड सङ्क्रमणबाट मृत्यु भएको प्रदेश २ स्वास्थ्य निर्देशनालयले जनाएको छ । यो साता प्रदेश २ मा ३८ जना सङ्क्रमित थपिएको निर्देशनालयले जनाएको छ । जसमध्ये सप्तरीमा तीन, सिरहामा सात, धनुषामा नौ, महोत्तरीमा एक, सर्लाहीमा पाँच, रौतहटमा दुई, बारामा दुई र पर्सामा नौ जना व्यक्ति कोभिड सङ्क्रमित थपिएका हुन् । हालसम्म यस प्रदेशमा ३७ हजार ९ सय ८८ जना कोरोना सङ्क्रमित मध्ये ३६ हजार ८ सय १५ जना उपचारपछि घर फर्किएको स्वास्थ्य निर्देशनालयले जनाएको छ । प्रदेश २ मा भदौ ७ गतेसम्म कोरोना सङ्क्रमणबाट १ हजार ३४ जनाको मृत्यु भएको निर्देशनालयले जनाएको छ । प्रदेश २ मा उपचारमा रहेका १२ जना र होम आइसोलेशनमा रहेका १ सय २७ जना गरी १ सय ३९ जना सक्रिय सङ्क्रमित रहेका छन् । कोभिड सङ्क्रमितमध्ये गम्भीर प्रकृतिका बिरामीलाई कोभिड अस्पतालमा उपचार गरिने गरिएको र समान्य सङ्क्रमितहरु हाल होम आइसोलेशनमा रहेको स्वास्थ्य निर्देशनालयका वरिष्ठ डाक्टर कमलेशप्रसाद यादवले बताउनु भयो ।

गण्डकी प्रदेश

प्रदेश सरकार स्वास्थ्य तथा जनसङ्ख्या मन्त्रालय, स्वास्थ्य निर्देशनालय गण्डकी प्रदेशको भदौ ७ गतेको तथ्याङ्क अनुसार प्रदेशमा कुल ७९ हजार २३ जना कोभिड–१९ बाट सङ्क्रमित भएका छन् । हाल तनहुँ, कास्की, बागलुङ, स्याङजा, गोरखा र नवलपरासी पूर्वमा ५ सय भन्दा बढी सक्रिय सङ्क्रमित रहेका छन् भने लमजुङ र पर्वतमा २ सय भन्दा बढी सक्रिय सङ्क्रमित रहेका छन् । गण्डकी प्रदेशमा रहेका सक्रिय सङ्क्रमितमध्ये ७ हजार ६ सय ५५ जना होम आइसोलेशन, ३ सय ७६ जना संस्थागत आइसोलेशन, ६९ जना आइसियू र चार जना भेण्टीलेटरमा रहेका छन् । गत २४ घण्टामा कोभिड–१९ सङ्क्रमणले चार जनाको मृत्यु भएको छ । यो सगै प्रदेशमा कोभिड–१९ सङ्क्रमणले १ हजार २ सय ४३ जनाको मृत्यु भएको छ । प्रदेशका विभिन्न स्थानिय तहमा यो साता खोप कार्यक्रम जारी रहयो । नेपाल सरकार स्वास्थ्य जनसङ्ख्या मन्त्रालयको तथ्याङ्क अनुसार भदौ ७ गतेसम्म गण्डकी प्रदेश भरी २ लाख ४ हजार ८ सय १६ जनाले कोभिसिल्ड र एस्ट्राजेनिकाको पहिलो मात्राको खोप लगाएका छन् भने  १ लाख ३७ हजार ८ सय २९ जनाले दोस्रो मात्राको खोप लगाएका छन् । त्यसैगरी भेरोसेल खोप अन्तरगत २ लाख ७ हजार ७ सय २० जनाले पहिलो मात्राको खोप लगाएका छन् भने १ लाख ५५ हजार ३ सय ९३ जनाले दोस्रो मात्राको खोप लगाएका छन् । त्यसै गरी जोन्सन् एण्ड जोन्सन पूर्ण खोप कुल १ लाख २ हजार ८ सय ९३ जनाले लगाएका छन् ।

सुदूरपश्चिम प्रदेश

सुदूरपश्चिम प्रदेश समाजिक विकास मन्त्रालय स्वास्थ्य निर्देशनालय राजपुर, डोटीका अनुसार सुदूरपश्चिम प्रदेशमा भदौ १ गतेदेखि भदौ ७ गतेसम्म २ सय ४३ जनामा सङ्क्रमण पुष्टि भएको छ । भदौ ७ गते मात्रै सुदूरपश्चिमका कञ्चनपुरमा एक जना र बैतडीमा तीन जनामा गरी चार जनामा  जनामा सङ्क्रमण पुष्टि भएको छ । हालसम्म ५ सय ८० जनाको मृत्यु भएको भएपनि अघिल्लो २४ घण्टामा सुदूरपश्चिम प्रदेशका कुनै पनि जिल्लामा कोभिड सङ्क्रमणका कारण मृत्यु नभएको सुदूरपश्चिम प्रदेश समाजिक विकास मन्त्रालय स्वास्थ्य निर्देशनालय राजपुर, डोटीले जनाएकोे छ । भदौ ७ गतेसम्म होम आइसोलेशनमा १ हजार ६२ जना, संस्थागत आइसोलेशनमा ९१ ज्ना रहेका छन् भने आइसियुमा चार जना र भेन्टीलेटरमा दुई जनाको उपचार भइरहेको मन्त्रालयले जनाएको छ । हालसम्म ३ लाख ७ हजार  २ सय ८३ जनाको कोभिड परीक्षण भएकोमा ४६ हजार ३८ जनामा सङ्क्रमण पुष्टि भइसकेको छ । स्वास्थ्य तथा जनसङ्ख्या मन्त्रालयका अनुसार सुदूरपश्चिम प्रदेशमा भेरोसेल पहिलो र दोस्रो चरण गरी २ लाख ७९ हजार ३ सय ९१ जनालाई खोप लगाइएको छ भने जे एण्ड जे कम्पनीको १ लाख ३० हजार १ सय ७५ जनालाई खोप लगाइएको छ । यसैगरी कोभिशिल्ड पहिलो चरणमा २ लाख ६ हजार ९ सय २१ जना र दोस्रो चरणमा १ लाख ३९ हजार २ जनामा खोप लगाइएको छ ।

अनलाइन डेस्क