समाचारहरू

असोज २४ गते ५ हजार ८ जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या १ लाख ५ हजार ६ सय ८४ पुगेको स्वास्थ्य तथा जनसङ्ख्या मन्त्रालयले जनाएको छ । जसमध्ये ३० प्रतिशत महिला र ७० प्रतिशत पुरुष रहेका छन् । गत २४ घण्टामा १९ हजार ३ सय २० जनाको स्वाब परीक्षण गरिएको मन्त्रालयले जनाएको छ । मन्त्रालयले जारी गरेको स्थिति प्रतिवेदन अनुसार असोज २४ गतेसम्म ६ सय १४ जना कोभिड–१९ सङ्क्रमितको मृत्यु भएको छ । सङ्क्रमितमध्ये ७४ हजार २ सय ५२ जना निको भएका छन् । असोज २४ गते १ हजार २ सय २९ जना निको भएका छन् भने निको हुनेको दर ७०.३ प्रतिशत रहेको मन्त्रालयले जनाएको छ । ३० हजार ८ सय १८ जनाको उपचार भइरहेको छ । मन्त्रालयका अनुसार १७ हजार १ सय ६४ जनाको उपचार होम आइसोलेशनमा भइरहेको छ । ३ सय २१ जनाको उपचार आइसीयूमा र ७७ जनाको उपचार भेण्टिलेटरमा भइरहेको छ ।

बागमती प्रदेश  
रामेछाप प्रतिनिधि नवराज घिमिरेका अनुसार खाँडादेवी गाउँपालिकाका कर्मचारीमा कोभिड–१९ को सङ्क्रमण पुष्टि भएपछि गाउँपालिले असोज २४ गते सूचना जारी गरी गाउँपालिका कार्यालय र आसपासको क्षेत्रलाई सील गरेको जनाएको छ । गाउँपालिकाका एक जना कर्मचारीमा असोज २४ गते कोभिड सङ्क्रमण पुष्टि भएको गाउँपालिका अध्यक्ष प्रेमबहादुर तामाङले जानकारी दिनुभयो । सङ्क्रमित कर्मचारी होम आइसोलेशनमा बसेको उहाँले बताउनुभयो । अन्य कर्मचारी र जनप्रतिनिधिको स्वाब परीक्षण गरी रिपोर्ट आएपछि मात्र कार्यालय सञ्चालन हुने अध्यक्ष तामाङले जानकारी दिनुभयो । यसको लागि कम्तीमा पाँच दिन लाग्ने र यसबीचमा पालिकाले उपलब्ध गराउने सबै सेवा बन्द हुने पालिकाले जनाएको छ ।

लुम्बिनी प्रदेश
रुपन्देही प्रतिनिधि रीमा बिसीका अनुसार कोभिड सङ्क्रमित बुटवल उमनपा–९ की ५५ वर्षीया महिला र नवलपरासी (बर्दघाट सुस्ता पश्चिम) जिल्लाको सुनवल नगरपालिका–५ का ७६ वर्षीय बृद्धको असोज २३ गते लुम्बिनी प्रादेशिक अस्पतालमा उपचारको क्रममा मृत्यु भएको छ । एक साताअघि पीसीआर परीक्षण गर्दा कोभिड पोजेटिभ देखिएका नवलपरासीका बृद्धमा दम, उच्च रक्तचापको र ज्वरोको समस्या देखिएको थियो । महिलामा अरु कुनै समस्या नभएको अस्पतालका डाक्टर विष्णु गौतमले जानकारी दिनु भयो । यसैगरी, शुद्धोधन गाउँपालिका–६ का ५७ वर्षीय पुरुषको असोज २३ गते र बुटवल उपमनपा–१० का ७९ वर्षीय पुरुषको असोज २४ गते बुटवलस्थित कोरोना विशेष अस्पतालमा मृत्यु भएको लुम्बिनी प्रादेशिक अस्पताल बुटवलका डाक्टर सुदर्शन थापाले बताउनु भयो ।

पाल्पा प्रतिनिधि यज्ञमूर्ति तिमिल्सिनाका अनुसार निस्दी गाउँपालिका जनप्रतिनिधि र कर्मचारीहरू गरी १० जनामा  एकै  दिन कोभिड सङ्क्रमण पुष्टि भएपछि असोज २४ गतेदेखि कात्तिक १ गतेसम्म गाउँपालिकालाई सील गरिएको छ । गाउँपालिकाले सूचना जारी गर्दै कर्मचारी र जनप्रतिनिधिहरूको रिपोर्ट पोजेटिभ आएको र  समुदायस्तरमै कोभिड सङ्क्रमण फैलनसक्ने उच्च जोखिम देखिएकोले निस्दी गाउँपालिका क्षेत्र पूर्ण रूपमा सील गरिएको जनाएको छ । यसैगरी, स्वास्थ्यकर्मीहरूमा सङ्क्रमण देखिएपछि पाल्पाको रामपुर अस्पतालले आकस्मिक बाहेकको अन्य सेवा असोज २३ गते रातिबाट बन्द भएको जनाएको छ ।

अनलाइन डेस्क