समाचारहरू

स्वास्थ्य तथा जनसङ्ख्या मन्त्रालयका अनुसार यो एक साताको अवधिमा परीक्षण गरिएकामध्ये ८.२१ प्रतिशतमा सङ्क्रमण पुष्टि भएको छ । मन्त्रालयले एक सातामा २८ हजार १ सय ८२ ओटा स्वाब परीक्षण गर्दा २ हजार ३ सय १४ जनामा कोभिड–१९ को सङ्क्रमण देखिएको जनाएको छ । एक सातामा ८ सय २३ जना सङ्क्रमित निको भए भने १७ जनाको मृत्यु भएको पनि मन्त्रालयले जनायो । नेपालमा कोभिड–१९ को दोस्रो लहर सुरू भएको सरकारले जनाएको छ । सरकारले स्वास्थ्य अनुशासनमा जोड दिँदै आएको छ ।

प्रदेश १

स्वास्थ्य तथा जनसङ्ख्या मन्त्रालयका अनुसार ०७७ चैत २४ गतेदेखि चैत ३० गतेसम्मको अवधिमा झापामा नौ जना पुरूष र १२ जना महिला गरी २१ जनामा कोभिड–१९ को सङ्क्रमण पुष्टि भएको छ । त्यसैगरी सुनसरीमा १६ जना पुरूष र ११ जना महिला गरी २७ जना, मोरङमा ४७ जना पुरूष र २६ जना महिला गरी ७३ जना, पाँचथरमा एक जना महिला, सङ्खुवासभामा दुई जना पुरूष र तीन जना महिला गरी पाँच जना, उदयपुरमा तीन जना महिला, भोजपुरमा तीन जना पुरूष, धनकुटामा दुई जना महिला, इलाममा दुई जना पुरूष र एक जना महिला, खोटाङमा चार जना पुरूष र एक जना महिला, ओखलढुङ्गामा दुई जना पुरूष र तेहृथुममा एक जना पुरूष गरी १ सय ४९ जनामा कोभिड–१९ को सङ्क्रमण पुष्टि भएको छ । प्रदेश १ मा रहेका कोशी कोभिड–१९ अस्पताल, प्रदेश जनस्वास्थ्य प्रयोगशाला, वीपी कोइराला स्वास्थ्य विज्ञान प्रतिष्ठान घोपा प्रयोगशाला, मेची अस्पताल प्रयोगशाला,कोटीहोम प्रयोगशाला, नोवेल अस्पताल प्रयोगशाला, विराट अस्पताल प्रयोगशाला र न्यूरो अस्पताल प्रयोगशालामा गरिएको कोभिड–१९ को परीक्षणमा प्रदेश १ मा एक साताको अवधिमा प्रदेश १ मा १ सय ४९ जनामा कोभिड–१९ को सङ्क्रमण पुष्टि भएको स्वास्थ्य तथा जनसङ्ख्या मन्त्रालयले जनाएको छ । सोलुखुम्बुमा यो साता कोभिड–१९ सङ्क्रमित फेला नपरेको मन्त्रालयले जनाएको छ ।

भारतमा कोभिड–१९ सङ्क्रमितको दर बढेपछि प्रदेश १ सरकारले पूवी नाका काड्डभिट्टामा हेल्थ डेस्क राखि स्वास्थ्य जाँच सुरू गरेको छ । काड्डभिट्टा नाकाबाट नेपालीहरू फर्किने क्रम बढेपछि नेपाल प्रहरी र सशस्त्र प्रहरीले स्वास्थ्य जाँचसहितको हेल्थ डेस्क सञ्चालनमा ल्याएको सामाजिक विकास मन्त्रालयले जनाएको छ । प्रदेश १ सरकारले कोशी कोभिड–१९ अस्पताल पुन सञ्चालनमा ल्याउने तयारी गरेको छ । सामाजिक विकास मन्त्री उषाकला राईले चैत ३० गते प्रदेश सरकारले बन्द गरेको कोशी कोभिड–१९ अस्पतालको निरीक्षण गर्नु भएको छ । कोभिड अस्पताल र जिल्लामा रहेका कोभिड अस्पताल पुन सञ्चालनमा ल्याउने निर्णय प्रदेश सरकारले गरेको छ ।

बागमती प्रदेश

यस प्रदेशमा चैत ३० गते कोभिड–१९ सङ्क्रमितको सङ्ख्या जम्मा १ लाख ५४ हजार ६ सय ९६ जना पुगेको छ । अघिल्ला हप्ता १ लाख ५३ हजार ४ सय ४२ जना कोभिड–१९ का सङ्क्रमित रहेकोमा यस हप्ता १ हजार २ सय ५४ जना सङ्क्रमित थपिएका छन् । यो हप्ता अघिल्लो हप्ता भन्दा ५ सय ९ जना बढीले कोभिड–१९ का सङ्क्रमित थप भएका हुन् । यस प्रदेशमा अघिल्लो हप्तादेखि प्रत्येक हप्ता सङ्क्रमितको सङ्ख्या बढ्न थालेको छ ।

यस प्रदेशका कूल सङ्क्रमितमध्ये १ लाख ५२ हजार २ सय ४ जना उपचारपछि निको भइसकेका छन् भने विभिन्न अस्पतालका आइसोलेशन तथा होम आइसोलेशनमा १ हजार ४ सय ६४ जना उपचाररत रहेका छन् । अघिल्लो हप्ता सक्रिय सङ्क्रमतिको सङ्ख्या ८ सय १९ जना रहेकोमा यो हप्ता ६ सय ४५ जना बढ्न गई १ हजार ४ सय ६४ जनामा पुगेको हो । चैत ३० गतेसम्म मृत्यु हुनेको सङ्ख्या भने १ हजार २९ जना पुगेको छ । यो अघिल्लो हप्ता भन्दा ५ जनाले बढी हो । यस प्रदेशमा कोभिड–१९ बाट मृत्यु हुनेको दर ०.६७ प्रतिशत रहेको छ ।

अघिल्लो साता ३९.६० प्रतिशत महिला र ६०.४० प्रतिशत पुरुष सङ्क्रमित भएकोमा चैत ३० गते पनि सोही प्रतिशतको अनुपातमा महिला र पुरुषको सङ्क्रमित प्रतिशत रहेको छ । बागमती प्रदेशमा अघिल्लो हप्ता देशको कूल सङ्क्रमणको सङ्ख्या ५५.१० प्रतिशत रहेकोमा चैत २३ गते आइपुग्दा ५५.३० प्रतिशत कायम भएको छ ।

यस प्रदेशमा कोभिड–१९ सङ्क्रमण पुष्टि भएका मध्येमा अघिल्लो हप्ता ९८.८० प्रतिशतको हाराहारीमा निको हुनेको सङ्ख्या रहेकोमा चैत ३० गते आइपुग्दा यो सङ्ख्या ९८.३९ प्रतिशतमा आएको छ । कोभिड–१९ को विरुद्ध पहिलो र दोस्रो चरणको खोप कार्यक्रममा लक्ष्य ६ लाख २ हजार ६ सयको ४६ जना रहेकोमा ३ लाख ९६ हजार ४ सय ३९ जनाले खोप लागाएका छन् । जुन लक्ष्यको ६५.७८ प्रतिशत मात्र पुरा भएको सामाजिक विकास मन्त्रालयले जनाएको छ । तेस्रो चरण अन्तर्गत यस प्रदेशमा चैत २५ गतेदेखि कोभिड–१९ विरुद्धको खोप अभियान सुरु भएकोमा चैत ३० गतेसम्म ४० हजार ७ सय ४७ जनाले खोप लिइ सकेका छन् ।

गण्डकी प्रदेश

गण्डकी प्रदेशमा चैत २४ गतेबाट चैत ३० गतेसम्म थप २ सय ८० जनामा कोभिड–१९ सङ्क्रमण देखिएको छ । जसमध्ये १ सय ५० जना पुरुष र १ सय ३० जना महिला रहेका छन् । योसँगै प्रदेशमा कुल सङ्क्रमितको सङ्ख्या १९ हजार १५ रहेको छ ।

लुम्बिनी प्रदेश

लुम्बिनी प्रदेशमा कोभिड सङक्रमण बढ्दै गएको छ । यस साता महिला १ सय ४९ जना र पुरुष २ सय ३६  जना गरी ३ सय ८५ जनामा कोभिड सङ्क्रमण पुष्टि भएको छ । यस साता सबै भन्दा बढी बाँके जिल्लमा  ६६ पुरुष र ४८ महिला गरी १ सय १४ जनामा  सङ्क्रण पुष्टि भएको छ । पछिल्लो २४ घण्टामा प्रदेशमा ४ सय ४८ जनामा गरिएको परीक्षणमा  १ सय १९ जनामा कोभिड पोजेटिभ देखिएको स्वास्थ्य मन्त्रालयको तथ्याङ्कले जनाएको छ । प्रदेशमा ४ सय ६२ जना होम आइसोलेशन, ४२ जना आइसोलेशन र ३५ जना आइसियुमा रहेका छन् । पछिल्लो २४ घण्टामा प्रदेशमा दुई जनाको मृत्यु भएको लुम्बिनी प्रदेश स्वास्थ्य मन्त्रालयले जनाएको छ ।

सुदूरपश्चिम प्रदेश

स्वास्थ्य तथा जनसङ्ख्या मन्त्रालयका अनुसार सुदूरपश्चिम प्रदेशमा चैत २४ गतेदेखि चैत ३० गतेसम्म २४ जना महिला सहित ६९ जनामा सङ्क्रमण पुष्टि भएको छ । चैत ३० गते मात्रै सुदूरपश्चिमका डडेल्धुरा जिल्लामा एक पुरुष, कैलालीमा तीन महिला सहित १४ जनामा र कञ्चनपुरमा ६ पुरुष गरी जम्मा २१ जनामा सङ्क्रमण पुष्टि भएको छ । यो साता एक जना पुरुषको मृत्यु भएसँगै यस सुदूरपश्चिम प्रदेशमा मृत्यु हुनेको सङ्ख्या ६८ पुगेको छ ।  हालसम्म सुदूरपश्चिम प्रदेशमा ३ हजार ९ सय ६६ जना महिला र ११ हजार १ सय ९६ जना पुरुष गरी १५ हजार १ सय ६२ जनामा कोभिड पुष्टि भएको छ । नेपाल सरकारले सञ्चालन गरेको पहिलो र दोस्रो चरणको कोभिड १९ विरुद्धको खोप अभियानमा सुदूरपश्चिम प्रदेशमा चैत १५ गतेसम्म २ लाख २ हजार ८ सय ८ जनाले खोप लिएको सुदूरपश्चिम प्रदेश सामाजिक विकास मन्त्रालयले जनाएको छ ।

अनलाइन डेस्क