समाचारहरू

पुस ५ गते ५ सय ८८ जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या २ लाख ५३ हजार ७ सय ७२ पुगेको स्वास्थ्य तथा जनसङ्ख्या मन्त्रालयले जनाएको छ । गत २४ घण्टामा ४ हजार ६ सय २० ओटा नमूना परीक्षण गरेको पनि मन्त्रालयले जनाएको छ । सङ्क्रमितमध्ये २ लाख ४३ हजार ६ सय ६४ जना निको भएका छन् । पुस ५ गते १ हजार ९७ जना निको भएका छन् भने निको हुनेको दर ९६ प्रतिशत रहेको मन्त्रालयले जनाएको छ । पुस ५ गतेसम्म १ हजार ७ सय ८८ जना कोभिड सङ्क्रमितको मृत्यु भएको मन्त्रालयले जनाएको छ । ८ हजार ३ सय २० जना सक्रिय सङ्क्रमित रहेकामा ४ हजार ८ सय ३७ जना होम आइसोलेशनमा छन् । उपचचाररतमध्ये २ सय ६५ जनाको उपचार आइसीयूमा र ५१ जनाको उपचार भेण्टिलेटरमा भइरहेको छ । मन्त्रालयका अनुसार मनाङ र मुगुमा सक्रिय सङ्क्रमित छैनन् भने काठमाडौँ र ललितपुरमा ५ सयभन्दा बढी सक्रिय सङ्क्रमित छन् ।

सुदूरपश्चिम प्रदेश
बाजुरा प्रतिनिधि पदमबहादुर सिंह कोभिड सङ्क्रमणको जोखिम देखिएपछि जिल्ला प्रशासन कार्यालयले मार्तडीका सामुदायिक र निजी विद्यालय अर्को सूचना जारी नभएसम्मका लागि बन्द गर्न पत्राचार गरेको छ । जिल्ला प्रशासन कार्यालयले पुस ४ गते बडिमालिका नगरपालिकालाई वडा नम्बर ८ र ९ मार्तडीका सामुदायिक र निजी विद्यालय बन्द गर्न पत्राचार गरिएको प्रमुख जिल्ला अधिकारी कृष्ण गैह्रेले जानकारी दिनु भयो । प्रजिअ गैह्रेले भन्नु भयो–‘हाललाई १० दिनसम्मको लागि बन्द गर्न पत्राचार गरिएको छ । बाँकी सङ्क्रमणको अवस्था मध्यनजर गरेर निर्णय लिइनेछ ।’ मङ्सिर ३० गते स्वाब सङ्कलन गरी धनगढी पठाएको र पुस २ गते आएको रिपोर्टमा चार जना विद्यार्थीहरूमा कोरोना देखिएपछि कोभिड सङ्क्रमण बढी हुन सक्ने भन्दै सुरक्षाको दृष्टिकोणले बन्द गर्न पत्राचार गरिएको प्रजिअ गैह्रेले बताउनु भयो ।

अनलाइन डेस्क