समाचारहरू

पुस ३ गते ७ सय ८२ जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या २ लाख ५२ हजार ४ सय ७४ पुगेको स्वास्थ्य तथा जनसङ्ख्या मन्त्रालयले जनाएको छ । गत २४ घण्टामा ५ हजार ७ सय ६ ओटा नमूना परीक्षण गरेको पनि मन्त्रालयले जनाएको छ । सङ्क्रमितमध्ये २ लाख ४१ हजार ३ सय ९२ जना निको भएका छन् । पुस ३ गते १ हजार २९ जना निको भएका छन् भने निको हुनेको दर ९५.६ प्रतिशत रहेको मन्त्रालयले जनाएको छ । पुस ३ गतेसम्म १ हजार ७ सय ६५ जना कोभिड सङ्क्रमितको मृत्यु भएको मन्त्रालयले जनाएको छ । ९ हजार ३ सय १७ जना सक्रिय सङ्क्रमित रहेकामा ५ हजार ८ सय ३४ जना होम आइसोलेशनमा छन् । उपचचाररतमध्ये २ सय ८३ जनाको उपचार आइसीयूमा र ४९ जनाको उपचार भेण्टिलेटरमा भइरहेको छ । मन्त्रालयका अनुसार मनाङमा सक्रिय सङ्क्रमित छैनन् भने काठमाडौँ, ललितपुर र कास्कीमा ५ सयभन्दा बढी सक्रिय सङ्क्रमित छन् ।

लुम्बिनी प्रदेश
पाल्पा प्रतिनिधि यज्ञमूर्ति तिमिल्सिनाका अनुसार पूर्वखोला गाउँपालिका–२ स्थित जल्पा स्वास्थ्य चौकी एक साताका लागि सील गरिएको छ । कन्ट्याक्ट ट्रेसिङमा स्वाब परीक्षण गर्दा ६ जना कर्मचारीमा कोभिड पुष्टि भएपछि पुस १ गतेदेखि पुस ८ गतेसम्म स्वास्थ्य चौकीबाट प्रदान गरिने सम्पूर्ण सेवाहरू बन्द गरिएको गाउँपालिकाका प्रमुख प्रशासकीय अधिकृत ज्ञानुप्रसाद पनेरुद्वारा हस्ताक्षरित प्रेस विज्ञप्तिमा उल्लेख छ ।

सुदूरपश्चिम प्रदेश
दार्चुला प्रतिनिधि नरेन्द्रसिंह कार्कीका अनुसार समुदायस्तरमा कोभिड फैलिने देखिएपछि मार्मा गाउँपालिकामा रहेका चार ओटा विद्यालय पुस ३ गतेदेखि पुस ९ गतेसम्मका लागि बन्द गरिएको छ । विद्युत लाइन विस्तारमा संलग्न एक जना कर्मचारीमा कोभिड देखिएपछि गाउँपालिकाका भित्र रहेका लटिनाथ मावि, रस्कोट, तपोवन मावि, पडपडा, सिद्धनाथ आधारभूत विद्यालय, बस्कोट र हटिनाथ आधारभूत विद्यालय, मर्मती बन्द गरिएको मार्मा गाउँपालिका शिक्षा शाखा प्रमुख राजेन्द्रप्रसाद जोशीले बताउनु भयो । ०७७ मङ्सिर ३० गते मकरीगाड हाइड्रोपावरमा कार्यरत एक जना ३० वर्षीय कर्मचारीमा कोभिड देखिनुभन्दा पहिले मार्मा गाउँपालिकाका विभिन्न घरमा गई विद्युतको मिटर जडान गर्ने र तार तान्ने काम गरेकाले समुदाय र बालबालिकामा कोभिड सङ्क्रमण फैलिन नदिन विद्यालय बन्द गर्नु परेको प्रमुख जोशीले बताउनु भयो । मार्मा गाउँपालिकाकामा गत आसोजदेखि विद्यालय सञ्चालनमा आएका थिए ।

कञ्चनपुर प्रतिनिधि कोमलनिरञ्जन भाटका अनुसार दोधारा चाँदनी नगरपालिकाले सामुदायमा कोभिड–१९ सङ्क्रमण देखिन थालेपछि पुस ३ गतेबाट एक सातासम्म लकडाउन गर्ने निर्णय गरेको छ । पुस २ गते नगरपालिकामा नौ जनालाई कोभिड–१९ को सङ्क्रमण देखिएपछि कोभिडको महामारी फैलन सक्ने भन्दै पुस २ गते कार्यपालिकाको आकस्मिक बैठकले लकडाउनको निर्णय गरेको प्रमुख प्रशासकीय अधिकृत गणेशदत्त मिश्राले बताउनुभयो ।

अनलाइन डेस्क