समाचारहरू

स्वास्थ्य तथा जनसङ्ख्या मन्त्रालयका अनुसार यो एक साताको अवधिमा परीक्षण गरिएकामध्ये २१ प्रतिशतमा कोभिड सङ्क्रमण पुष्टि भएको छ । गत साता २४ प्रतिशतमा कोभिड सङ्क्रमण पुष्टि भएको थियो । यो साता प्रतिदिन सरदर २६ जनाको मृत्यु भएको तथ्याङ्कले देखाउँछ । अघिल्लो साता प्रतिदिन २८ जना सङ्क्रमितको मृत्यु भएको थियो । मन्त्रालयले एक सातामा ५४ हजार ३ सय ५४ ओटा स्वाब परीक्षण गरिएको जनाएको छ । यो साता ११ हजार ६ सय १२ जनामा कोभिड–१९ को सङ्क्रमण देखिएको मन्त्रालयले जनाएको छ । एक सातामा १२ हजार ३ सय ५ जना सङ्क्रमित निको भए भने १ सय ८२ जनाको मृत्यु भएको मन्त्रालयले जनायो ।

बागमती प्रदेश

यस प्रदेशमा साउन ४ गते कोभिड–१९ सङ्क्रमितको सङ्ख्या जम्मा ३ लाख ५९ हजार ७ सय ५२ जना पुगेको छ । गत साता ३ लाख ५२ हजार ९ सय १६ जना कोभिड–१९ का सङ्क्रमित रहेका थिए । यो साता ६ हजार ८ सय ३६ जना बढीले कोभिड–१९ का सङ्क्रमित थप भएका हुन् । यस प्रदेशमा दुई साता अघिदेखि सक्रिय सङ्क्रमितको सङ्ख्या बढ्न थालेको छ ।  यस प्रदेशका कूल सङ्क्रमितमध्ये ३ लाख ४६ हजार ९ सय ९१ जना उपचारपछि निको भइसकेका छन् भने विभिन्न अस्पतालका आइसोलेशन तथा होम आइसोलेशनमा ८ हजार ८ सय ५० जना उपचाररत रहेका छन् । अघिल्लो साता सक्रिय सङ्क्रमतिको सङ्ख्या ८ हजार ५ सय ६ जना रहेकोमा यो हप्ता ३ सय ४४ जना बढेर ८ हजार ८ सय ५० जनामा पुगेको हो । यस प्रदेशमा साउन ४ गतेसम्म मृत्यु हुनेको सङ्ख्या भने ३ हजार ९ सय ७१ जना पुगेको छ । यो अघिल्लो हप्ताभन्दा ६१ जनाले बढी हो । यस प्रदेशमा कोभिड–१९ बाट मृत्यु हुनेको दर १.१२ प्रतिशत रहेको छ । यस प्रदेशमा कोभिड–१९ सङ्क्रमण पुष्टि भएका मध्येमा अघिल्लो हप्ता ९६ प्रतिशतको हाराहारीमा निको हुनेको सङ्ख्या रहेकोमा साउन ४ गते आइपुग्दा यो सङ्ख्या ९४ प्रतिशत रहेको छ ।

गण्डकी प्रदेश

प्रदेश सरकार स्वास्थ्य तथा जनसङ्ख्या मन्त्रालय, स्वास्थ्य निर्देशनालय गण्डकी प्रदेशको साउन ४ गतेको तथ्याङ्क अनुसार प्रदेशमा कुल ६१ हजार ९ सय २३ जना कोभिड–१९ बाट सङ्क्रमित भएका छन् । हाल कास्कीमा ५ सय भन्दा बढी सक्रिय सङ्क्रमित रहेका छन् भने स्याङजा, गोरखा, बागलुङ, नवलपरासी पूर्व, तनहुँ र लमजुङमा २ सय भन्दा बढी सक्रिय सङ्क्रमित रहेका छन् । गण्डकी प्रदेशमा रहेका सक्रिय सङ्क्रमित मध्ये ३ हजार ४ सय ४८ जना होम आइसोलेशन, १ सय ३६ जना संस्थागत आइसोलेशन, ५६ जना आइसियू र आठ जना भेण्टीलेटरमा रहेका छन् । गत २४ घण्टामा कोभिड–१९ सङ्क्रमणले ६ जनाको मृत्यु भएको छ । यो सगै प्रदेशमा कोभिड–१९ सङ्क्रमणले १ हजार ३१ जनाको मृत्यु भएको छ । प्रदेशका विभिन्न स्थानिय तहमा असार २९ गतेदेखि भेरोसेल खोप लगाउन थालिएको छ । नेपाल सरकार स्वास्थ्य जनसङ्ख्या मन्त्रालयको तथ्याङ्क अनुसार साउन ४ गतेसम्म गण्डकी प्रदेश भरी १ लाख ८७ हजार ९ सय ७४ जनाले कोभिसिल्डको पहिलो मात्राको खोप लगाएका छन् भने ४९ हजार ६ सय ११ जनाले दोस्रो मात्राको खोप लगाएका छन् । त्यसैगरि भेरोसेल खोप अन्तरगत १ लाख ६३ हजार ९ सय ७० जनाले पहिलो मात्राको खोप लगाएका छन् भने २६ हजार ४ सय ३३ जनाले दोस्रो मात्राको खोप लगाएका छन् ।

अनलाइन डेस्क