समाचारहरू

स्वास्थ्य तथा जनसङ्ख्या मन्त्रालयका अनुसार यो एक साताको अवधिमा परीक्षण गरिएकामध्ये २३ प्रतिशतमा कोभिड सङ्क्रमण पुष्टि भएको छ । गत साता २४ प्रतिशतमा कोभिड सङ्क्रमण पुष्टि भएको थियो । यो साता प्रतिदिन सरदर २८ जनाको मृत्यु भएको तथ्याङ्कले देखाउँछ । अघिल्लो साता प्रतिदिन २८ जना सङ्क्रमितको मृत्यु भएको थियो । मन्त्रालयले एक सातामा ४७ हजार १ सय २३ ओटा स्वाब परीक्षण गरिएको जनाएको छ । यो साता १० हजार ७ सय ७२ जनामा कोभिड–१९ को सङ्क्रमण देखिएको मन्त्रालयले जनाएको छ । एक सातामा ९ हजार ५ सय ९८ जना सङ्क्रमित निको भए भने १ सय ५२ जनाको मृत्यु भएको मन्त्रालयले जनायो ।

प्रदेश १

स्वास्थ्य तथा जनसङ्ख्या मन्त्रालयका अनुसार ०७८ असार २१ गतेदेखि असार २८ गतेसम्मको अवधिमा झापामा ५ सय ५६ जना पुरूष र ४ सय ३१ जना महिला गरी ९ सय ८७ जनामा कोभिड–१९ को सङ्क्रमण पुष्टि भएको छ । त्यसैगरी सुनसरीमा ४ सय ३४ जना पुरूष र ४ सय जना महिला गरी ८ सय ३४ जना, मोरङमा ४ सय २३ जना पुरूष र ३ सय ९९ जना महिला गरी ८ सय २२ जना, पाँचथरमा १३ जना पुरूष र पाँच जना महिला गरी १८ जना, सङ्खुवासभामा १७ जना पुरूष र चार जना महिला गरी २१ जना, उदयपुरमा २४ जना पुरूष र १६ जना महिला गरी ४० जना, भोजपुरमा १३ जना पुरूष र सात जना महिला गरी २० जना, धनकुटामा ४१ जना पुरूष र २६ जना महिला गरी ६७ जना, इलाममा १७ जना पुरूष र आठ जना महिला गरी २५ जना, खोटाङमा ३८ जना पुरूष र १४ जना महिला गरी ५२ जना, ओखलढुङ्गामा ४८ जना पुरूष र आठ जना महिला गरी ५६ जना, सोलुखुम्बमा तीन जना पुरूष र दुई जना महिला गरी पाँच जना, ताप्लेजुङमा १० जना पुरूष र तीन जना महिला गरी १३ जना र तेहृथुममा सात जना पुरूष र १५ जना महिला गरी २२ जनामा कोभिड–१९ को सङ्क्रमण पुष्टि भएको छ । प्रदेश १ मा रहेका कोशी कोभिड–१९ अस्पताल, प्रदेश जनस्वास्थ्य प्रयोगशाला, वीपी कोइराला स्वास्थ्य विज्ञान प्रतिष्ठान घोपा प्रयोगशाला, मेची अस्पताल प्रयोगशाला, कोटीहोम प्रयोगशाला, नोवेल अस्पताल प्रयोगशाला, विराट अस्पताल प्रयोगशाला र न्यूरो अस्पताल प्रयोगशालामा गरिएको कोभिड–१९ को परीक्षणमा प्रदेश १ मा एक साताको अवधिमा २ हजार ९ सय ८२ जनामा कोभिड–१९ को सङ्क्रमण पुष्टि भएको स्वास्थ्य तथा जनसङ्ख्या मन्त्रालयले जनाएको छ । 

गण्डकी प्रदेश

गण्डकी प्रदेशमा असार २२ गतेबाट असार २८ गतेसम्म थप १ हजार ६ सय ९३ जनामा कोभिड–१९ सङ्क्रमण देखिएको छ । जसमध्ये ९ सय ५० जना पुरुष र ७ सय ४३ जना महिला रहेका छन् । योसँगै प्रदेशमा कुल सङ्क्रमितको सङ्ख्या ५४ हजार ९ सय ८५ रहेको छ । हाल कास्कीमा ५ सयभन्दा बढी सक्रिय सङ्क्रमित रहेका छन् भने स्याङजा, पर्वत, बागलुङ, नवलपरासी पूर्व, तनहुँ र म्याग्दीमा २ सय भन्दा बढी सक्रिय सङ्क्रमित रहेका छन् । प्रदेश सरकार स्वास्थ्य तथा जनसङ्ख्या मन्त्रालय, स्वास्थ्य निर्देशनालय गण्डकी प्रदेशको असार २८ गतेको तथ्याङ्क अनुसार गण्डकी प्रदेशमा रहेका कुल २ हजार ७ सय ४१ सक्रिय सङ्क्रमित मध्ये २ हजार ५ सय १६ जना होम आइसोलेशनमा रहेका छन् । गत २४ घण्टामा कोभिड–१९ सङ्क्रमणले एक जनाको मृत्यु भएको छ । योसँगै प्रदेशमा कोभिड–१९ सङ्क्रमणले १ हजार २ जनाको मृत्यु भएको छ । प्रदेशका विभिन्न स्थानिय तहमा असार २२ गतेदेखि भेरोसेल खोपको दोस्रो मात्र लगाउन थालिएको छ । 

लुम्बिनी प्रदेश

यस साता लुम्बिनी प्रदेशमा ३ सय ६१ जना महिला र ४ सय ५ जना पुरुष गरी ७ सय ६६ जनामा कोभिड सङ्क्रमण पुष्टि भएको छ । सबै भन्दा बढी रुपन्देही जिल्लामा २ सय ३० र सबै भन्दा कम रुकुम पुर्व जिल्लामा एक जनामा सङक्रमण पुष्टि भएको छ । गुल्मी, रुपन्देही, बर्दिया, दाङ, बाँके, पाल्पा र नवलपरासी पश्चिम जिल्लामा २ सय भन्दा बढी सङ्क्रमित रहेका छन् । प्रदेशमा २ हजार १ सय ७५ जना होम आइसोलेशन, ३ सय ८४ जना संस्थागत आइसोलेशन, ४६ जना आइसियु र आठ जना भेन्टिलेटरमा उपचाररत छन् । हालसम्म प्रदेशमा १ हजार ५ सय ६३ जनाको कोभिड सङ्क्रमणबाट मृत्यु भएको छ ।  प्रदेशमा कोभिशिल्ड पहिलो खोप २ लाख ७८ हजार ४ सय ७६ जना र दोस्रो खोप ८४ हजार ३ सय ६३ जनाले लगाएका छन् । भेरोसिलको पहिलो खोप ७३ हजार ८ सय ८४ जनाले लगाए भने दोस्रो खोप ५३ हजार ६ सय ८ जनाले लगाएका छन् ।

सुदूरपश्चिम प्रदेश

वास्थ्य तथा जनसङ्ख्या मन्त्रालयका अनुसार सुदूरपश्चिम प्रदेशमा ०७८ असार २२ गतेदेखि ०७८ असार २८ गतेसम्म ९० जना महिला सहित  ३ सय १० जनामा सङ्क्रमण पुष्टि भएको छ । असार २८ गते मात्रै सुदूरपश्चिम प्रदेशका  डडेल्धुरा जिल्लामा तीन पुरुष,  डोटीमा दुई महिला,  कैलालीमा दुई महिला र कञ्चनपुरमा ६ महिला सहित १७ जना गरी २४ जनामा  सङ्क्रमण पुष्टि भएको छ । अघिल्लो २४ घण्टमा सुदूरपश्चिम प्रदेशमा कोभिड सङ्क्रमणका कारण मृत्यु भएको रिपोर्ट प्राप्त नभएको भएपनि हालसम्म मृत्यु हुनेको सङ्ख्या ५ सय ७४ जना पुगेको सुदूरपश्चिम प्रदेश समाजिक विकास मन्त्रालय स्वास्थ्य निर्देशनालय राजपुर, डोटीले जनाएको छ । निर्देशनालयका अनुसार ११ जनाको आइसियुमा, पाँच जनाको भेन्टीलेटरमा र १३ जनाको कोभिड वार्डमा उपचार भइरहेको छ । यस साता सुदूरपश्चिम प्रदेशमा ३६ जना अस्पतालबाट डिस्चार्ज भएका छन् भने पछिल्लो २४ घण्टामा पाँच जना कोभिड सङ्क्रमितहरु डिस्चार्ज भएका निर्देशनालयले जनाएको छ ।

अनलाइन डेस्क