समाचारहरू

पुस ६ गते ७ सय ४२ जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या २ लाख ५४ हजार ५ सय १४ पुगेको स्वास्थ्य तथा जनसङ्ख्या मन्त्रालयले जनाएको छ । गत २४ घण्टामा ६ हजार ३ सय ५१ ओटा नमूना परीक्षण गरेको पनि मन्त्रालयले जनाएको छ । सङ्क्रमितमध्ये २ लाख ४४ हजार ७ सय ४३ जना निको भएका छन् । पुस ६ गते १ हजार ७९ जना निको भएका छन् भने निको हुनेको दर ९६.१ प्रतिशत रहेको मन्त्रालयले जनाएको छ । पुस ६ गतेसम्म १ हजार ७ सय ९५ जना कोभिड सङ्क्रमितको मृत्यु भएको मन्त्रालयले जनाएको छ । ७ हजार ९ सय ७६ जना सक्रिय सङ्क्रमित रहेकामा ४ हजार ५ सय ८ जना होम आइसोलेशनमा छन् । उपचचाररतमध्ये २ सय ७९ जनाको उपचार आइसीयूमा र ५७ जनाको उपचार भेण्टिलेटरमा भइरहेको छ । मन्त्रालयका अनुसार मनाङ र मुगुमा सक्रिय सङ्क्रमित छैनन् भने काठमाडौँ र ललितपुरमा ५ सयभन्दा बढी सक्रिय सङ्क्रमित छन् ।

प्रदेश १
मोरङ प्रतिनिधि नेत्रप्रसाद अधिकारीका अनुसार रङ्गेली नगरपालिका–४ आमतोलाको जनता माध्यमिक विद्यालयका विद्यार्थीलाई ज्वरो आएपछि विद्यालय बन्द गरिएको छ । ६० जना विद्यार्थीमा ज्वरो देखिएपछि पुस ६ गते स्वाब सङ्कलन सुरू गरिएको छ । पुस ६ गते ११ विद्यार्थीको नमूना सङ्कलन गरेर परीक्षणका लागि पठाइएको रङ्गेली नगरपालिकाको स्वास्थ्य शाखा प्रमुख भुपेन्द्र मण्डलले जानकारी दिनुभयो । विद्यालयमा ४ सय विद्यार्थी अध्यनरत छन् । रङ्गेलीमा मङ्सिर १५ गतेदेखि स्वास्थ्य मापदण्ड अपनाएर विद्यालय खोल्ने निर्णय गरिएको थियो ।

सुदूरपश्चिम प्रदेश
कञ्चनपुर प्रतिनिधि कोमलनिरञ्जन भाटका अनुसार कोभिड–१९ महामारीको स्थितिलाई मध्यनजर गर्दै बेलौरीमा सङ्क्रमण थप फैलिन नदिन र भिडभाड न्यूनीकरण गर्न भन्दै पुस ५ गतेदेखि पुस ११ गतेसम्मका लागि लकडाउन गरेको बेलौरी नगरपालिकाले जनाएको छ । पुस ४ गते बेलौरी नगर कार्यपालिकाको बैठक बसी बेलौरी नगर क्षेत्र भित्रका सम्पूर्ण सरकारी तथा गैरसरकारी सङ्घसंस्था, वित्तीय संस्था, शिक्षण संस्था, व्यापारिक व्यवसाय, सीमा नाका र सवारी साधनको आवतजावत पूर्ण रूपमा बन्द गर्ने निर्णय गरिएको नगरपालिकाका प्रमुख पोतिलाल चौधरीद्वारा जारी सूचना पत्रमा उल्लेख गरिएको छ । औषधालय, आयल स्टोर तथा उखु किसानका उखु ढुवानी साधन भने खुला रहने सूचनामा जनाइएको छ ।

अनलाइन डेस्क