समाचारहरू

स्वास्थ्य तथा जनसङ्ख्या मन्त्रालयका अनुसार यो एक साताको अवधिमा परीक्षण गरिएकामध्ये तीन प्रतिशतमा कोभिड सङ्क्रमण पुष्टि भएको छ । यो साता १७ जनाको मृत्यु भएको तथ्याङ्कले देखाउँछ । एक सातामा ४६ हजार ५ सय ६४ सय ओटा स्वाब परीक्षण गरिएको मन्त्रालयले जनाएको छ । यो साता १ हजार ४ सय १९ जनामा कोभिड–१९ को सङ्क्रमण देखिएको मन्त्रालयले जनाएको छ । एक सातामा २ हजार ३४ जना सङ्क्रमित निको भए ।

गण्डकी प्रदेश

प्रदेश सरकार स्वास्थ्य तथा जनसङ्ख्या मन्त्रालय, स्वास्थ्य निर्देशनालय गण्डकी प्रदेशको पुस ५ गतेको तथ्याङ्क अनुसार प्रदेशमा कुल ८८ हजार २ सय ८३ जना कोभिड–१९ बाट सङ्क्रमित भएका छन् । हाल कास्कीमा २ सय भन्दा बढी सक्रिय सङ्क्रमित रहेका छन् भने मनाङमा सक्रिय सङ्क्रमितको सङ्ख्या शुन्य रहेको छ । गण्डकी प्रदेशमा रहेका सक्रिय सङ्क्रमित मध्ये ७ सय ४० जना होम आइसोलेशन, २४ जना संस्थागत आइसोलेशन, सात जना आइसियूमा रहेका छन् । प्रदेशमा कोभिड–१९ को सङ्क्रमणबाट कुल १ हजार ४ सय २५ जनाको मृत्यु भएको छ । प्रदेश सरकार स्वास्थ्य जनसङ्ख्या मन्त्रालयको तथ्याङ्क अनुसार पुस ५ गतेसम्म गण्डकी प्रदेशमा कोभिड–१९ विरुद्ध ११ लाख १२ हजार १ सय ५८ जनाले पूर्ण खोप लगाएका छन् भने १४ लाख ७२ हजार ३ सय ८७ जनाले खोपको पहिलो मात्रा लगाएका छन् । त्यस्तै नेपाल स्वास्थ्य तथा जनसङ्ख्या मन्त्रालयले पुस ४ गते देखि पुस १४ गतेसम्म गण्डकी प्रदेशका बागलुङ र कास्की बाहेक नौ जिल्लामा १२ देखि १७ वर्ष उमेर समूहलाई मोडर्ना खोप कार्यक्रम सञ्चालन गरेको छ । हालसम्म प्रदेशभर ८ हजार ६ सय ९५ जनाले सो खोपको पहिलो मात्रा प्राप्त गरेका छन् ।

कर्णाली प्रदेश

कर्णाली प्रदेशमा १ लाख ८० हजार ५ सय ९९ कोभिड –१९ परीक्षण गरेकोमा हालसम्म ३३ हजार ९ सय ९१ जनामा कोभिड–१९ सङ्क्रमण पुष्टि भएको छ । कर्णाली प्रदेश स्वास्थ्य निर्देशनालयका अनुसार हालसम्म ३२ हजार २ सय ६२ जनाले कोभिडलाई जितेर घर फर्किएका छन् । हाल आइसोलेशनमा १६ जना रहेका छन्, भने मृत्यु हुनेको सङ्ख्या ३ सय ८८ रहेको छ । यो हप्ता ८ जना मात्रै नयाँ सङ्क्रमित थपिएका छन । सातामा कोभिडबाट एकजनाको पनि मृत्यु नभएको निर्देशनालयले जनाएको छ । पछिल्लो २४ घण्टामा १० जनाले परीक्षण गरेकोमा ३ जना सङ्क्रमित भेटिएका छन् ।

अनलाइन डेस्क